Skip to Content

له‌ هه‌زارپه‌س و چه‌می گریانه‌وه‌ بۆ تووژه‌ڵه‌ و ناوزه‌نگ … ئه‌حمه‌د ره‌جه‌ب

له‌ هه‌زارپه‌س و چه‌می گریانه‌وه‌ بۆ تووژه‌ڵه‌ و ناوزه‌نگ … ئه‌حمه‌د ره‌جه‌ب

Closed
by ته‌مموز 6, 2020 General


وانه‌كانی ژیان

‌ سه‌ره‌تای مانگی تشرینی یه‌كه‌م / ئوكتۆبه‌ری 1979 رۆژانێكی سه‌خت و دژوار بوو رژێمی خوێنرێژی دیكتاتۆر سه‌دام حوسه‌ێن و حزبی به‌عسی عه‌ره‌بی خاوه‌نی هێزێكی گه‌وره‌و كوشنده ‌بوون و كه‌ش و هه‌واش رووی له‌ ساردی بوو جلوبه‌رگی ئێمه‌ش هاوینه‌ بوو چه‌كمان كه‌م بوو ئاسان نییه‌‌ مه‌فره‌زه‌یه‌كی 47 كه‌سی به‌ 5 چه‌كه‌وه به‌ چه‌ند قۆناغێك له‌ دامێنی هه‌ورامان و پشتی هه‌ڵه‌بجه‌وه‌ به‌ ناو ئاگرو ئاسن و بنكه‌و ره‌بایه‌كانی سوپاو جاش بگاته‌ توژه‌ڵه‌و ناوزه‌نگ له‌ باكوری شاری قه‌لادزێ وپشتی شاخی مامه‌نده‌ له‌ سه‌ر سنوری عێراق ـ ئێران.
قۆناغی یه‌كه‌م : فه‌رمانده‌ی مه‌فره‌زه‌كه‌ له‌لایه‌ن مه‌كته‌بی عه‌سكه‌ری بنكه‌ی پێشمه‌رگه‌كانی حزب له‌ ناوچه‌ی هه‌ورامان ده‌ستنیشان كراو هاورێ ته‌وفیقی حاجی بوو، به‌یانی زوو كه‌وتینه‌ری وله‌ پاش چه‌ند كاتژمێرێك گه‌یشتینه‌ هاوار، هاوار یه‌كێكه‌ له‌ جوانترین شوێنه‌كانی كوردستان و، به‌عسییه‌كان ئه‌م به‌هه‌شته‌یان تێكدابوو، له‌ هاوار پشوویه‌كی باشمانداو له‌ خواردنی گوێزو هه‌نارو میوه‌ی تر دریغیمان نه‌كردو، له‌ پاش نیوه‌رۆ خۆمان ئاماده‌ كردو هاورێ ته‌وفیق وتی : ژماره‌مان زۆره‌و چه‌كمان كه‌مه‌و رێگاكه‌مان دوورو درێژه‌ و پره‌ له‌ مه‌ترسی و، قسه‌كردن و جگه‌ره‌خواردن له‌ كاتی رێكردن قه‌ده‌غه‌یه‌و، ئه‌مانه‌وێت به‌بێ زیان بگه‌ینه‌ی باره‌گای سه‌ركردایه‌تی.
مه‌فره‌زه‌كه‌ كه‌وته‌رێ دوو هاوریی چه‌كدار له‌ پێشه‌وه‌ بوون یه‌كێكیان شاره‌زای ناوچه‌كه‌ بوو، هه‌رچۆنێك بێت له‌م رێگا بۆ ئه‌و رێكا په‌رینه‌وه‌و ده‌رنگانی شه‌و بوو گه‌یشتینه‌ دێی شیره‌مه‌رو، دووسی هاورێ چوونه‌ ناو دێ به‌ مه‌به‌ستی كۆكردنه‌وه‌ی نان و، له‌ گه‌ڵ هاتنه‌وه‌ی هاورییان به‌ره‌و خۆرنه‌وزان له‌ شاخی سورێن سه‌ركه‌وتین و، هه‌موو هاورێیان كفت بوون و یه‌كسه‌ر خه‌وتن.
