Skip to Content

سپێده‌ی ئاواره‌یی … شه‌ونم زه‌ندی

سپێده‌ی ئاواره‌یی … شه‌ونم زه‌ندی

Closed
by كانونی یه‌كه‌م 24, 2019 General, Poems


له‌ شه‌وه‌ … یه‌ڵداییه‌كانی قه‌ده‌ره‌وه‌
ڕۆحه‌ په‌رته‌وازه‌كان
به‌ دوای سێبه‌ری ئه‌و چرایانه‌ی
كه‌ زه‌مه‌نێكه‌
بێ تروسكه‌ كراون … وێڵن ..
هه‌نگاوه‌كانی ته‌مه‌ن ..
له‌ بازنه‌ی ” به‌ زه‌مه‌ن بوون ”
هه‌ره‌س هێنن
مه‌راسیمی حوزنه‌ و
له‌ میانی ” بڕوا و بێ قه‌ناعه‌تیدا ” … گومانه‌كان
هه‌ره‌سمان پێ دێنن
گومان له‌ : بوونێك بێ ویستی خۆمان ،
له‌ : ناو و سێبه‌ری خۆمان ،
گومان له‌ : به‌ یه‌ك نه‌گه‌یشتنی هێڵه‌ ته‌ریبه‌كان،
له‌ : قه‌د بوونه‌وه‌ی لاپه‌ڕه‌ی یاده‌كان .
بێ ده‌نگییه‌ك .. خۆی ده‌نوێنێ ،
دوورگه‌ی خه‌ون
كه‌ كۆنترۆڵی ئه‌م عه‌شقستانه‌ی پێ ناكرێ ؟
عه‌شق بۆ خاك ،
گول ..،
باران ..
تروسكه‌كان … ده‌تارێنێ
ته‌متومانی ڕۆح
له‌ سپێده‌ی ئاواره‌یی ،
حه‌زه‌ سه‌وزه‌كانیش… له‌ بازنه‌ی بێ ڕه‌نگیا ..
بۆ په‌یژه‌كانی زه‌مه‌نێك له‌ مه‌نفا ،،..

                                                                      1 / 7 / 1999

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish