Skip to Content

بوونی پەکەکە لە باشوری کوردستاندا شەرعی نییە، بەڵام بوونی سوپای داگیرکەری تورکیا شەرعییە! .. رەزا شوان

بوونی پەکەکە لە باشوری کوردستاندا شەرعی نییە، بەڵام بوونی سوپای داگیرکەری تورکیا شەرعییە! .. رەزا شوان

Closed
by April 21, 2020 General

رۆژی دوو شەممە (٢٠/ ئەپریل/٢٠٢٠) نێچیرڤان بارزانی، کە شێخ جەعفەر مستەفا و مستەفا سەید قادری لەگەڵدا بوون، لە کۆنگرەیەکی رۆژنامەوانیدا دەربارەی کێشەی (زینی وەرتێ) و بۆردوومانکردنی زینی وەرتێ و کەمپی ئاوارەکان لە مەخموور، لە لایەن فڕۆکە بێفڕۆکەوانەکانی تورکیاوە، کە لەو کەمپەدا خوشک و برا کوردە ئاوارە راونراوەکانی باکووری کوردستان لێی نيشتەجێن، ئەو بۆردوومانە بووە هۆی شەهید بوونی چـوار کوردی ژن و منـداڵ و برینداربوونی چەند کەسێکی سڤیلی بێتاوان.. کەچی راگەیاندنە بەکرێگیراوەکانی تورکیا لە باشووری کوردستاندا، راستییەکەیان چەواشەکردەوە.. وا رایاگەیاند (لەم بۆردوومانەدا چوار گەریلا) ی پەکەکە کوژران.

