Skip to Content

ژن و منداڵه‌ ئێزیدیه‌كانی قوربانی داعش … ڕه‌سوڵ بۆسكێنی

ژن و منداڵه‌ ئێزیدیه‌كانی قوربانی داعش … ڕه‌سوڵ بۆسكێنی

Closed
by ئاب 4, 2020 General, Genocide


ئه‌گه‌رمێژووی كورد پڕبێت له‌ داگیركاری و تاڵان و چه‌وسانه‌وه‌ و له‌ناوبردن، بێگومان ئه‌وه‌‌ بۆ ئێزیدییه‌كان سه‌خت و دوارتر بووه‌، چونكه‌ به‌درێژایی مێژوو تائێستاش له‌سه‌ر ده‌ستی ده‌سه‌ڵاته‌ جیاوازه‌كانه‌وه‌ زوڵم چه‌وسانه‌وه‌یان به‌رامبه‌ركراوه‌، چه‌وساندنه‌وه‌ی ئه‌وان دووسه‌ره‌ بووه‌، هه‌م وه‌كو ئایین و هه‌م وه‌كو كوردبوون چه‌وساونه‌ته‌وه‌، سه‌ره‌ڕای ئه‌وه‌ی تووشی ئازار و ئه‌شكه‌نجه‌ و نه‌هامه‌تی و كۆمه‌ڵكوژی بونه‌ته‌وه‌، ده‌یان فتوای كوێرانه‌ بۆ كوشتوبڕ و قڕكردنیان ده‌ركراوه‌.
به‌هۆی نه‌زانی و بیری ته‌سكی دوژمنه‌كان ئێزیدیه‌كان به ‌لاده‌ر و كافر له‌قه‌ڵه‌م دراون، ئه‌مه‌ش خوێنی حه‌ڵاڵ كردوون و چه‌ندان فه‌رمانی كۆمه‌ڵكوژی و له‌ناوبردنیان بۆ دراوه‌، له‌ئه‌نجامی ئه‌و فه‌رمان و هێرشانه‌دا هه‌زاران كوڕ و كیژ و ژن و منداڵیان كوژراون و به‌دیل براون و خراپترین مامه‌ڵه‌یان له‌گه‌ڵ كراوه‌، له‌هه‌موو ئه‌و فه‌رمان و شاڵاوه‌ نه‌گریسانه‌ی كراوه‌ته‌ سه‌ریان، ژنانی ئێزدی قوربانی یه‌كه‌م بوون و زۆرترین زوڵم و چه‌وسانه‌وه‌یان ده‌رهه‌ق كراوه‌.
وه‌ك خۆیان ده‌ڵێن و مێژوو گه‌واهی ده‌دات 74 جار فه‌رمانی قڕكردنیان بۆ دراوه‌ و دواترینیان ئه‌وه‌ بوو، له‌ئه‌نجامی خیانه‌تی ده‌سه‌ڵاتی كوردی و له‌ 3- 8- 2014 له‌شه‌نگال ڕوویدا، كه‌ مێشك وشك و ده‌روون نه‌خۆشه‌كانی داعش ‌هێرشان كرده‌ سه‌ر ئێزدییه‌كان و له‌ژێر سایه‌ی كه‌مته‌رخه‌می و خه‌مساردی هێزی پارێزه‌ریان، به‌هه‌زاران ژن و منداڵ بوونه‌ قوربانی ئه‌قڵیه‌تی داگیركه‌ری ده‌روون نه‌خۆشی داعش، كه‌سیش نه‌بوو به‌رگری بكا له‌ نه‌هامه‌تی و به‌دیل گرتنیان، به‌پێچه‌وانه‌وه‌ ئه‌وانه‌ی بانگه‌شه‌ی پاراستنی كۆمه‌ڵگا و ئێزدییه‌كانیان ده‌كرد، له‌كاتێكدا ئێزدییه‌كان پێویستیان به‌پاراستن هه‌بوو، ئه‌وان هه‌ڵاتن و له‌گه‌مه‌یه‌كی سیاسیدا پشتیان كرده‌ ئێزدییه‌كان و له‌ دووره‌وه‌ بوونه‌ بینه‌ری ڕووداوه‌ دڵته‌زێنه‌كان.
