Skip to Content

مه‌یل … سه‌ردار جاف

مه‌یل … سه‌ردار جاف

Closed
by June 29, 2020 General, Poems


من سه‌رشێتم
یا ئاوه‌زم له‌ ده‌ست داوه‌
یا خرۆشانی ناخمه‌ بۆ جه‌ماڵی ئه‌و ئیشقه‌مان
مه‌یلی ژوان تێكشاو و ورد و خاشه‌
بۆته‌ خاشاك
له‌زیلدانا نراوه‌
ئه‌م په‌تایه‌
چ دابڕانێكی قورسه‌
به‌ سه‌ر شیعر و به‌فر و ئاو و رۆحی من و تۆ باریووه‌
شنه‌ی سپێده‌ یاخییه‌
له‌ درزی وڕێنه‌ی خه‌یاڵ
هه‌ڵاتووه‌ و
سه‌رای غوربه‌تی ته‌نیووه‌
تۆ ئاونگی جه‌سته‌ی شنه‌ی
یه‌ك زه‌مه‌نه‌ ئولفه‌تمان لێ ترازاوه‌
بیری ژێمان دابڕاوه‌
له‌م ژاوه‌ژاوه‌ی قومری دڵ
سه‌رگه‌ردانین
تێكئاڵانمان مه‌حاڵێكه‌
هیچ ده‌نگێكی پڕ چریكه‌
میلۆدی بۆ نه‌چڕیووه‌
ئاااای خودایه‌
بشێ حه‌رفه‌كانی ئه‌وین
داستانی ڕسته‌ی دابڕان بنوسنه‌وه‌
چی ئه‌لف و بێی زمان هه‌یه‌
هه‌موو فۆنتی نوسینه‌كان
گه‌ر بیتهۆڤنیش بێته‌وه‌
گشت هه‌ستێكی به‌ وڕێنه‌ی پڕ له‌ هۆره‌
هه‌موو سه‌مای جه‌سته‌ و گه‌ڵا و گول و له‌ره‌ی ده‌ره‌خته‌كان
له‌ ژێر پێی تۆن
جوانی باڵات ناژه‌ننه‌وه‌
كچێ گوڵێ
هه‌موو به‌یانیانی پایته‌خت
ده‌نگێ شه‌رمنده‌یه‌ له‌ باڵاهه‌ڵدانی باڵای جوانیت
قه‌ت په‌ی نابا، به‌ دوندی دڵی شێواو و په‌نهانی تۆ
چ جای رۆژگار تا ئێواره‌
به‌ بسته‌ نازی ناز ناگا
پێم بڵێ ئه‌و كه‌ی ده‌زانێ
له‌ سروشی فۆرمی باڵا و نهێنی شه‌وانی تۆ
تۆ نازانی
مه‌یلم وه‌كو شه‌پۆلی ده‌ریا سه‌رشێته‌
ده‌مكا به‌ با
له‌م ته‌وژمه‌، مه‌یلی زۆره‌
به‌ره‌و رۆخ و ناخی زه‌وی ته‌كان ده‌دا
منیش بۆ رۆحی تۆ ده‌با

Deutschland- Bad Camberg
27 . 06.2020

Previous
Next