لەو کۆنگرەیەدا، رۆژنامەنووسەکان، کە بە زۆری ئەو رۆژنامەنووسانە بانگکرابوون کە پاشکۆی حیزبە دەسەڵاتدارەکان بوون.. دەربارەی پەکەکە و کێشەی زینی وەرتێ و بۆروومان کردنی وەرتێ و کەمپی ئاوارەکانی مەخموور پرسیایان لە نێچیرڤان کرد. نێچیرڤان وەڵامی دانەوە و وتی:”زۆر جار باسمان لەوە کردووە کە بوونی (پەکەکە) لە هەموو کوردستانی عێراق بە شەرعی نازانین” وتیشی:”ئێمە بەشێکین لە عێراق و هەرێمی کوردستانیش لە چوارچێوەی عێراقدا، دەرفەتی ئەوە نادات بە هیچ شێوەیەک هێزی دیکە ببێتە هۆکاری کێشە بۆ دراوسێکانمان” وتیشی”کە پەکەکە بیەوێ یارمەتی هەرێم بدات، ئەوەیە کە دەبێ هەرێمی کوردستان چۆڵ بکات” نێچیرڤان بارزانی پاکانەی بۆ تاوانەکانی تورکیا کرد و پاساوی بۆ بۆردوومانەکەی کەمپی پەنابەرانی مەخموور هێنایەوە، وتی:”مەخمـوور لەژێر کۆنترۆڵی دەسەڵاتی هەرێمی کوردستاندا نییە، لەژێر دەسەڵاتی عێراقی فیدراڵییە، واتە ئەوە پەیوەندی بە هەرێمی کوردستانەوە نییە”
من پەکەکە نیم و بە ناوی ئەوانیشەوە قسە ناکەم، ئەوان خۆیان دەتوانن وەڵامی قسەکانی نێچیرڤان بدەنەوە یا نەدەنەوە.. بەڵام من وەکو کوردێکی کوردستان پەروەر و خەمخۆرێکێ گەلەکەم قسەدەکەم، وەڵامی قسەکانی نێچیرڤان دەدەمەوە.
با نێچیرڤان بارزانی باش ئەوە بزانێت کە کوردستان لە ئەوپەڕی باکوورییەوە تا دەگاتە ئەوپەڕی باشووری.. لە ئەوپەڕی رۆژهەڵاتییەوە تا دەگاتە ئەوپەڕی رۆژئاوای.. نیشتمانی هەموو کوردێکی دڵسۆزە و موڵک و تاپۆی هیچ هـۆز و بنەماڵە و حیزبێک نییە، شوێن و نيشمانی شەرعی هەموو کوردستانپەروەرێکە.. تەنیا شوێنی شەرعی ناپاکان و خۆفرۆشان و کوردستان فرۆشان و جاشە بەکرێگیراوەکان نییە.
لە نێچیرڤان دەپرسین: ئایا بوونی بە هەزاران سەربازی تورکیا، کە زیاتر لە سی مۆڵگەی سەربازییان لە پارێزگای دهۆک و هەولێر لە باشووری کوردستاندا هەیە.. بە لاتانەوە شەرعـییە؟ وێراوتانە جارێک لە جاران، تەنانەت گەر لەژێری لێویشەوە بێت، ئەوە بڵێن، کە بوونی لەشکری تورکیای داگیرکەر لە سەر خاکی باشووری کوردستان و لە رۆژئاوای کوردستاندا ناشەرعییە..؟؟ رۆژی لە رۆژان داواتان لە تورکیا کردووە کە سەربازەکانیان لە باشووری کوردستاندا بکێشنەوە..؟ بێگومان نەخێر، ئێوە چۆن کفری وا دەکەن.. کەچی بە پەکەکە دەڵێن دەبێ هەرێمی کوردستان چۆڵ بکات.. ئەم قسەیەت تەنیا لە بەرژەوەندی داگیرکەران و دوژمنانی کورد و کوردستان دایە.
هێچ کاتێکیش گوێم لێتان نەبووە، کە بە فەرمی سەرکۆنەی بۆردوومان و تاوانانەکانی تورکیا بکەن، بە پێچەوانەوە، کەناڵە بەکرێگیراوەکانی تورکیا لە باشووری کوردستاندا، کە کەسانێکی خۆفرۆش بەڕێوەیان دەبەن، بە زەردەخەنەوە رایان دەگان” فڕۆکەکانی تورکیا بارەگای پەکەکەیان لە مەخموور بۆردوومان کرد”. لەو بڕوایەدام گەر چاوساغی و سیخوڕی بۆ تورکیا نەکرێت، تورکیا بە وردی ئەو زانیاریانە دەربارەی جموجووڵی پەکەکە نازانێت.. دەسەڵاتی هەرێمی کوردستان، ئاگاداری سوڕانەوەی فڕۆکە جەنگی و فڕۆکە بێفڕۆکەوانەکانی تورکیان، بەسەر ئاسمانی باشووری کوردستاندا.
ئەی بۆ دەم و گوێ و چاوتان دەگرن، کە ڕۆژانە فڕۆکە جەنگییەکانی تورکیا، گوندەکانی باشووری کوردستان بۆردوومان دەکەن و منداڵ و ژن و لاوی کورد شەهـید دەکەن و مەڕ و ماڵاتیان دەکوژن و باخ و دارستانەکانی کوردستان دەسووتێنن، ئەم گوندنشینانە نە پەکەکەن و نە بارەگاکانی پەکەکەشیان لێوە نزیکن.. ئەی بۆ ئەم تاوانانە نامەردییانە تورکیا سەرکۆنە ناکەن؟! راگەیاندنەکانی ئێوە، زۆر بێ شەرمانە، دەڵێن: ئەمڕۆ فرۆکە جەنگییەکانی تورکیا لە (فڵانە) شوێندا، بارەگاکانی پەکەکەیان بۆردوومان کرد.. ناڵێن گوندەکانیان بۆردومان کرد.. دەڵێن چەند گەریلایەکی پەکەکەیان کوشت، ناڵین چەند ژن و منداڵێکی کوردیان شەهید کرد، بەمەش شەرعییەت بەم تاوانانەی تورکیا دەدەن.
ئەی بوونی بە دەیان میت و هەواڵگری و سیخووڕی تورکیا، لە شارەکانی هەولێر و دهۆک و سۆران و کەرکووک کە بە ئاشکرا دێن و دەچن بە شەرعی دەزانن؟ لە هەولێری پایتەختدا، مەشق بە جاشی کورد و بە بەرەی تورکمانی دەکەن؟
نێچیرڤان وتیشی:”ئێمە بەشێکین لە عێراق و هەرێمی کوردستانیش لە چوارچێوەی عێراقدا، دەرفەتی ئەوە نادات کە بە هيچ شێوەیەک هێزی دیکە ببێتە هۆکاری کێشە بۆ دراوسێکانمان” ئێوە بەشێکن لە کام عێراق؟ لەو عێراقەی کە شاری هەڵەبجە و بە دەیان شوێنی تری کوردستانیان کیمیاباران کرد؟ لەو عێراقەی کە کوردیان ئەنفال کرد؟ لەو عێراقەی کە هەشت هەزار بارزانی و بیست هەزار کوردی فەیلیان زیندەبەچاڵ چکەی کردن؟ لەو عێراقەی کە پێنج هەزار گوند و شارۆچکەی کوردستانیان وێران کرد؟ ئێوە لە کوردستانی سەربەخۆوە، هاتنە سەر ئەوەی کە بڵێن ئێمە بەشێکین لەو عێراقەی کە (لە سەدا پەنجا و یەک)ی خاکی باشووری کوردستانیان داگیرکردووە.