‌له‌و په‌لامار و هێرشانه‌ی داعش بۆ سه‌ر شه‌نگال هه‌زاران ژن و منداڵی ئێزدی بوونه‌ قوربانی ئه‌و جه‌نگه‌ ئایینیه‌ و كه‌وتنه‌ ژێر ده‌ستی داڵاشه‌كانی داعش، ژن و كچه‌ پاكیزه‌كانی ئێزدی دووچاری ناخۆشترین و دڕندانه‌ترین شێوه‌كانی ده‌ستدرێژی و به‌كۆیله‌كردنی سیكسی بوونه‌وه‌ و بازرگانی و كڕین و فرۆشتنیان پێوه‌ كرا.
دیمه‌نه‌كانی ئه‌و داگیركارییه‌ هێنده‌ ترسناك و ناخهه‌ژێن بوون، مرۆڤ به‌زه‌‌حمه‌ت ده‌توانێت ئه‌و ڕووداوانه‌ فه‌رامۆش بكات، كه‌ له‌كاتی ده‌ستگیركردنی ئێزدییه‌كان به‌ده‌ستی داعش تووشی چ نه‌هامه‌تی ده‌رده‌سه‌ریه‌ك بوون، له‌یه‌كه‌م هه‌نگاودا هه‌موویان له‌یه‌كتر دابڕین، دایك له‌منداڵه‌كانی جیا كرایه‌وه‌ و ئاگایان له‌یه‌كتر نه‌ما، ئافره‌تی گه‌نج و به‌ته‌مه‌ن، جوان و منداڵكار، بێ منداڵ و منداڵدار، سه‌ڵت و خێزاندار، له‌یه‌كتر جیاكرانه‌وه‌، دایك له‌منداڵ، كچ له‌دایكیان دابڕین و كوڕه‌كانیشیان له‌وان جیا كرده‌وه‌، ئه‌وانه‌ی جیاده‌كرانه‌وه‌ ده‌یانبردن و به‌ڕاكێشان به‌دوای خۆیاندا ڕیانده‌كێشان، منداڵ هه‌بوو دامێنی دایكی ده‌گرت و نه‌یده‌ویست لێی جیاببێته‌وه‌، قیژه‌ی ژن و گریانی منداڵ دنیای پڕكردبوو، ئه‌و دیمه‌نه‌ سامناكه‌ به‌ر‌دی ده‌هێنایه‌ ده‌نگ، ده‌توت ڕۆژی حه‌شره‌، به‌جۆرێك كاریگه‌ری له‌سه‌ر ئه‌وان داناوه‌ ئێستا ژنه‌ ڕزگاربووه‌كانی ده‌ستی داعش ده‌ڵێن كاتێك ده‌كه‌ویه‌ به‌رده‌ستی داعش ڕۆژی سه‌دجار مه‌رگ به‌ئاوات ده‌خوازی، به‌ڕاستی مه‌رگ له‌ ژیانی ژێر ده‌سه‌ڵاتی داعش ئاسووده‌تره‌، له‌و سۆنگه‌یه‌وه‌ له‌كاتی ده‌ستگیركردنی ئێزدییه‌كان وابڵاوكرایه‌وه‌ یه‌كێك له‌ ژنه‌ ئێزدییه‌كان به‌هه‌ر شێوه‌یه‌ك بووه‌ له‌شوێنی ده‌ستبه‌سه‌ركردنیه‌وه‌ په‌یوه‌ندی به‌مێرده‌كه‌‌یه‌وه‌ كردووه، به‌ڵام بۆ ڕزگار بوون نا، به‌ڵكو بۆ ئه‌وه‌‌ی داوا له‌هێزه‌كانی ئه‌مریكا بكه‌ن، ئه‌و شوێنه‌ی ئه‌وانی تێداده‌ستبه‌سه‌ر كراون به‌فڕۆكه‌ بۆردومانی بكه‌ن، بۆ ئه‌وه‌ی بمرن و له‌ده‌ست داعش ڕزگاریان ببێت، ئه‌وه‌ باشتره‌ له‌ دنیای پڕ شه‌رمه‌زاری دوای ڕزگاربوون له‌ ده‌ستی داعش، ئایا ئه‌مه‌ چ نه‌هامه‌تیه‌كی ژیانه‌، مه‌رگ به‌ئاوات بخوازیت.
