Skip to Content

شیعری نوێی جیهانی  … لە ئینگلیزییەوە: ئازاد ئەسوەد

شیعری نوێی جیهانی … لە ئینگلیزییەوە: ئازاد ئەسوەد

Closed
by January 23, 2020 General, Poems

ڤالەنتاین
Valentine

کارۆڵان دەفی
شازادەی شاعیرانی بەریتانیا

Carol Ann Duffy (1956)
Poet Laureate (2009-2019)

گوڵێکی سوور نا، دڵێکی ئاوریشم نا
من سەلکە پیازێکت پێشکەش ئەکەم
مانگەو لە کاغەزێکی قاوەییدا پێچراوە
بەڵێنی تریفە ئەدات
وەك لەسەرخۆ داکەندنی کراسی عیشق

ئا لێرەدا
وەك عاشقێك
بە فرمێسك چاوت کوێر ئەکات
ڕەنگدانەوەت ئەکاتە
فۆتۆیەكی لەریوی خەم

ئەمەوێ ڕاستگۆ بم

کارتی شەنگ نا، پەیامی ماچ نا
من سەلکە پیازێکت پێشکەش ئەکەم
ماچی تفتی لەسەر لێوەکانتدا هەر ئەمێنێ
ئەمەکدارانەو خۆویستانە،
وەك من و تۆ هەتا هەین

ها وەریگرە
گەر بتەوێ
ئەتوانی لە بازنە پلاتینییەکانی، ئەڵقەی هاوسەرگیریی دروست بکەیت
کوشندەیە
بۆنی بە پەنجەکانتەوە
بە چەقۆکەتەوە ئەنووسێ.

مسز داڕوین
Mrs Darwin
7ی نیسانی 1852
چووین بۆ باخچەی ئاژەڵان
پێم وت-
ئەو چیمپانزییەی ئەولا تۆم بیر ئەخاتەوە.

Carol Ann Duffy, Collected Poems, expanded edition, Picador, London, 2019

هاوار
The Shout

سایمن ئارمیتج
شازادەی شاعیرانی بەریتانیا
Simon Armitage (1963)
Poet Laureate 2019

من و ئەو کوڕەی نە ناویم لەیاد ماوە
نە ڕوخساری
پێکەوە لە پۆل دەرئەچووین
بۆ گۆڕەپانی قوتابخانە
مەودای دەنگی مرۆڤمان تاقی ئەکردەوە:
ئەو ئەبوو بە هەموو دەنگی خۆی هاوار بکات
منیش لەوبەری گردۆڵکەکەوە
وەك ئاماژەیەک کە دەنگی بڕی کردووە
قۆڵم هەڵئەبڕی.
ئەو لە پارکەکەوە هاواری ئەکرد
من قۆڵم هەڵئەبڕی
ئەو لەوسەری ڕێگاوە
لە دامێنی گردەکەوە
لەودیو تابلۆی ئاگاداریی مەزرای “فرێتوێڵز فاڕم”ەوە هاواری ئەکرد
من قۆڵم هەڵئەبڕی

ساڵ هات و چوو، ئەو لە چاو ون بوو
وا بیست ساڵە لەژێر خاکە
لە ڕۆژاوای ئۆستراڵیا، فیشەکێك ناودەمی هەڵدڕی

ئەی ئەو کوڕەی نە ناویم لەیاد ماوە نە ڕوخساری
ئێستا ئەتوانی بێدەنگ بی، من هێشتا گوێم لە هاوارتە

Simon Armitage, Paper Aeroplane, Selected Poems, Updated Edition, Faber & Faber Ltd, 2019

پۆستکارتی سەردەمی لاوێتیمان

شاعیری ڕۆمانی/ ئیسڕائیلی: دان پاگیس
Dan Pagis (1930-1986)

لەسەر پیانۆکەتدا بیتهۆڤنێكی گەچ وەستاوەو
بیر ئەکاتەوە: سوپاس بۆ خوا کە من کەڕم.
تەنانەت چۆلەکەکانی گەڕەکیش ئەم بەیانییە نەشاز ئەخوێنن.

