Skip to Content

گۆچان … سەلام عومەر

گۆچان … سەلام عومەر

Closed
by كانونی یه‌كه‌م 8, 2019 General, Poems

گۆچانەكەی بابم
كە ئی باپیرم بوو
كەوتۆتە ناو دەستی من و
رەمدەژێنێ‌
هێند دەجوڵێ‌
جەستەو دەست و
روحی نامۆم دەلەرزێنێ‌
دەیهاوێمە نێو نوێنەكان
دیوەكان و…..
تەواوی پەنجەرەكان و
بنمیچی خانوەكەشم دەبزوێنێ‌


ئەو گۆچانە
ئی باپیری باپیرم بوو
لە شانەدەر دۆزیانەوە
كە دەشیبەمەوە ناو چیا
تاشەو تاوێر
بەسەر یەكدا دادەخزێنێ‌
هێڵە كۆنكرێتیەكانی تخوب
ستوونە سەرابیەكان
دادەڕزێنێ‌.


گۆچانەكەی بابم
هاتۆتە نێو دەستی من و….
كەوی نابێ‌
ئارام ناگرێ‌
راناوەستێ‌
گۆچانەكەم
نەقەت دەبێتە ئی من و
نە دەبێتە قۆچان و
ناشچێتە نێو هیچ گرێبەستێ‌.

Previous
Next
Kurdish