ئه‌و هه‌واڵ و چیرۆكانه‌ی دوای ده‌ستبه‌سه‌ركردنی ژن و منداڵه‌ ئێزدییه‌كان بڵاوده‌بوونه‌وه‌، به‌شێوه‌یه‌ك ترسناك بوون، ته‌نانه‌ت مێژووش شه‌رمه‌زاره‌ له‌ دووباره‌ كردنه‌وه‌یان‌، كه‌ داعشه‌ ده‌رون نه‌خۆش و دڵڕه‌شه‌كان به‌وپه‌ڕی دڕندایه‌تیه‌وه‌ مامه‌ڵه‌یان له‌گه‌ڵ ژن و منداڵه‌ ئێزدییه‌كان ده‌كرد، دوای ده‌ستبه‌سه‌ركردن و جیاكرنه‌وه‌یان به‌شێك له‌ومنداڵانه‌ ناچاركراون چه‌ك هه‌ڵبگرن و به‌بێ ویستی خۆیان به‌شداری جه‌نگ و كرده‌وه‌ تیرۆرستیه‌كان بكه‌ن، ‌بێگومان ئه‌گه‌ر سه‌ركێشیان بكردایه‌ بێ بیركردنه‌وه‌ ده‌كوژران، هه‌ربۆیه‌ له‌پێناوی مانه‌وه‌ له‌ژیان ناچاربوون، قبوڵی بكه‌ن، ببنه‌ چه‌كداری داعش و به‌شداری جه‌نگ بكه‌ن، به‌شێكی تر له‌و منداڵ و كچه‌ هه‌رزه‌كارانه‌ی له‌و ماوه‌ی لای داعش ده‌ستبه‌سه‌ر بوون، ئه‌گه‌رچی زۆر منداڵ بوون و هیچ هه‌ستێك ڕێگابه‌وه‌ نادا، به‌ڵام ئه‌وان ده‌ستدرێژی سیكسیان كراوه‌ته‌وه‌ سه‌ر و ناچاركراون شووبه‌ داعشه‌كان بكه‌ن، دواتریش چه‌ندین جار بازرگانی و كڕین و فرۆشتنیان پێوه‌ كراوه‌، به‌ڕاستی ئه‌سته‌مه‌ ئه‌و ڕۆژگاره‌ تاڵه‌ وا به‌ئاسانی له‌بیر خۆیان به‌رنه‌وه‌.
ئه‌و منداڵه‌ ئێزدیانه‌ی پێشتر له‌لای ئه‌و گروپه‌ تیرۆرستیه‌ی داعش ده‌ستبه‌سه‌ر بوون، كوڕه‌كان به‌شداری شه‌ڕ بوون و كچه‌كانیشیان ده‌ستدرێژی كراوه‌ته‌سه‌ریان، له‌ڕووی ده‌روونیه‌وه‌ له‌وپه‌ڕی ماندووبوون و شه‌كه‌تیدابوون، كه‌له‌ده‌ستی ئه‌و گروپه‌ تیرۆریستیه‌ ڕزگاریان بووه‌ و گه‌ڕاونه‌ته‌وه‌ ناو خێزانه‌كانیان، به‌ڵام سه‌دان كێشه‌ و گرفتی ده‌روونیان هه‌یه‌، نه‌یانتوانیوه‌ وه‌كو منداڵێكی ته‌ندروست بگه‌ڕێنه‌وه‌ ناو كۆمه‌ڵگا و خێزانه‌كانیان، شوێنه‌واری ئه‌شكه‌نجه‌ و ده‌ستدرێژی و ناچاركردنی به‌شداری شه‌ڕ و كرده‌وه‌ تیرۆریسستیه‌كانیان به‌سه‌ر جه‌سته‌ و ده‌روونیانه‌وه‌ دیاره‌، پێویستیان به‌ چاره‌سه‌ری دروونی و جه‌سته‌یی هه‌یه‌، بێگومان خێزان و كه‌سوكاری ئه‌و منداڵانه‌ ناتوانن وه‌ك پێویست چاره‌سه‌ری ده‌روونی و جه‌سته‌ییان بۆ بكه‌ن، له‌وانه‌یه‌ به‌هۆی نه‌شاره‌زاییه‌وه‌ هه‌ندێك جار له‌جیاتی چاره‌سه‌ر زیاتر ده‌روونیان ئاڵۆز بكه‌ن، بۆیه‌ پێویسته‌ به‌رپرسانی حكومه‌ت و ڕێكخراوه‌ مرۆیی و نێوده‌وڵه‌تیه‌كان خه‌مخۆرانه‌ به‌ ده‌نگیانه‌وه‌ بێن و خه‌میان بخۆن.
