Skip to Content

چیتر ماوە بۆ چاوەڕوانیی ؟!!…نەوازد بەندی

چیتر ماوە بۆ چاوەڕوانیی ؟!!…نەوازد بەندی

Closed
by January 7, 2020 General, Poems

بۆچی نایەی
گەڵا ھەڵوەریوەکان و
گەڵا نیوە سووتاوەکان
کۆکەینەوە و
درەختێکی لێ دروستکەین
بمابناتەوە بۆ بەھار ؟
بۆچی .. بۆ چی ڕازی نابی
ھەنگاوە بێ ئامانجەکان
ھەنگاوە بێ ئاڕاستەکان
کە لە جادەی تینوێتی و
برسێتی نامان ،
کۆ کەینەوە و
ڕێگایەکی لێ دروستکەین
بمانگەیەنێتە ڕووبار
بمانگەیەنێتەوە ماڵی نان ؟

ئێ لەبەرچی ڕازی نابی ،
ئەم پارچە پڕ لە ئازارەی
ناویان لێ ناوە نیشتمان ،
ئەم کەلە سەر و
چوار پەلە
ستەمدیدەیەی
کە ناویان ناوە ئینسان ،
تەڵاق بەین و
بڕۆینەوە
ماڵی خۆمان ؟

بڕوانە
ھەرچی ھۆنراوە و
چۆلەکە و
خاڵخاڵۆکە و
حاجی لەقلەق ھەبوو ،
تەڵاقیان دا و
وازیان ھێنا
لە شەڕ و
ئاشتی و
دانوستان
وازیان ھێنا
لە ئەگەری چاکسازی و
کابینەی تازە و
شەڕە کورسی ناو پەرلەمان
وازیان ھێنا لە درامای
بێ سەرەتا و
بێ کۆتایی
قات و قڕی و
ھەواڵی بە پەلە و
قەیران ؟

تا کەی تێر نابی
لە ھێزی فڵان چەتە و
لە چاکسازیی فڵان مافیا و
لە شەڕی فیسار نامەرد و
لە پاکسازی فڵان شەیتان ؟

تەمەن ئەوەندەی نەماوە
مابیشێتی
فرۆشراوە
بە کۆمپانیای شەڕ و
باج و
سندوقی دراوی
نێودەوڵەتی و
نەوت و
کۆبوونەوەی
حیزبی و
مەزھەبی و
میزاجی گەوجی
کۆمەڵێ گەمژەی
بێ ویژدان

Previous
Next