Skip to Content

دووبارە قەرزوەرگرتنەوەیەک …  بەکر ئەحمەد

دووبارە قەرزوەرگرتنەوەیەک … بەکر ئەحمەد

Closed
by January 2, 2020 General, Poems

کە لە دارستانەکە دێمەدەر
نیگام بە ترۆپکی بەرزی سنەوبەردا ‌هەلدەواسم،
پەنجەکانم لە دەووری تەڕترین گەلا و گوڵی بن بەردێکدا جێدەهێڵم
گویچکەکانم دەدەمەدەست
گەرووی پڕ ئاوازی بەرزی
باڵندەی سەر بەردە گەورەی نزیک داربەرووە تەنیاکە.

کە لە دارستانەکە دێمەدەر
من هەمیشە ، بۆ ساتێکیش بیرم ناچێت
نیگاو پەنجە و گوێچکەکانم لەو شوێنانە بەجێبێڵم.

ئاخر وەختێک، میلی سەعات راومدەنێ و
پاسەکەی شار تین دەداتە بەرهەنگاوم
تا خێراتر بگەمە ناو ئاپۆرەی ناو گەراجەکە
کاتێک کەللەی سەر پردەبێ لە ژمارە و
لیستی درێژی پێویستە و دەبێ بکرێ
ئەو ساتانە
نیگای سەوزی لای سنەوبەر، پەنچەی تەڕی دەوری گوڵ و
گوێچکەی تەژی لە جرییوە
بۆ چاو و پەنجە و گوێچکەی خۆم
دووبارە وەردەگرمەوە و بۆ چەند ساتێک قەرزییاندەکەم
تا هیچ نەبێ
ماوەی نێوان ماڵ و دواویستگەی پاسەکە، تەنها نەبم
تا بە نیگایەکی قەرسیلی و نەرمی گەلا لە پەنجەدا و
گویێەکی پڕ لە نەغمەوە، ڕێگا تەی کەم.

20191231
بەکر ئەحمەد

Previous
Next