بوعەزیزە زیندووەکانی کوردستان….مەهێڵن ؟! … جەمال کۆشش
هێشتمان هەرچی عامودو وایەرو فافۆنە …بیبەن وفەرهودی کەن وئاودیوی کەن..
هێشتمان وەک جەردە، ڕاوڕووت بکەن وبەڕێگری ودەیان وسەدان گومرگ و سەرانە بستێنن..
هێشتمانن … لەبن بەردو کەلاوە وچینکۆ وماڵێ بۆ خۆمان چێبکەین، وەلی شوفل بێنن وبەسەرمانا کاولی کەن …
هێشتمانن …پیاوکوژ وژنکوژ و جەلاد وئەنفالچی ، بڕ بە بڕ بەسەر خۆیانا دابەشکەن..
هێشتمانن …تیرۆرمان بەبێ لێپرسینەوە، بەبێدادگایی، بەبێ تۆڵە کردنەوە، بە…تێپەڕێت… بەکر عەلی، ڕەئوف ئاکرەیی، ڕێناس، نەزیر عومەر، شاپور وقابیل، فەرهاد فەرەج، سۆران مامەحەمە، عەبدولستار شەریف، کاوە گەرمیانی، سەردەشت عوسمان، ویداد حسێن، …
هێشتمانن بەکۆمەڵ بمانکوژن ، حەمەی حەلاق وئەندامانی حزبی کۆمۆنیستی کرێکاری عێراق و
هێشمانن…مقەڕ بسوتێنن وتەفروتونای کەن وەک مقەڕی یەکگرتوو لەبادینان…
هێشتمانن …تیرۆری کەسایەتیمان بکەن..وەک سەرتاشین وبرۆ تاشین وئاودیوکردن وفڕدان ونەفیکردن..
هێشتمانن…شەوان بمانڕفێنن، بماترسێنن، لەزیندانی نهێنی قاییمان کەن وخەسیومان کەن ودواتر خۆمان خۆمان بکوژیین..
هێشتمانن..لەسەر هۆڕینێک دەمانچە بخەنە ناو دەمانەوە، لەسەر لایتێک دەموپلامان پڕ خوێن بکەن.
هێشتمانن ….دکتۆرمان تیرۆر بکەن، دادوەرمان دەمانچەی لەسەر ڕابگرن. مامۆستامان پڕ شەق بکەن..قوتابیمان بیمارو سەرگەردان وئاوارەو هەرەتەی سەر دەستفرۆشی بکەن..
هێشتمانن..لەنێو شار کوشتارگە سازکەن ” کوشتارگەی ١٩٩٧ی هەولێر”، .لاشەکانیان ئەتک کەن وبەنێو بازاڕدا ڕایکێشن…
بەڵێ هێشتمانن… ڕۆحمان هەلاهەلا بکەن، ژیانمان داگیربکەن و قەڵایەیەکی ئاسنین بەدەوری دەسەڵاتیاندا دابمەزرێنن..
بەڵێ هێشتمانن… پەرلەمان دروستبکەن، هەڵیوەشێنەوە، داگێریکەنەوە، چالاکی کەنەوە، سڕی کەنەوە،
بەڵێ هێشتمانن..لەگەڵ بەغدا ڕێکەون، تەنگژە دروستکەن، بایکۆتی بەغدا بکەن، بچنەوە…
بەڵێ..هێشتمانن… شەنگالیەکان وەک ئاسکە بدەینە بەر کەڵبەی داعش وچاوساغی بۆ میتیش وەک رێزنەگرتنی میوان و کەرکوکیش وەک دیاری بۆ حەشد و وەک نیشاندانی ماسولکەی خەیانەت بۆ چاوترساندنی یەکتر…
بەڵێ هێشتمانن..کۆمپانیای زۆر گەورە، زۆر گەورە، عەقاری ئاقارو دوندو گرد وکێو، سامان وموڵکی چەند سەت کەسێکی نێو دەسەڵاتی سیاسی بن و ….هێشتمانن…
بەڵام ..ئیدی تەواو، مەهێڵن..مامۆستایەک هەموو جوانی لە پەروەردەکردنی مناڵەکانمدا گەورە کردبێت، لەشاشەی تەلەفزێۆنەوە بگرییەت وبڵێت باکۆرۆنا بمکوژێت…پڕ بەگەروی هاوار کات وپڕ بە چاوی فرمێسک بڕێژێت وخۆی ڕووت ڕووت بکاتەوە..
بەڵێ..ئیدی تەواو مەهێڵن..خاوەن پێداویستی تایبەت، کە هیچ دەرفەتێکیان نیە وکۆمەڵگاش وەها بێبەزییانە ونابەرپرسیارانە ڕوو بەڕووی مەرگی بەکۆمەڵیان بکاتەوە..
بەڵێ ئیدی تەواو.. کەسێک بەهۆی تاپۆ نەکردنی پارچە زەوییەک لەڕانیە خۆی سوتاند هەر لەناو حەوشە کڵوکۆی دامردو گیانی سپارد ، مێرد مناڵێک لە سلێمانی پارچە کاغەزێکی پاش مەرگی بۆ باوکە کرێکارە لێقەوماوەکەی جێهێشتتوە.، بابە لەبەر هەژاری خۆمکوشتووە..دڵ چۆن ناوەستێ ونابێت بە ئاو و ساردنابێتەوە..
بەڵێ..ئیدی تەواو. مەهێڵن .باوكێکی وسەرلێشێواو لە هەڵەبجە ..لە هەڵەبجەی شەهید، چوار مناڵی پێپەتی و پەڕپووت وزارەترەک چووی دەست شپرزەیی باوکیان، بەدەبەیەک بەنزینەوە ڕادەپێچێتە نێو حەوشەی شارەوانییەوە. هاوار دەکات ..دەیانسوتێنم .دەیانسوتێنم…هاوارە. .خەڵکینە ..مەهێڵن..
لەزمانی قوربانیەکەوە ، سەرۆکی شارەوانی هەڵەبجە پێشتر پێووتوە ” خۆت دەسوتێنی ئەوە کێشەی من نیە” بەڵام ئەوەی کە زۆر بەخوێنساردییەکی ناپەرپرسیارانەوە دەیوت ” هەر لەسەر ئەو جێگایە دوو کەسی تر داوایان لەسەر قەید کراوە”. بەىێ هیچ سوکە بەڵێنێک بۆ دڵنەوایی و لەوتەنگژە دەروونیە داڕوخاوەی مناڵەکان ، ئینسان هەست دەکات، دەسەڵات وحکومەتی هەرێم تا ناوەوەی مۆخیش بێویژدان و داشۆردراون .
بوعەزیزییە زیندووەکانی کوردستان، …لاوان وخەڵکی زەحمەتکێش،،مەهێڵن…هەر ڕۆژێک ..فەلاقەمان کەن، بەدیار قەرەوێڵەی مردووەکانمانەوە بمانبەستنەوە…مەهێڵن…
جەمال کۆشش
تەموزی ٢٠٢٠
