Skip to Content

هەڵگەڕێنەوە … کەنعان مدحەت

هەڵگەڕێنەوە … کەنعان مدحەت

Closed
by ته‌مموز 6, 2020 General, Poems

دەرفەت خۆی داوەتە دەست و چاوەڕێی هیمەتە
هەڵگەڕێنەوە لەم لەشە قورس و
برسیکراوەی کە لێتان بارکراوە
سوورە پشکۆی لە ئێوە قرچاوتر
ئامادەیە بە ڕێی کڵپە
ناڕەزایەتیتان بداتە بەر گوێی مێردەزمە
چاوەڕێی چین و
چی تر و
چی؟!!
پەرچدانەوەی هەر گوللەیەکی ڕاستەوخۆ
جگە لە پچڕانی قۆپچەکانی یەخە و
رووبەروو بوونەوەی
بە سنگی رووتەوە
هیچ دژە کاردانەوەیەکی تری چار نییە
تا بە عەرزا بیدا
ماڵی مەبن !
لە نرکە و زەلزەلەی هەورەتریشقە
هونەری ڕاتەکان فێر بن
لەسەر ڕێگای وەبەرچنین
هەزارەها مناڵە کۆرپەی لە سۆزی باوک و
بڕا کراو
بە حەیران و بزە و
دەسکە گوڵی ڕەنگاوڕەنگەوە ئاواتەخوازن
بتانبینن
وەک ئەستێرە،
چۆن بە یەکخستنی جریوە ئەنازن
بە ئێوەوە
ساماڵییەکی تر
بە ئاسمانی رەسەنا ببەخشن
بژار نەماوە تاقی نەکرابێ؟
لە کوێی ئەم سەر زەمینە برژاوە
بڕینی قوتی پەک کەوتە و خانەنشین
بووەتە کلیلی قفلی ئاسۆی داخراو
جگە لە هەرێمی بنەماڵە و
پارتی ئەم دەستە و
ئەو دەستە مافیای لێکترازاو ؟؟
ئەبێ کام بژار لەوی تری بێ ئابروو تر بێ؟
بڕینی قوتی تێکۆشەر
یا لەشفرۆشی بە هۆی نەبوونە و
زوڵمی سەردار
یانیش سمێل قەفێ
چەرچەفی ژێر دۆست و سکرتێرەی..
فڵانی فڵان بگۆڕێ؟
هەی مەڕینە!
هەڵگەڕێنەوە لە شوانێ
لە جێی لەوەر
لە سەنگەر و پشت ساترا دەتان بەستێ
هەڵگەڕێنەوە دەرفەتە
دەرفەت
ئێستا،
مەخەنە سبەینێ
هیج پلان و بەرنامەیە
بێ ئێوەی پێشمەرگە
بە دوا ئەنجام ناگەیەنرێ
هەڵگەڕێنەوە بە تاک و
لێشاو
بە چەکدار و بێ چەکتان..
بە هیوای،
گۆڕینەوەی دۆزەخ بە گوڵستان
هەڵگەڕێنەوە دەرفەتە..
دەرفەت..
لەم لەشە قورس و برسییە
بارکراوە..
گەل ڕزگارکەنەوە

پاشکۆ

نەتانزانیوە تەمەنی،
کورتی پەپوولە بۆ شیرینترە؟
لەبەر ئەوەی لە گوڵێکەوە بۆ گوڵێ
ئازادانە لە باڵ ئەدا و
لە شنە و چریکەی بولبول ناتۆرێ
پێکەوە سەما ڕێک ئەخەن و
ئەکەونە ناو باخ
مەبنە (یوسفی) پشوو درێژ..
هەندە ساڵی تری تاڵی و ناڕەوایی
لە کونە بیری دەسەڵاتا
بەسەر بەرن
هەڵگەڕێنەوە کاتە کات
کات
کات….

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish