Skip to Content

130 Views

چیرۆک بۆ منداڵان.. خۆڵی کوردسـتان … رەزا شـوان

چیرۆک بۆ منداڵان.. خۆڵی کوردسـتان … رەزا شـوان

Be First!
by December 24, 2019 General, Kids Literature
image_print

مـریـەم کچۆڵەیەکی کوردی جوانکـیلە و زیرەک و رووخـۆشە، لە نەرویج لەدایکـبووە. دایک و باوکی لە ماڵەوە هەر بە زمانی شیرینی کوردی لەگەڵیدا دەدوێن. بۆیە بە باشی کوردی دەزانێت، لە باخچـەی منداڵانیشدا فـێری زمانی نەرویـجی بووە.
پـار مریەم شەش ساڵان بوو، لە بەهاردا لەگەڵ دایک و باوکیدا، بە سەردانی بۆ ماوەی سێ هەفـتە هاتنەوە بۆ شاری سلێمانی لە باشووری کوردستان، کە کەسوکـاری دایک و باوکی لەم شارەدان. کەسوکاری دایـکی و باوکـی ناسی. بۆ گەڕان و سەیرانیش بردیـان بۆ گەلێ شوێنی کوردستان. مریـەم بە جـوانی دیمەنە جوان و قەشەنگەکـانی کوردستان و بە گـوڵ و گـوڵـزاری جـوان و بۆنخـۆشی بەهـاری کوردسـتان زۆر سەرسام بـوو.
مـریـەم ئێستا تەمـەنی حەوت سـاڵە، لە پـۆلی یەکـەمی قوتابخـانەی بنەڕەتی دایـە.
دایکی لە ماڵەوەدا، لە نێو خانە شووشەییەکانی رەفتەکانی چـێشتخانەکەیاندا، کۆمەڵێک شووشەی بچـووکی ریزکـردوون، کە پـڕن، لە کـاری و لە بەهـاراتی بـریانی و کـفـتە و شفتە و یاپـراغ و جاتـرە بۆ ناو نۆکاو و بیـبەری تیژ و زەردەچـێوە و چەنـدین ئاڵەت و بەهـاراتی تر.. کە بەتاڵ بوونایە دووبارە پڕی دەکـردنەوە.. لەسەر پارچە کاغەزیش بە کوردی نـاوی یەک بە یەکی بەهـاراتەکـانی نووسـیوون.. ئەوەی کە سەرنجی مـریـەمی راكێشا ئەو شووشەیە بوو، کە دایکی بە جـیا لە نێـو خانـەیەکی رەفـتەکاندا دایـان بوو، لەسەریشی نووسیبوو. مریەم وایدەزانی کە ئەوەش جۆرێکە لە بەهاراتی چـێش، بەڵام نەیبینی کە بۆ یەک جارێیش دایکی ئەوەی لەو شووشەیە دایە بەکـاربهـێنێت.
مریـەم: دایکە ئەو شووشە بە تەنیایە، چ بەهـاراتێکی تێـدایە؟ بۆ بەکـاری ناهـێنیت؟
دایـکی (بە زەردەخەنەیەکی ناسکەوە): مریـەم گیان ئەو شووشەیە خـۆڵی تێـدایە.
مریـەم (بە پێکەنین و سەرسامیـیەوە): خـۆڵی تێـدایە؟!
دایکی: بەڵی.. خـۆڵی کوردسـتانی تێـدایە.
مریـەم (هـێندەی تر سەری سوڕما): خـۆڵی کوردستان؟! ئـەی لە نەرویـج خـۆڵ نییە؟
دایـکی: بەڵی کچـە شـیرینەکەم، لـێرە و لە هەمـوو وڵاتێکـدا خـۆڵ هـەیە.
مریـەم: کەواتە خـۆڵی کـوردسـتانت بۆچـییە؟
دایکی: ئەم پرسیارەتم پێخۆشە. مریەم گیان، من و باوکت لە کوردستان لەدایک بووین. لە کوردستان گۆش و پەروەردە بووین و گەورە بووین، هەوای کوردستانمان هەڵمژی، ئاوی کوردستانمان خـواردەوە، لە بەروبـوومی خـاكی کوردستانمان خـوارد.
بۆیە کوردستان و هەموو شتێکی کوردستانمان لا پیرۆزە. کوردستان نیشتمانی یەکەمی ئێمەیە، زۆر خۆشـمان دەوێ و لامان شیرینە، هەمیشە لە بیرمانە و لە ناو دڵمان دایە.
مریـەم: ئەمانە تێگـەیـشـتم، ئـەی ئـەو خـۆڵـەی کوردسـتانتان بـۆ لـەوێ دانـاوە؟
دایـکی: تا رۆژانـە بیبینین و هـەمیشە کوردستان لە بـیر و خەیـاڵ و بەرچـاومان بێـت.
مریـەم: لە ئەمڕۆوە کوردستان نیشتمانی یەکەمی منیشە، خۆشـم دەوێت، ئەو خۆڵەشم خۆشـدەوێـت.
دایکی (لە باوەشی کرد و سی و چـوار ماچی کـرد): دەمخـۆش کچـە ژیـر و زیـرەکـم.


رەزا شـوان
نەرویـج: ٢٠١٩

Previous
Next

Leave a Reply