Skip to Content

بۆ چنار و ھێمن … عەلی حەمەڕەشید  بەرزنجی

بۆ چنار و ھێمن … عەلی حەمەڕەشید بەرزنجی

Closed

چنار و ھێمن ئەو دوو منداڵەی کە لە شاری سیدێصدق لە زستان دا ٧/١/١٩٩٢ گیانی بەفر ئاسایان تێکەڵ بەفر و سەرمای زستان بوو ساڵانە لە سیدصادق مەراسیمی تایبەتیان بۆ سازدەکرێت و یادیان دەکەنەوە و بوون بە سونبولی پەروەردە و زانست لەو شارەدا و تەنانەت بەڕێوەبەرێتی پەروەردەی سیدصادق باخچەیەکی منداڵانیان بەناوی(ھێمن) ەوە ناو ناوە و قوتابخانەیەکیشیان بەناوی(چنار)ەوە ناو ناوە ، کە ئەمەش بە کارێکی جوان دادەنرێت ..ھەروەھا پەیکەرێکی تایبەتیشیان لەلایەن ھونەرمەند زاھیر صدیقەوە بۆ دروست کراوە و لە باخچەیەکدا دانراوە کە ساڵانە لەلای ئەو پەیکەرەوە یادەکە ئەنجام دەدرێت.لەگەڵ ئەوەشدا وێنەیەکی گەورەیان کە وەک پەیکەرەکەیە لەگشت قوتابخانە و باخچە و خوێندنگەکانی سیدصادق دا ھەیە و لە شوێنێکی شیاودا دانراوە….منیش کە ساڵانێک وەک سەرپەرشتیاری پەروەردەیی لە سیدێادق و وەک شاعیرێک لەگەڵ ئەوەی کە ساڵانە بەشداری ئەو یادانەم بەھۆنراوەکانم کردووە و بەشداربووم ،ساڵی ٢٠١٩ کتێبێکم بەناوی (چنار و ھێمن) بەھاوکاری کتێبخانەی بێخود لە سیدصادق بەچاپ گەیاند کە بێجگە لە ئۆپەرێتێکی تایبەت بۆ چنار و ھێمن کۆمەڵێک ھۆنراوەی پەروەردەیی تریشی تایبەت بە قوتابخانە و باخچەکانی سیدصادق تێدا بوو ،ئەمساڵیش ئەم ھۆنراوەیەم ھەر بۆ ئەو یادە نوسیوە.

بۆ چنار و ھێمن

ئەو کاتانەی لەم شارە بووم……ھەرچەند ماندوو بووم و سەرقاڵ
چیرۆک و ھــــــۆنراوەی جوانم……دەکرد بە دیـــاری بۆ منداڵ
بۆ ھەر شوێنێک بچوومایە……….باخچە یاخود قوتابخانە
حەزمدەکرد دڵخۆشیان کەم………..ئاسوودەبووم بەو کارانە
ھەرکە دەچووم بۆ سەردانی……….باخچەی منداڵانی ھێمن
یاخود قوتابخانەی چنار……….خەمێک دەڕژایە دڵی من
لەنێو حەوشە و گۆڕەپانا………..باڵای ھێمن وەکو چنار
بووبوون بەتابلۆی نێو بەفر و…..خەمی قورسی گشت خەڵکی شار
چیرۆکێک بوون بێ کۆتایی…….ئازار ئامێز و پڕ لە سۆ
لەگەڵ یەکەم ھەنگاومدا…….بەشیرینی دەھاتنە گۆ
باسی خۆیان بۆ دەکردم…….وەکو دوو فریشتەی بەستوو
کە چۆن بوون بە سونبولی شار…….ناویان چووەتە نێو مێژوو
ئەوان ئێستا بەتەواوی……سونبولی دیاری زانستن
لەنێو شاری سەید سادق دا…..دوو ئەستێرەن گەش و مەزن
دەیان چرپاند بە گوێچکەمدا…….بابیزانن درشت و ورد
ئیتر ئاوارە نەبنەوە………منداڵانی ئازیزی کورد


١/١/٢٠٢٠
عەلی حەمەڕەشید بەرزنجی
سلێمانی ٢/١/٢٠٢٠

Previous
Next