تا مەرگ ئەگات، چاوەڕێتم … شيعر/ كاوه عوسمان عومه ر

بڕیارە لە ئاوێنە شکاوەکان،،
پەیکەرێک لە بونێکی تر دروست کەینەوە
بەڵام خۆ چۆڕەی ئافات…
لە گەرووی گەردوونێکە ،،
ناڵەو ئاهەی ئەگاتە گریانی…
ئەوانەی لە سەرابا نیشانەیەکیان نیە ،،
بیانگەیەنە نزرگەی راستی ڕەها ،،
بەردی فەلسەفە، دیواری وشە،،
مەرگی باڵندەیەکیش، وەک مرۆڤی بێ ئۆقرە…
هەڵبەزەو سەمای بێهودەییەتی لە دوکەڵ و تەما،،،
تۆش وەک چاوی گریاناوی مانگێکی بێدار ..
بەدیار تێپەڕینی ئێمەی تارمایی،،
تەماشای ئەستێرە نەخۆشەکان ئەکەیت، هەرکاتێکیش..
پەلەت کرد لە کۆکردنەوەی پارچەی ئاوێنەی،،،
هەناوی جێماوەی رۆژەکان،،،
خوانێک لەسەر گۆڕستانی حەزێك …
وەک گوڵێکی گۆشتینی کەم تەمەن و سیس بوو ئامادەیە،،،
بایەک دەموچاوی کاژێرەکانی بردین،،،
لە ساتەوەختەوە ماوەکانیش….
بەلەمی ئەرخەوانیم بۆ دروست کردی،،،
بەڵام مخابن زەریای خەونیش…
بێ کۆتا نیە،،،
پنتی چارەنوس ڕەشە لەسەر دڵمان ،،
لە زیووی تینۆتی پێک هاتوە،،،
ئەوێک خۆرێکی هەڵگرتوە ،،
تا هەناوی بۆشی پڕ کات لە نوورم،،
هییچ شتێک نیازەکانمان ناکاتەوە…
بەپەپولەکانی بەزەیی ئەوسا، کە کازیوەش…
تاوێک بەفری ڕەشی …
بەسەر پەنجەرەی ئەڤینمانا داکرد،،،
لە سەرمانا چووینەوە ژێر بەیداخی پێستی…
زەردهەڵگەڕاوی ئاسمانێک لە برین ،،
و پچڕانی قەدی بوونمان ،،
بزانە خوێنی هەورەکان نوسینمە ،
گەر ویستت سۆراخم کەی..
دارستانەکانیش سەری خۆیان هەڵگرت،،
کە دیار نەماین لە چاو…
وەک ڕێژنە بارانێکی کەم تەمەن،،
هەربۆیەکیشە ڕۆژانە…
چاوەڕوانی جەنگەکان ئەکەین،،،
تا بگەنە بەردەرگامان،،
شەتڵی ئینجانەکان هەڵکەننەوە و ڕەگی…
بونیشمان لە ژێر زەمینێکی زەڕ و ڕزیو بپچڕێنن،،
تا ئەسپسوارە ڕەشپۆشەکەی مەرگیش ئەگاتە جێ،،
فێر بوین بە سترانی….
سەربازە دۆڕاوەکان نەبێ چاو،،،
دانەخەین لەسەر شەوە..
بێدارەکانی تەنیایی ڕۆح،،
شتێکی زۆر نوێش نیە لە ژێر…
تابلۆی ئافرەتێکا مردن،،
بە ڕەنگی خەم و شادی و خۆڵ و گۆڕ دروستکرا.

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.