ژنانی ڕفێندراوی ئێزدی یه‌كێكی ترن له‌و قوربانیانه‌ی ده‌ستی تیرۆرستانی داعش، به‌تایبه‌ت ئه‌و ژنانه‌ی له‌ئه‌نجامی ده‌ستدرێژی سیكسی تیرۆریستانی داعش دووگیان بوون و بێ خواستی خۆیان منداڵیان بووه‌، ئه‌و ژنانه‌ دووجار قوربانین، له‌لایه‌ك ده‌ستدرێژی سێكسیان كراوه‌ته‌سه‌ر و له‌لایه‌كی تریش بوونه‌ته‌ دایكی منداڵێك، كه‌له‌ناو خێزان و هۆزه‌كه‌یدا قبوڵكراونیه‌ و به‌پێی دابونه‌ریتی ئێزدی ئه‌و منداڵانه‌ی دایكیان ئێزدی و باوكیان داعشن، قبوڵكراو نین، له‌به‌رئه‌وه‌ ئه‌و ژنانه‌ ناچاربوون ده‌ست له‌ منداڵه‌كانیان هه‌ڵگرن، ئه‌مه‌ش جورێك سته‌می به‌رامبه‌ر به‌و منداڵانه‌ تێدایه‌، كه‌ دایكیان سته‌می لێكراوه‌ و ده‌ستدرێژی كراوه‌ته‌سه‌ر، به‌ڵام ئه‌م منداڵانه‌ تاوانیان نیه‌، ڕاسته‌ ئایینی ئێزدی هاوسه‌رگیری له‌نێوان ئێزدیه‌ك و یه‌كێكی تر قبوڵ نیه‌، به‌ڵام دیاره‌ ئه‌و ژن و كچه‌ ئێزدیانه‌ به‌ویستی خۆیان شوویان به‌داعشه‌كان نه‌كردووه‌ و به‌بێ خواستی خۆیان منداڵیان هێناوه‌ته‌ دنیاوه‌، بێگومان نه‌دایكیان و نه‌منداڵه‌كان گوناهێكیان نییه‌، هه‌روه‌ك یه‌كێك له‌ ژنه‌ ڕزگابووه‌كانی ده‌ستی داعش داوای له‌ خێزانه‌كه‌ی و هۆزه‌كه‌ی و جیهان ده‌كات، له‌وه‌ زیاتر ئه‌شكه‌نجه‌یان نه‌ده‌ن، چونكه‌ ئه‌وان به‌ویستی خۆیان نه‌بوونه‌ته‌ دایك و ده‌ستدرێژیان كراوه‌ته‌سه‌ر، داوا ده‌كات ئه‌و منداڵانه‌ به‌هۆی دابونه‌ریته‌وه‌ له‌ باوه‌شی دایكیان دوورنه‌خرێنه‌وه‌، له‌به‌رئه‌وه‌ پێویست بوو بیر له‌ ڕێگاچاره‌یه‌كی نه‌رم و هێمنتر بكرایه‌ته‌وه‌، بۆیه‌ ئافره‌تانی ڕزگاربووی ده‌ستی داعش پێویستیان به‌ چاودێری ورد هه‌یه‌، كه‌ پسپۆڕی ده‌رونی به‌رده‌وام ڕێنمایی ده‌روونیان پێ بدات.
به‌داخه‌وه‌ ئه‌و بارودۆخه‌ی ژن و منداڵانی ڕفێندراوی ئێزدی هه‌م له‌لایه‌ن ڕاگه‌یاندنه‌كان و هه‌م لایه‌نه‌ په‌یوه‌ندیداره‌كان جاری واهه‌یه‌ به‌هۆی پیشاندانی نادروست و مامه‌ڵه‌ی نه‌شیاو و به‌زه‌یی هاتنه‌وه‌ پێیاندا هێنده‌ ده‌روونیان ئازار ده‌ده‌رێت، نه‌بوونی باشتره‌، وه‌ك ژنێكی ڕزگاربووی ژێر ده‌سه‌ڵاتی داعش داوای ده‌كرد له‌وه‌ زیاتر ئازار و ئه‌شكه‌نجه‌ نه‌درێن، بۆیه‌ پێویسته‌ ڕێزیان بگیرێت و هاوكاری بكرێن و به‌هانایانه‌وه‌ بێین، تا له‌ڕووی كێشه‌ی جه‌سته‌یی و ده‌روونی ئه‌گه‌ر بتوانن له‌ماوه‌یه‌كی دووریشدا بێت، بگه‌ڕێنه‌وه‌ دۆخی ژیانی ئاسایی خۆیان.

Previous
Next
Kurdish