کامانەن (دراوسێکانمان) تورکیا و ئێرانی داگیرکەرانی کوردستان، کە بە هەزاران کوردیان شەهیدکردووین و دەستەیان بە خوێنی بێتاوانانی کورد سوورن، رۆژ نییە کە لاوێکی کورد لە سێدارە نەدەن.. داگیرکەرانی کوردستان بە دراوسێکانمان دەزانێ؟
نێچیرڤان، لە وەڵامی پرسیاری رۆژنامە نووسێکدا، وتی”مەخموور لەژێر کۆنترۆڵی دەسەڵاتی هەرێمی کوردستاندا نییە، لەژێر کۆنترۆڵی حکومەتی فیدراڵیدایە، واتە ئەوە پەیوەندی بە هەرێمی کوردستانەوە نییە..” دەپرسین، کێ کەرکووک و خانەقین و دوزخورماتوو و پردێ و مەخموور و شەنگالی دۆڕاندن و خستیانیانە بن دەستی ئەو عێراقەی کە ئێوە بەشێکن لێی؟ ئەم قسەکەتان ئەوە دەگەیەنێت، حەقیشتان بەسەر شاری کەرکووک و شارە کوردستانییە داگیرکراوەکانی تری باشووری کوردستانەوە نییە.. کەواتە بۆ کوردتان لەو ناوچە کوردستانییانە بە گورگان خوارد دا..؟؟
ئەی کە ئەردۆگانی داگیرکەر، وتی:”مووسڵ و کەرکووک و هەولـێر، دەبێ بگەڕێنەوە
بۆ باوەشی تورکیا” گەر تەنیا بە قسەش بـوایە، بۆ هیچ قسەیەکتان نەکـرد؟
من دژی مافەکانی تورکمان نیم، بەڵام هەموو تورکمانەکان لە هەولێردا کۆبکرێنەوە، پڕی دوو چارۆگە نابن، دوو کورسی تەوایشیان نەهێنا، ئێوەی پارتی بۆ بەرژەوەندی و بۆ هاودەنگی خۆتان جێگری سەرۆکی پەرلەمان و وەزێرێکی هەرێمتان، دا بە بەرەی تورکمانی، کەچی بەرەی تورکمانی تا ئەمڕۆش وشەی کوردستان بەسەر زاریاندا نایە و هەردەمیش دژایەتی مافەکانی کوردیان کردووە و دەکەن، ناشڵێن بە حکومەتی هەرێمی کوردستانیش ناوتان نابەن، بە (السلطە فی شمال العراق) یا بە (حکومة اربیل) ناوتان دەبەن.. ئێوە بۆ بەرژەوەندی خۆتان بۆ زۆرینەی خۆسەپێن لە پەرلەمانی کورستاندا، بوونە بە هاوپەیمانی بەرەی تورکمانی لە هەولێر.. ئەوەتا وەزیـری هەرێمتان (ئایدن مەعروف) کە سەر بە بەرەی تورکمانییە، خۆی و باوکی و باپیریشی لە کوردستان و لە هەولێر لەدایکبوونە و هەوای کوردستانیان هەڵمژیون و بە ئاو و بە نانی کوردستان گەورە بوونە، کەچی ئایدن مەعـروفی بێ ئەمەک، لەم رۆژانەدا شەکری شکاند و قسەکەی ئەردۆگانی جاکاندەوە، بێ شەرمانە لە کەناڵی (تە ڕە تە) ی تورکیدا، وتی:” هەولێر لە ئەسڵدا شارێکی تورکمانییە، بەڵام دیمۆگرافیای گۆڕاوە” مەبەستی لەم قسەیەی ئەوەیە کە کورد هەولێری لە تورکمان داگیرکردووە. ئایدن مەعروف وەزیری هەرێمتان پیاوی تورکیایە (تورک مەن)ە، نە هاوبەستەبوونی بۆ کوردستان هەیە و نە خۆشی بە هاوڵاتییەکی کوردستان دەزانێ، ئایدن دەڵێ:”تورکیا نیشتمانی تورکمانەکانە” ئایە ئەم قسەیەی وەزیرەکەتان، بە شەرعی دەزانیت؟ هیچ وەڵامێکتان دایـەوە؟ ئەی بۆ ناپرسیت کە زیاتر لە (بیست و پێنج) ملیۆن کورد لە باکووری کوردستاندا هەیە، نەک هەر وەزیر و وەزارەتێک، بەڵکو تەنیا بەڕێوەبەرێکی گشتیشیان نییە.. تا ئەمڕۆش تورکیای رەگەزپەرست دانی بە ناسنامەی نەتەوەیی کورد دا نەناوە.. نکووڵی لە بوونی کورد لە باکووری کوردستاندا دەکات.. ئەی ئەمە بە شەرعی دەزانن؟

