Skip to Content

76 Views

تێكۆشان له‌ ناو لێژنه‌ تایبه‌تمه‌ندییه‌ جیاجیاكاندا … ئه‌حمه‌د ره‌جه‌ب

تێكۆشان له‌ ناو لێژنه‌ تایبه‌تمه‌ندییه‌ جیاجیاكاندا … ئه‌حمه‌د ره‌جه‌ب

Closed
by July 9, 2020 General


وانه‌كانی ژیان :


له‌ سه‌ره‌تای درۆستبونی حزبی شیوعی عێراق شیوعییه‌كان به‌ هاوكاری و پشتگیری یه‌كتری تیكۆشاون بۆ ئه‌وه‌ی رۆڵی حزب له‌ناو كۆمه‌ڵگا گه‌وره‌و كارا بێت بۆ به‌دیهێنانی ئامانجه‌كانی نیشتمانی و نه‌ته‌وه‌یی و چینایه‌تی و داكۆكیكردن له‌ به‌رژه‌وه‌ندی هه‌ژارو زه‌حمه‌تكێش و ره‌نجده‌ران و ئاوات و خواستی جه‌ماوه‌ری گه‌ل به‌رجه‌سته‌ بكه‌ن و بۆ جێبه‌جێ كردنی ئه‌و ئه‌ركانه‌و به‌ یارمه‌تیدانی رێكخسته‌كانی حزب و هاورێیان و له‌ سه‌ر رۆشنایی و پرۆگرامی حزب چه‌ندین لێژنه‌ی یان مه‌كته‌بی تایبه‌تمه‌ندی { اللجان المختصة} دامه‌زراو لێره‌دا زۆر به‌ كورتی وبه‌ ساده‌یی باس له‌ 3 لێژنه‌ی تایبه‌تمه‌ندی ئه‌كه‌م و خۆم له‌ هه‌رسێ لیژه‌نه‌كه‌دا به‌شدار بووم :
لێژنه‌ی تایبه‌ته‌مه‌ندی كرێكاران : ئه‌م لێژنه‌یه‌ له‌م هاورێیانه‌ی پێكهاتبوو : ئه‌حمه‌د ره‌جه‌ب ( كارگه‌ی شه‌كری سلێمانی) ، سلاح ره‌شید ( كارگه‌ی چیمه‌نتۆێ سه‌رچنار) و عمر عه‌لی ( كارگه‌ی ته‌نقیحی توتن).
تۆژینه‌وه‌و خویندنه‌وه‌ی باری كرێكاران له‌ سه‌رجه‌م كارگه‌و شوێنه‌كانی كاركردن و به‌رزكردنه‌وه‌ی راپۆرت بۆ حزب له‌ باره‌ی كێشه‌و گرفته‌كانی كرێكاران و، ئامۆژگاری و رێنمایكردنی كرێكاران بۆ په‌ره‌دان به‌ تێكۆشان و فشارخستنه‌ سه‌ر خاوه‌ن ئیش له‌ رێگای سه‌ندیكا ( نه‌قابه‌) وه‌ به‌ مه‌به‌ستی پاراستنی مافه‌كانیان وه‌ك خراپی ژیانی كرێكاران . كاتی كاركردن له‌ 8 كاتژمێر زیاتر نه‌بێت ، گرنگی بدرێت به‌ گرێبه‌ستی كار له‌گه‌ڵ كرێكاران ، خاوه‌ن‌ كار پێداویستی سه‌لامه‌تی كار ئاماده‌ بكات، كرێكاران نوێنه‌ریان له‌ دادگاكانی كار هه‌بێت.
یه‌كێك له‌ ئه‌ركه‌كانی مه‌كته‌بی تایبه‌تمندی له‌ كاتی هه‌ڵپژاردنه‌كاندا ده‌ستنیشانكردنی نوێنه‌رانی كرێكاران و، هه‌وڵدان بۆ بردنه‌وه‌و ، لێره‌شدا داوامان له‌ حزب ئه‌كرد بۆ یارمه‌تیدان و هاندانی هه‌موو هاورێیان بۆ پشتگیری داواو خواستی مه‌كته‌به‌كه‌مان و، له‌و كاتانه‌دا چه‌ندین كۆبونه‌وه‌ی فراوانمان بۆ كرێكاران ئه‌نجامداو نوێنه‌ری كرێكارانی سلێمانی بووم له‌ كۆبوونه‌وه‌ی تایبه‌تمه‌دی كرێكارانی ناوه‌ندی له‌ به‌غدا به‌ سه‌رپه‌رشتی هاورێیان ئاراخادۆر و جه‌عفه‌ر فه‌لاحی.
ئه‌ندام نوسینگه‌ی كرێكارانی هه‌رێم بووم و، وله‌و ماوه‌یه‌دا به‌دوواچوون و سه‌رپه‌رشتی كۆبوونه‌وه‌ی فراوانی كرێكارانی قه‌زاكان { ده‌ربه‌ندیخان و هه‌ڵه‌بجه‌و قه‌ڵادزی } م كردو ، له‌ به‌ر ده‌زگا سه‌ركوتكه‌ره‌كانی حزبی به‌عسی عه‌ره‌بی هه‌موو كۆبوونه‌وه‌كان نهێنی بوون
