Skip to Content

ئەو ئارام و منیش وەک ئەو … شیعری مەحموود دەروێش … و: پشکۆ نەجمەدین

ئەو ئارام و منیش وەک ئەو … شیعری مەحموود دەروێش … و: پشکۆ نەجمەدین

Closed
by كانونی یه‌كه‌م 5, 2019 General, Poems

ئەو چای لیمۆ دەخواتەوە و منیش قاوە،

جیاوازییەکەی نێوان ئێمە، تەنیا، ئەوە.

ئەو وەکوو من، کراسێکی دەڵپ و میلدار لەبەر دەکا،

منیش وەک ئەو، ڕۆژنامەکانی ئێواران دەخوێنمەوە.

ئەو نامبینێ ساتێ کە من دزەنیگای تێ دەگرم و

من نایبینم، وەختێ کە ئەو، پەنامەکێ لێم دەڕوانێ!

ئەو ئارام و منیش وەک ئەو.

ئەو شتێکی لە گارسۆنەکە دەپرسێ و

منیش شتێک…

بەنێوانماندا ڕەت دەبێ کتەیەک*، ڕەش،

دەست بە شەوی فەرووەکەیدا دەهێنم و

ئەویش هەر وا…

من پێی ناڵێم، ئەمڕۆ ئاسمان ڕوون و شینە،

ئەو نایەژێ، ئەمڕۆ ئاسمان تەواو ڕوونە.

ئەو هەم بینراو و بینەرە،

منیش وەک ئەو.

قاچی چەپم دەبزووێنم،

لاقی ڕاستی دەجووڵێنێ.

هەر وا من لەبەر خۆمەوە،

بە ئاوازی گۆرانییەک گرنگەم** دێ،

ئەویش هەر وا،

گۆرانییەکی هاوئاواز، دەڵێتەوە!

لە دڵی خۆمدا دەبێژم:

تۆ بڵێی ئەو، ئاوێنە بێ و

ڕووخسارمی تیا ببینم؟

لە چاوانی ڕادەمێنم،

بەڵام من ئیتر نایبینم…

ئیدی بلەز، قاوەخانە جێ دەهێڵم.

ڕادەمێنم، ئەڵێم ڕەنگە، کە ئەو، کەسێکی بکوژ بێ،

یاخود پیاوێکی ڕاگوزەر،

کە پێی وا بێ، من پیاوکوژم.

ئەو ترساوە و منیش ترساو!

*کتە: پشیلە

**گرنگە، گرنگەگرنگ: لەبەرخۆوە گۆرانیگوتن.

و: پشکۆ نەجمەدین

Previous
Next
Kurdish