مانیفێستی عەشق .. 1- تێکست: ستیڤان شەمزینی
بەشی یەکەم..
لە نێوان خۆم و خۆتدا، خۆم لێ ون بووە
تکایە رێگەی دۆزینەوەی خۆمم نیشان مەدە
یەک چرکە پێش ئاشقبوون بهێنەرە پێش چاوی خۆت
دنیا چەند هێمن و ئارام بوو، بەڵام چەندیش بێ تام؟
کاتێک بیر لە ناسکیی تۆ ئەکەمەوە
هەست ئەکەم لە رۆحی ئەفسانەکانەوە هاتوویت
کاتێک تۆم ناسی
وردە وردە دەستم بە توانەوە کرد
کاتێک مەستی ئەشقت بووم
خوێنم بوو بە مرەکەب و
داستانەکەمانی نوسیوە
بمخەرە دێڕێک شیعرتەوە
بۆ ئەوەی هەمیشە لە سۆزتدا بمێنمەوە
خەونت پێوە ئەبینم
وەلێ لە خەونیشدا هەر تامەزرۆتم
چۆن ئەتوانی جێم بهێڵی؟
مەگەر من بەشێک نیم لە تۆ؟
کەس هەیە خۆی لەت بکات؟
نامەوێ بۆ تۆ بمرم
چوونکە بڕیارمدا بۆ تۆ بژیم
مەگەر تۆ ژیانی من نیت؟
ئەگەر ویستت بمکوژیت
نیشانە لە دڵی خۆت بگرەوە
مەگەر مەملەکەتی من دڵی تۆ نییە؟
سێپتەمبەری 2015
دیسامبەری 2016
ئەڵمانیا – سوێد
تێبینی: ئەم پۆستەرانە لە دیوانە شیعری “بەتیشکی عەشقت ئەدرەوشێمەوە” لە ساڵی 2017دا چاپکراون.
