Skip to Content

مانچستەر … ئەدیب نادر

مانچستەر … ئەدیب نادر

Closed
by August 14, 2020 General, Poems

لە حیکایەتێکی هەزارو یەك شەوە دێمە دەرێ و تاڵەمووە سپییەکانم هەڵدەوەرن
دەنگێك جاڵجاڵۆکەیەکی جادووییە، تەونی دنیاکانی شیعر ڕایەڵ دەکات
دنیاکانیش بێشومارن
ڕۆژەکان فەرووی خۆڵەمێشییان پۆشیوە
گیانی گەندەموویی دنیا شەونماوییە
پێیەکان وەکو دوو سەگی بێ ئۆقرە پەلکێشی سەر شۆستەکانم دەکەن
گەڕان تراویلکەیەکی سرکە
مەوداکان دەکشێن و سەگەکانیش دوای تینوێتیی هەمیشەیی خۆیان دەکەون
مانچستەر
لە نیگای گورگەکانی جەمسەر ڕەنگوڕووی ئەم وەرزەی دزیوە
هاوڕێ نادیارەکان جێپێی سێبەرە بزرەکانم هەڵدەگرن
هەرجارەو لەناو دەنگمدا تۆوی ناوێك چرۆ دەکات،
لە شایی یادوەرییەکاندا مشتێ پێکەنین دەفڕێت
ئیتر بە قەفەزێکی لێوانلێو لە ترپەی ڕاکردووەوە دەکەومە دوای سەگەکان
دارەکان پۆشتە نین هێشتا، خشە خشیان لێ نایە
فیشکە فیشك دەدەنە بەرگوێی بایەکی تێپەڕیو
لە ( چاینا تاون) هاوڕێکەم دەڵێ بوەستە ، ئێرە ئەفسانەییە
دوو مەلی ڕەش لە ڕوخسارمەوە دەردەچن
لەناو پۆلە خەندەیەکی چەقاوەسوودا ون دەبن
نیگاکان مەست دەبن و ڕێی هاتنەوە نادۆزنەوە
خێلییەك لەناو هێلوونی چاوەکان جێ دەمێنێ
یادم دەبێتە مۆزەخانەی دیمەنەکە
بە نیازم سەرێك لە پەیکەری (ئاڵن تیوورینگ)بدەم، ئێستا چۆلەکەیەکیش لەسەر سێوەکەی ناو لەپی
نانیشێتەوە
ئاڵن تیوورینگ لەناو پارکی (ساکڤیڵ)دا برۆنزێکی سەوز هەڵگەڕاوو چڵکنە
درەختە ڕووتەکانیش بێدەنگن
دەستی هۆمۆسێکسواڵەکان باوەشیان بە پەرداخی زل زلی بیرەدا کردووەو
نیگاکانیان دەڵێ ئێوەش پەلکەزێڕینەن
ڕوخسارمان کێڵگەیە، داهۆڵ زەردەخەنەکەی هەڵفڕاندووە
وێنەیەكی لەگەڵ دەگرم و پێی دەڵێم: ئەی هاودەمی تیرۆژە کزەکان و درەختە ناپۆشتەکان و چۆلەکە
هەڵنەنیشتووەکان، دەبێ بڕۆم بەدوای جیهانەکەی خۆمدا بگەڕێم
بە ئاماژەکانی پەنجە کەڵەیەکی نینۆك درێژی وەك باڵندەیەکی ڕۆخی ئاو
بە شەوارە بکەوم و عەترێك وشەکانم لە گۆ بخات
زارێك بڵێ واز لە کتیبخانە وێڵگە ئاسا بۆرخێسییەکەت بهێنە
هەتا دەگەیتە (سەینت ئانس سکوێر)
هەتا دەگەیتە …
دەبێ بڕۆم، بیر لە شیعرێك دەکەمەوە
بەڵام جارێ بۆم نانووسرێ، چونکە هۆشم ئالن گینزبێرگ گەمارۆی داوە
ئەو دنیایەشم ڕاو نەکردووە کە هەناوی شیعر دەیکات بە مرواری
ئای چەند دنیای تر بە ملی هەناسەکانمانەوە قەتیسن
چەند وێنەیەکی تر دەگرم، دەڵێی سێوێکم کراومەتە دوو لەتەوە لەگەڵ
نووسەری ڕۆمانی “کوژرانی کتێب فرۆشەکە”
دوای هەزارەها هەنگاو لە قەراغی ئەو قەڵبەزانەدا دەوەستم
کە بە بێشەڵان دەچن
لە نابەینی قەدە کەفچەڕەکاندا منداڵان ڕاکە ڕاکیانە
دەنگیان تەڕ تەڕ، پێی شادییان پەتی پەتی
هەتاو زەردەیەکی شەرمنانە هەڵدەڕژێت
چاوێکی لێ دەقرپێنم، هامانا ئێستا کەی وەختی سەرەتاتکێیە
پێکەنین کاری سەرلەبەیانیانە
ئەفسوونێکی ئەمازۆنیی دەمتاسێنێ ، درەنگ وەختەو سەرمایش
دزە رێگایەکی بۆ ناو پاڵتۆکەم دۆزیوەتەوە
دەزانم سەگەکان لە گەڕان هەراسان نابن، بەڵام ساڵەکان بێبەزەیی بوونە لەگەڵیان
لەسەرخۆ بەرەو وێستگەی پاسەکانی (ڕۆچدەیل) دوای خۆیانم دەخەن
بوتڵە مارتینییەکان بە تامێکی سەیر ئەندێشەم ئاوڕشێن دەکەن
شووشە هاینیکنەکانیش ڕووناکیی بە ئەشکەوتێکی بێ شەمشەمەکوێرە دەبەخشن
یانی ئەم گۆیە لەناو مەستییەکی کریستاڵیی سەقام دەگرێ
هەتا خۆم بۆ ڕاو کردنی خەونە نەبینراوەکانم ئامادە بکەم
وەك هەتاوێکی کزۆڵە – زەردەخەنە هەڵبڕێژم
ناوی ڕۆماننووسەکە لە دەنگمدا دەبێتە سەدایەکی شەقڵگرتوو
منیش سێبەرێکی ناو سێبەرەکانم
ئەو ساتانە خۆیان بە یەخەمەوە هەڵدەواسن
نازانم چی، وا لە ناوێك دەکات وەكو لیکی ناو زار وابێت
بەڵام سبەی کە هەواڵی مردنێك دەبیستم
دەتاسێم، دەڵێی من ئەوم تووشی دڵەکوتە هێناوە
ئیتر کەڵکەڵەم پڕ دەبێ لە ئایدیای بینینی و
وەك پەنجەرەیەکی ڕوو لە ئاسۆ کتێبەکەی دەکەمەوە

مانچستەر – نیسانی 2018

Previous
Next