به‌یانی زوو دوو نه‌فه‌ر له‌ گه‌ڵ دوو به‌ران گه‌یشتنه‌ لامان و، وتیان ئه‌وا دوو به‌رانمان له‌ سه‌ر داوای براده‌رانتان كه‌ شه‌و له‌ ناو دێ بوون هێناوه‌و، هه‌ردوو به‌ران سه‌ربران و، گۆشت به‌ سه‌ر هاورێیان دابه‌ش كراو، ئیتر هه‌ركی بۆ خۆی یان به‌ كۆمه‌ڵ ده‌ستكرا به‌ گۆشت برژان و، گرفتی سه‌ره‌كی شوێنه‌كه‌ رووته‌ن و بێدارو كه‌م ئاو بوو.
قۆناغی دووه‌م : نزێكی ئێواره‌ بوو هاورێی فه‌رمانده‌ وتی خۆتان ئاماده‌ بكه‌ن و، ئه‌بی كورجوگۆڵ بن و رێگاكه‌مان زۆر درێژه‌ و، له‌ پاش ئه‌و ئامۆژگارییانه‌ كه‌وتینه‌ رێ و ده‌وروبه‌ری كاتژمێر نۆی شه‌و له‌ رێی نێوان سید سادق ــ كۆڵۆس و پێنجوێن نزیك بووینه‌و، وتیان بوه‌ستن كه‌مین و ده‌بابه‌ له‌ سه‌ر رێگاكه‌ هاتوو چوو ئه‌كات و، كه‌مێك به‌ره‌و دوواكشاینه‌وه‌و، هه‌ر زوو كه‌مێن و تانكه‌كه‌ گه‌رانه‌وه‌ به‌ره‌و شانده‌رێ و سه‌ید سادق و په‌رێنه‌وه‌و، گه‌یشتینه‌ دێی قه‌ویله‌ كه‌ پێش ماوه‌یه‌ك له‌م دێیه‌ به‌ره‌و پێشمه‌رگایه‌تی چووم و، دووسێ هاورێ چوون بۆ نان كۆكردنه‌وه‌و، كه‌مه‌ كه‌مه‌ له‌ دۆڵی گه‌ڵال به‌ره‌و سه‌ر رۆیشتین و له‌ نێوه‌یه‌دا مه‌فره‌زه‌كه‌ وه‌ستاوهاورێ ته‌وفیق وتی باپشوویه‌ك بده‌ین و رووی له‌ من كردو وتی ناخه‌ویت ؟ له‌ كاتی كردنه‌وه‌ی باره‌گای حزب له‌ پارێزگای سلێمانی ئه‌یزانی ناخه‌وم و هه‌موو جارێك ئه‌یوت ناخه‌ویت؟، و هه‌ر كه‌ هاورێ وتی باپشوویه‌ك بده‌ین ئه‌وه‌نده‌ بلێت یه‌ك و دوو هه‌موو تێكرا نووستن و من شیخ ره‌سول نه‌نووستین و له‌ پاش كاتژمێرێك هه‌موو هاورێیان بیداربوونه‌وه‌و كه‌وتینه‌رێ و كاتی نان و چاخواردنی به‌یانی گه‌یشتینه‌ دێی پاره‌زان و، كاتی هاتم بۆ پێشمه‌رگایه‌تی سێ رۆژ له‌و دێیه‌ له‌ ماڵ كاك حه‌مه‌ جه‌زا قاینه‌جێی ماومه‌وه‌و، پشوویوكی باشمانداو بۆ نێوه‌ۆو میوانی كاكه‌ حه‌مه‌ی حاجی مه‌حمود بوین و، نانمان خواردو دیسانه‌وه‌ پشوومانداو ئێواره‌ كه‌وتینه‌رێ و له‌ بناری شاخی سوره‌بان پشوویه‌كی ترمان به‌سه‌ر بردو، مه‌فره‌زه‌كه‌ كه‌وته‌ جوڵه‌ و نه‌وه‌ستاین تا گه‌یشتینه‌ دێ نێروان( نێوران) و، ئه‌وه‌ش قۆناغی سێیه‌م بوو.