نووسینگه‌ی رۆژنامه‌گه‌ری : له‌م هاورێیانه‌ پێكهاتبوو : ئه‌حمه‌د ره‌جه‌ب ، ئه‌حمه‌د ساڵح ، شاعیری گه‌وره‌ حه‌سیب قه‌ره‌داغی، محه‌مه‌د ره‌ووف زوهدی ، هۆگر گۆران و هێرۆ گۆران و، به‌ یارمه‌تیدانی نووسه‌رو رۆشنبیرانی ترو قوتابیانی زانكوی سلێمانی و، له‌وانه‌ هاورێیان : مامۆستا حه‌مه‌ ره‌شید هه‌ورامی ، نورا، شاكر الانباری و ژماره‌یه‌كی تر.
من په‌یامنێری رۆژنامه‌ی بیری نۆی وطریق الشعب بووم ، هه‌رچی هه‌واڵ و كاری رۆژانه‌م ئه‌دا به‌ هاورێیانی مه‌كته‌بی پارێزگای سلێمانی و هه‌روا ئه‌منارد بۆ رۆژانه‌مه‌كان و، ئه‌ركه‌كاتی ترم نووسینی ریپۆرتاج و راپۆرت وژیانی گه‌ل و بایه‌خدان به‌ كرێكاران و كۆمه‌ڵه‌ هه‌ره‌وه‌زییه‌كان و، نووسین له‌ سه‌ر تێپی نواندنی پێشره‌وو ، تیپی مۆسیقای سلێمانی و چه‌ندین جار چاو پێكه‌وتن له‌ گه‌ڵ هونه‌رمه‌ندانی گه‌وره‌ ئه‌حمه‌د سالارو، حه‌مه‌ ره‌شید هه‌ره‌س و ئه‌نوه‌ر قه‌ره‌داغی و، له‌ هه‌موو چالاكییه‌كان ئاماده‌ ئه‌بووم و، ئه‌ندامی نوسینگه‌ی رۆژنامه‌گه‌ری هه‌رێمی كوردستانی بوم.
مامۆستا حه‌سیب قه‌ره‌داغی به‌ هۆی سه‌رقاڵی به‌ یه‌كێتی نووسه‌رانی كورد كه‌متر له‌ كۆبوونه‌وه‌كانی مه‌كته‌ب ئاماده‌ ئه‌بوو، هه‌رچی نووسینێك به‌ ئه‌ده‌ب په‌یوه‌ست بوایه‌ ( شیعر، چیرۆك و په‌خشان) به‌ره‌رووی مامۆستامان ئه‌كرد.
مامۆستا ئه‌حمه‌د سالح به‌ تایبه‌تی له‌ سه‌ر گوڵ و گوڵزارو دره‌خت و ره‌وه‌كی ئه‌نووسی و مامۆستا ره‌ووف زوهدی سه‌باره‌ت به‌ كۆمه‌ڵگا ئه‌ینووسی و هاورێیان هۆگرو هێرۆ له‌ شیعر و چیرۆك و بابه‌تی تریان ئه‌نووسی، جێی ئاماژه‌یه‌ من هاورێ ره‌ووف زوهدی كتێبی : ده‌رباره‌ی ئازادی ئافره‌ت { حول تحرر المرأة) مان وه‌رگێرایه‌ سه‌ر زمانی كوردی و ناردمان بۆ دار الروادی حزب له‌ به‌غداو بریار بوو چاپ بكرێت به‌ڵام له‌ هێرشه‌ گڵاوه‌كه‌ی حزبی به‌عسی عه‌ره‌بی و دیكتاتۆر سه‌دام حوسه‌ێن بۆ سه‌ر حزب و ده‌ستبه‌سه‌راگرتنی دار الرواد كتێبه‌كه‌ دیاری نه‌ماو له‌ناوچوو.
خۆلێكی رۆژنامه‌گه‌ریمان بۆ هاورێیان كرده‌وه‌.
نوسینگه‌ی به‌رێوبردن { الادارة} : له‌م هاورێیانه‌ پێكهاتبوو : ئه‌حمه‌د ره‌جه‌ب ، سه‌ید باقی و دكتور عه‌لی سه‌عیدو كاروبارمان به‌م شێوه‌یه‌ دابه‌شكردبوو هاوكاری یه‌كتری بووین : هاورێ دكتور له‌ پرسگه‌ی باره‌كا، هاورێ سه‌ید كاروباری ناوخۆێی باره‌گاو، منیش له‌ گه‌ڵ هاورێیانی تردا یان به‌ ته‌نها بۆ بۆنه‌ كۆمه‌ڵاییه‌تییه‌كان وه‌ك بانگهێشتنی حزبه‌كان و ده‌زگا حكومییه‌كان و ئاهه‌نگ و پرسه‌و سه‌ره‌خۆشی وبابه‌تی ترو، رێكخستنی ئاهه‌نگ وبۆنه‌كانی حزب.
له‌ كۆتاییدا ئه‌ڵێم یادی هاورییانم به‌خیرو روحیان شادو ئاسووده‌ بێت : عمر عه‌لی، ئه‌حمه‌د ساڵح، حه‌سیب قه‌ره‌داغی، رۆوف زوهدی، دكتور عه‌لی و سید باقی و هیوادارم ئه‌وانی تر له‌ ژیاندا بن.

8/7/2020

Previous
Next