تورکیا، خەریکە لە کەرکووکی کوردستانی (٦٠٠) کەسی تورکمان لە بەرەی تورکمانی بە جاشی بەکرێ بگرێت، مانگانە (٨٠٠) دولار بە هەر چەکدارێکیان دەدات، دەنگۆی ئەوەش هەیە کە (٢٠٠) چەکداری تورکمانی کەرکووک، لە لایەن سوپای تورکیاوە لە شاری (سلۆپی) کوردستانیدا، مەشق و راهێنانیانی پێ کردوون. مەبەستی تورکیاش لەم چەکدارانەی تورکمان ئەوەیە.. کە بیانکات بە کژی کورد دا، لە کەرکووک د گێچەڵ بە کورد بکەن و کێشە بنێنەوە، تا تورکیا بیکات بە بیانوو، بۆ ناردنی هـێز بۆ کەرکووک. ئەی بۆ باسی ئەمە ناکەن و بۆ ناڵێن ئەمە ناشەرعییە و دەستێوەردانە لە کوردستان؟ ئەمانە و زۆر شتی تر لەبن بەڕەدان، گەر بمانەوێت بیخەینە سەر بەڕە.
وەکو لە سەر دوو سێ کیلۆمەتـرێکی زینی وەرتێ، لە یەکتری مۆڕ و گفبوونەتەوە و یەکتری تاوانبار دەکەن.. ئەی بۆ هەموو لایەکتان جقە و نقەتان لێوە نایات.. بە هیچ کلۆجێک ناوی کەرکووک و شوێنە داگیرکراوەکانی تری باشووری کوردستان ناهێنن؟؟ دەزانن دڵی کوردستان و قودستی کوردستانتان بە چی دەردێک بـردووە؟
تا کەی خۆپەرستی و دەسەڵاتپەرستی..؟؟ تا کەی یاری بە چارەنووسی گەلە داماو و کڵۆڵ و بێدەرتانەکەمانەوە دەکەن..؟؟ نۆکەری تورکیا و ئێران و عـێراق تاکەی..؟؟
لە (هـیتلەر) یان پرسی: هـیچوپوچترین کەس لە ژیانـدا کێـیە؟
وتی:”ئەوانـەن کە یارمەتیان دام بـۆ داگـیرکردنی نیشـتمانەکـانیان”

کوردیش دەڵێت:”هەزار ساڵ بکەیت بێگانە پەرستی.. هەر دەبێت بهێنیت نوشوستي”
٢١/ ئەپریـل/٢٠٢٠

Previous
Next