Skip to Content

بۆ سۆسن … شیعری شه‌هید: زانا حه‌مزه‌ مه‌حموود

بۆ سۆسن … شیعری شه‌هید: زانا حه‌مزه‌ مه‌حموود

Closed
by كانونی یه‌كه‌م 24, 2019 General, Poems


ئه‌ی سۆسنه‌ كه‌ڵه‌گه‌ته‌ به‌نازه‌كه‌م
ئه‌مشه‌و … بێ تۆ خه‌وم نایێ
وه‌ره‌ گیانه‌ … كاكۆڵم بكه‌ به‌ڕه‌فته‌
به‌ سه‌رته‌وه‌ی بئاڵێنه‌
په‌نجه‌م بكه‌ به‌ به‌ركۆژه‌
له‌ سینه‌تی توند گرێده‌
به‌ ئازاری بناڵێنه‌
وه‌ك ڕه‌گی دار
بێخ له‌ نێو سینگم داكوته‌
با باڵنده‌ی حه‌ز و خه‌تا
هێلانه‌یان له‌ سه‌ر چێ كه‌ن
چ نابێ گه‌ر …
بۆ تاكه‌ ساتێكی هه‌تیوو
كوڵمت بكه‌م به‌ سێوێكی … نه‌رم و گه‌ییوو
چه‌نده‌ خۆشه‌ .. گه‌ر پێكه‌وه‌
گڕی نه‌فره‌تمان تێ به‌ر ده‌ن
***
وه‌ره‌ سۆسن
با له‌ به‌ر تیشكی ئه‌م خۆره‌ ئۆقره‌ گیره‌
گه‌نده‌مووی لا مل و گوێت
بسووتێنم
هۆ سۆسنێ
تۆ چیت داوه‌ له‌ ترس و بیم ؟
كه‌ی مناڵی ته‌ڕی وه‌ك تۆ
به‌ ئاگری ڕق ده‌زانێ؟
سوێندیش ده‌خۆم
تۆ له‌ هه‌مووان … دڵكێشتری
له‌ هه‌مووشیان به‌ ئێش تری ..
**
خه‌مت قورسه‌
ئه‌میش به‌نده‌ی سڵ و ترسه‌
ده‌پێم بلێ … ئه‌ی سۆسنه‌ بێ ناوه‌كه‌م
كه‌ی بێ و
منیش به‌ ئاشكرا … ماچت بكه‌م ؟
**
شێته‌ ئه‌وه‌ی …. دڵی خۆشه‌
تۆیش بسوتێی
شێته‌ ئه‌وه‌ی وا ئه‌زانێ
تۆ په‌یامی .. ئه‌شق و خه‌تای
با هه‌ر بڵێن
هه‌ر تۆ له‌وان پاكژتری
تۆ له‌ هه‌مووان دڵگه‌شتری ..

……………………………………………………………………..

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish