Skip to Content

بۆنی مرۆڤ … سۆران محەمەد

بۆنی مرۆڤ … سۆران محەمەد

Closed
by July 9, 2020 General, Poems

لە گشت لایەکەوە بۆن دێ
بۆنی مرۆڤ
ئەو کاتانەی وەکو تەختەدار
سەرئاو دەکەوێ
شەپۆل دەیباو
لە کەنارێکا
جانەوەر
لەدەوری کۆمدەبێ
.
بۆن دێ
بۆنی باروت نا!
بۆنی مرۆڤ
کە بەشەو شەقامەکان
وەك چراخان دەڕازێننەوە
لە رۆژیشدا غەڵبەغەڵبەکان
لە چایخانەکانەوە بەرز دەبنەوە
کەس نابینرێ
ئاوازێ بۆ ژیان بڵێتەوە
.
لەبەردەرگای ڤێللاکانا
(مڵە)کان قەتارەیان بەستووە
لە حەوشەی قوتابخانەکان
کرمە لیقەکان
گروپ گروپ بارگەیان خستووە
دووپشکەکان
لە کونی گۆڕەکانەوە
سەریان دەرهێناوە
بەرەو بۆنە ناخۆشەکە
بەدیوەرەکانا هەڵئەزنێن
لەهیچ پەنجەرەیەکیشەوە
تارمایی مرۆڤ نابینرێتەوە
.
بۆن دێ
بۆنی مەرگێکی بۆر
مەرگێکی بۆگەن
بێ ئەوەی لە گۆڕستانەکان
هیچ کەسێ تەرمێ بنێژێ..
درەختی سەر ڕێگاکانیش
کە هەر بە ئاوی ئەو شێرەیە ئاودران
کە چەرچەفەکانی
ژووری نووستنی کۆشکی
پێ دەشۆردران
هەر دڕکە زی ئەگرێ
کەس ناتوانێ لەسایەیان ستار بگرێ
.
مێروولەکان لە دوورەوە
لەسەر لوتکەی چیاکانەوە
گاڵتەیان بەو حەشاماتە دێ
كە رۆژێ بوو
توتنیان دەبرد بۆ خان
رۆژێکی تریش
خەنجەری دەبان
کەچی ئێستا وەکو شوشەیەکی بەتاڵ
لە سەری خۆیان دەگەڕێن
.
لە هەموو لایەکەوە لوورە دێ
لوورەی مرۆڤ،
مرۆڤیش نابینرێتەوە..
لەو دەڤەرەی
دەڵێی میحنەتخایەک بوو
وا چۆڵ بووە
یان مەنفایەك
هیچ کەس جێی تیا نەبێتەوە
.
لوورە دێ لەو میحنەتخانەیە
کەسیش، کەس ناناسێتەوە
وەكو ئەوەی؛
دوێنێ بەو ڕێگایانە ڕۆی
ئەمڕۆ شوێنپێی سڕدرابێتەوە
.
هەموو دەموچاوەکان
وەك یەکن
هیچ کەس، کەس ناناسێتەوە
لە هەر لاوە
یەك سەدا بەرزەبێتەوە
ئەویش ‘مەرگ’ـە
بەسەر خاکی
وشکەڵانی گیانەکانا
لەناکاو بەر دەبێتەوە

15/6/2020

Previous
Next