تەنیا کۆنە فرۆشە کوردەکە لەگەڵ خۆیدا ڕاستگۆیە
بە شەلەشەل شەقام ئەپێوێ و
بە عیبرییەکی تێکشکاو هاوار ئەکا “جلە کۆن”!

بەڵام گرنگ نییە. لەنێو دەنگە تێکچڕژاوەکانەوە، تەنیا دەنگێك بەرز ئەبێتەوە.
گوڵە زەنگێك لە ژوورسەرماندا
چەماوەتەوە.

The Ecco Anthology of International Poetry, Edited by Ilya Kaminsky and Susan Harris, Words Without Borders, Harper Collins Publishers, New York, 2010

خۆڵەمێش

شاعیری سێڕبی/ ڤاسکۆ پۆپا
Vasko Popa (1922 – 1991)


هەندێك شەون هەندێکیش ئەستێرەن

هەموو شەوێك ئەستێرەی خۆی دائەگیرسێنێ و
سەمایەکی ڕەش بە دەوریدا ئەکات
هەتا ئەستێرە ئەسووتێ

پاشان شەوەکان لەیەك جیا ئەبنەوە
هەندێك ئەبن بە ئەستێرەو
هەندێکیش هەر بە شەویی ئەمێننەوە

دیسان، هەموو شەوێك ئەستێرەی خۆی دائەگیرسێنێ و
سەمایەکی ڕەشی بە دەوردا ئەکات
هەتا ئەستێرە ئەسووتێ

دوا شەو هەم ئەبێ بە ئەستێرەو هەم بە شەو
خۆی خۆی دائەگیرسێنێ و
بە دەوری خۆیدا سەمای ڕەش ئەکات
Vasko Popa, Complete Poems, Translated by Anne Pennington, Anvil Press Poetry Ltd, London, 2011

پیرەمێردەکان
Old Men

شاعیری ئەمێرکی/ ئۆگدن ناش
Ogden Nash (1902-1971)


خەڵك چاوەڕێی مردنی پیرەمێردەکان ئەکەن
شیوەنیان بۆ ناگێڕن
پیرەمێردەکان جیاوازن. خەڵك بە چاوی سەرسامییەوە
تێیان ئەڕوانن کاتێ..
خەڵك بە ساردییەوە تێیان ئەڕوانن؛
بەڵام کاتێ پیرەمێردێك ئەمرێ پیرەمێردەکان پێی ئەزانن

ئەختەبووت
The Octopus

تکات لێ ئەکەم، ئەختەبووت، پێم بڵێ،
ئا ئەو شتانە قۆڵ و بازوون ،یان قاچن؟
سەرم لێت سوڕماوە، ئەختەبووت؛
لەبری تۆ بم، بە خۆم ئەڵێم ئێمە.

ئەژنۆ
The Knee

شاعیری ئەڵمانی/ کریستیان مۆڕگنشتێرن
Christian Morgenstern (1871-1914)


ئەژنۆیەك بە دنیادا ئەگەڕێ
تەنیا ئەژنۆیەو هیچی دی
دەوار نییە؛ درەخت نییە؛
تەنیا ئەژنۆیەو هیچی دی

پیاوێك هەبوو لە جەنگدا بوو
زیاد لە پێویست کوژرا، بە شێوەیەکی دڕندانە کوژرا
تەنیا ئەژنۆی دەرباز بوو، بێ ئەوەی زیانی پێ بگات
بێگەرد، وەك موفەڕکی قەدیسێك

لەوساوە بە تەنها جیهان تەی ئەکات
ئێستا، تەنیا، ئەژنۆیە
نە دەوارە؛ نە درەخت؛
تەنیا ئەژنۆیەو هیچی دی

The Rattle Bag, edited by Seamus Heaney and Ted Hughes, Faber and Faber, UK, Norwich, reprinted 1984

کە بیستویەك ساڵان بووم
When I was Twenty-One
شاعیری کەنەدی/ ویڵیەم کلیبێك
William J. Klebeck


کاتێ بیستویەك ساڵان بووم
هەموو کوڕانیان ڕاپێچی جەنگ کردو، هەموو کوژران
من نەبێ، بە پێی خوارو خێچ، لە ماڵدا دانیشتم

