Skip to Content

ئه‌فسانه‌ی درۆیه‌كی درێژ … ته‌یب جه‌بار

ئه‌فسانه‌ی درۆیه‌كی درێژ … ته‌یب جه‌بار

Closed
by ته‌مموز 17, 2020 General, Poems


ساڵه‌هایه..
له‌ چاوه‌ڕوانی (ئازادی)دام،
خه‌ریكه‌ شێت ده‌بم.
په‌كم ده‌كه‌وێ.
نازانم چۆن؟ له‌ كوێوه‌ دێ؟
به‌ پێی په‌تی..
له‌ باكووری هه‌وره‌وه،
یاخود ڕۆژئاوای باران.
به‌ شه‌له‌شه‌ل..
له‌ باشووری هاوینه‌وه،‌
یاخود ڕۆژهه‌ڵاتی زستان.
نازانم كه‌ی دێ؟
وه‌ك تارمایی،
له‌ نیوه‌شه‌وی پشت قه‌ڵادا.‌
یاخود وه‌ك پیاوچاك،
نیوه‌ڕۆی به‌رئاوایی.
(یه‌كسانی) خه‌مسارده،ناجوڵێ.
نه‌ ده‌گه‌ڕێ، تا ده‌رفه‌تێك..
بۆ ژنان بدۆزێته‌وه‌،
تۆزێ خۆیان توندوتۆڵ بكه‌ن.
نه‌ ئێشك ده‌گرێ، تا هه‌لێك..
بۆ پیاوان بڕه‌خسێنێ،
نه‌ختێ خۆیان نه‌رم و نۆڵ بكه‌ن.
كاتێ ئاوڕ ده‌ده‌مه‌وه،
(دادپه‌روه‌ری) مانی گرتووه‌.
هه‌موو ڕۆژێ ده‌یدوێنم،
تا ئاشت بێته‌وه‌ و..
بگه‌ڕێته‌وه‌ ناومان.
تا وازبێنێ،
له‌ ده‌ردو په‌تای هه‌راسان.
(برایه‌تی) مڕومۆچ،
هه‌میشه‌ توندو توڕه‌یه‌.
نه‌ شاری به‌دڵه‌، نه‌ لادێ.
نه‌ خۆی ده‌زانێ چی ده‌كا،
نه‌ ئێمه‌ ده‌زانین چی ده‌وێ.
هه‌واڵی (نیشتمان) ده‌پرسم،
ده‌ڵێن له‌ ماڵه‌ دراوسێ ده‌ست به‌سه‌ره‌،
شه‌و و ڕۆژ ناسره‌وێ.
ساڵه‌هایه‌.. كه‌سێك نییه‌،
ڕێگایه‌كی ته‌خت بدۆزێته‌وه‌،
فریای بكه‌وێ.
(ناپاكی)، بێ منه‌ته‌،
به‌رده‌وام له‌ بۆسه‌دایه‌.
هه‌ر دره‌ختێ گوڵ بگرێ،
پایزی تێ به‌رده‌دا.
هه‌ر كانیاوێك چاو بكاته‌وه‌،
تاریكه‌ بای بۆ هه‌ڵده‌كا.
(گه‌نده‌ڵی)، پۆشته‌ و قیت..
به‌پێوه‌ ڕاوه‌ستاوه‌.
چه‌پڵه‌ لێده‌دا،
قاقا به‌ هه‌موویان پێده‌كه‌نێ.

سلێمانی / شوبات / 2020         ‌‌‌
Previous
Next
Kurdish