قۆناغی چواره‌م : دێی نێوران سه‌ر به‌ شاری بانه‌یه‌و له‌ سه‌ر سنووره‌و، شه‌و له‌و دێیه‌ به‌ ئازادی نووستین و ماینه‌وه‌و برده‌رانی حزبی دیموكراتی كوردستان له‌وێ بوون و ژماه‌ره‌ی پێشمه‌رگه‌كانیان زۆر بوون و، له‌ پاش پشوویه‌كی باش و رۆژ بووه‌وه‌ نان وچای به‌یانیمان خواردو دێسان كه‌وتینه‌رێ تا گه‌یشتینه‌ ئه‌سپه‌مێزه‌و له‌م دێ جوانه‌ نانی نێوه‌رۆمان خواردو بۆ ئێواره‌ گه‌یشتینه‌ دێی ده‌رمان ئاواو، ئه‌وه‌ی جێی خۆشییه‌ سروشتی هه‌موو دێهاتی ئه‌م ناوچه‌یه‌ دڵ فرێن و جوانن و، ئه‌و شه‌وه‌ له‌ ده‌رمان ئاوا ماینه‌وه‌.
قۆناغی پێنجه‌م و كۆتایی: له‌ پاش پشوویه‌كی باش به‌رێ كه‌وتین و گه‌یشتینه‌ دێی بێوران و،روومانكرده‌ دوكانه‌كانی و هه‌ر یه‌ك له‌ ئێمه‌ هه‌ندی شتی ورده‌واڵه‌مان كری و كه‌وتینه‌ری به‌ناو گوڵ گوڵزارو له‌ هه‌موو لایه‌كه‌و ئاو خوره‌ی ئه‌هات و، گه‌یشتینه‌ دێی بنوخه‌ڵه‌ف و، له‌ پاش نیوه‌رۆ گه‌یشتینه‌ باره‌گای سه‌ركردایه‌تی پێشمه‌رگه‌كانی حزب له‌ توژه‌ڵه‌و، له‌وی پشوومانداو نانمان خواردو، دابه‌ش كراین به‌ سه‌ر بنكه‌كانی حزب له‌ ناوزه‌نگ و زه‌ڵێ و، ئێمه‌ كۆمه‌لێك بوین به‌ر بنكه‌ی هاورێیانی هه‌ولێر كه‌وتێن و،له‌و به‌رپرسانه‌ كه‌ له‌وێ بوون: مامۆستا فه‌تاح ته‌وفیق { مه‌لا حه‌سه‌ن} و مه‌لا ئه‌حمه‌د حاجی برایم { مه‌لا نه‌فته‌}.
له‌ پاش ماوه‌یه‌ك ئێمه‌یان گواسته‌وه‌ بۆ زه‌ڵی و، له‌لای هاورێیانی بشده‌ر ماینه‌وه‌و هاورێ مه‌حمود خدر به‌رپرس بوو، له‌و كاتانه‌دا مه‌فره‌زه‌ی سلێمانی له‌ 15 هاورێ پێكھێنراو، هاورێ حه‌مه‌ كه‌ریم قه‌ره‌چه‌تانی { حه‌مه‌ ساڵح} بوو به‌ فه‌رمانده‌ی مه‌فره‌زه‌و، له‌ ناوه‌راستی مانگی كانونی یه‌كه‌م ( دێسه‌مبه‌ر) 1979 بۆ یه‌كه‌مێن جار له‌ تووژه‌ڵه‌وه‌ مه‌‌فره‌زه‌كه‌ به‌ره‌و دێهاتی شارباژێر كه‌وته‌رێ.

( ماویه‌تی)

5/7/2020

Previous
Next
Kurdish