سی ساڵ پاشترمن لەمە گەیشتم
کاتێ لەگەڵ برازاکەمدا، لەنێو جەنگەڵدا پیاسەمان ئەکرد
تا گەیشتینە چۆڵەوانییەك، دارێکی چەماوەی تەنیاو زیندوومان بینی
لە گۆڕستانێکی پڕ لە بنچکە داردا
برازاکەم دەستی بۆ دارە چەماوەکە درێژ کرد:
“بڕوانە ئەو دارە چەند بێکەڵکە”
منیش، بێ بیرکردنەوە، وەڵامم دایەوە
“بڕوانە ئەو دارە چەند پیرە”

چوار بەچکە پڵینگ
Four Little Tigers

شاعیری ئەمێرکی/ فرانك جەیکەبس
Frank Jacobs (1929)


چوار بەچکە پڵینگ
لەژێر دارێکدا دانیشتوون
یەکێکیان کرا بە پاڵتۆی خانمێك
ئێستا سێیان ماوە

سێ بەچکە پڵینگ
لەژێر ئاسمانی شیندا
یەکێکیان بوو بە فەرشی دەوڵەمەندێك
ئێستا دوانیاین ماوە

دوو بەچکە پڵینگ
لەبەر خۆرەتاودا نووستوون
سەری یەکێکیان بوو بە خەڵاتی ڕاوکەرێك
ئێستا یەکێکیان ماوە

بەچکە پڵینگێك
چاوەڕوانی چارەنووسی خۆی ئەکا
ئووپس! ئەو دەسپێشخەریی کردو کابرای ڕاوچیی کوشت
ئاخۆ تۆ بەختەوەر نیت؟

A World of Poetry, Selected by Michael Rosen, London 1991

ترس
Fear

چاڕڵز سیمیك/ شاعیری سێڕبی – ئەمێرکی
Charles Simic (1938)


ترس لە کەسێکەوە بۆ کەسێکی دی ئەڕوات
بێ ئەوەی پێ بزانن
وەك گواستنەوەی لەرینەوە لە گەڵایەکەوە بۆ گەڵایەکی دی

لە ناکاو هەموو درەخت ئەکەوێتە لەرینەوە
بێ ئەوەی نیشانەی با هەبێ
Being Human, Bloodaxe Books Ltd, Northumberland, UK, 2015

پووشکە بە قنگە
Dragonfly

گاری سنایدەر/ شاعیری ئەمێرکی
Gary Snyder (1930)


پووشکە بە قنگەی
لەناو بەفردا مردوو
چۆن گەیشتیتە ئەم بەرزاییە
ئاخۆ بەر لەوەی بمری
بەچکە ئاوڵەمەکەت
لە گۆماوی چیایەکدا جێ هێشتووە
The Book of Luminous Things, An International Anthology of Poetry, edited with an introduction by Czelaw Milosz, First Harvest edition USA, 1998

ژن و مێردە پیرەکەی دراوسێمان
The Old Couple Next Door

چاڕڵز بوکۆوسکی/ شاعیری ئەمێرکی
Charles Bukowski (1920-1994)

ژن و مێردێکی پیر بوون
کاتی نووستن ژنە سەری ئەخستە لایەکی سیسەمەکە
پیرەمێردیش سەری ئەخستە ئەولای دی
پێیان وابوو گەر کەسێك بە نیازی کوشتنیان
سەر بە ماڵیاندا بکات
هیچ نەبێ یەکێکیان چانسی دەرباز بوونی هەبێ.

کە پیرەمێرد مرد
ژنە، بووکەڵەیەکی سیخناخی بەقەد باڵای مێردەکەی
دروست کردو
کاتی نووستن سەری خستە لایەکی سیسەم و
سەری بووکەڵەی خستە لایەکەی دی.

هەروەك جارانیش
شەوانە هیچ نەبێ جارێك،
لەخەو هەڵئەستاو بە تووڕەییەوە هاواری بەسەردا ئەکرد:
“بەس بپڕخێنە!”

Charles Bukowski, Come On In, New Poems, Ecco, New York, 2006

Previous
Next