Skip to Content

گفتوگۆ له‌گه‌ڵ: سمكۆ محه‌ممه‌د له‌مه‌ڕ ئه‌حلام مه‌نسوور… سازدانی: سۆران محه‌ممه‌ده‌سووره‌

گفتوگۆ له‌گه‌ڵ: سمكۆ محه‌ممه‌د له‌مه‌ڕ ئه‌حلام مه‌نسوور… سازدانی: سۆران محه‌ممه‌ده‌سووره‌

Closed
by ئاب 24, 2020 General, Opinion

“نەوەی ئێستا نەوەی ئایفۆن، كەوانتەر، ماڵ و ماشێنی بەرز و زێڕن، نەك نەوەی دەقێكی باڵا و خاوەن كەسایەتیی.”

• له‌مێژووی نووسینی ژنان، ستاندنه‌وه‌ و گه‌ڕاندنه‌وه‌ی ئه‌و زمانه‌ پاوانكراوه‌، له‌لایه‌ن پیاوانه‌وه‌، له‌ ئه‌ورووپا، كارێكی هه‌وه‌نته‌ و زوو مه‌یسه‌ربوو نه‌بووه‌، ته‌نانه‌ت تا هه‌نووكه‌ش ڕه‌هه‌ند‌ی ڕه‌خنه‌ی فێمێنیستیی، ئه‌م باسه‌ ده‌خاته‌ ژێر لێكۆڵینه‌وه‌ی وردی: ده‌روونناسیی، كۆمه‌ڵناسیی و فه‌لسه‌فییه‌وه‌. ئه‌مه‌ له‌گه‌ڵ ئه‌م هه‌موو گه‌رموگوڕییه‌ی ژنانی ئه‌ورووپیی، هه‌ر له‌ وۆلڤ، دی بۆڤوار، سیكسۆس و ئێلیگاری… كه‌چی هه‌نگاوی ئه‌حلام مه‌نسوور له‌ كوردستان، ئاوئاهه‌نگ نه‌بوو له‌گه‌ڵ كۆمه‌ڵێك له‌ ده‌سته‌خوشكانی، چونكه‌ ئه‌مه‌ش ڕێژه‌ نه‌بوو و تاكتاكیش نه‌ده‌بینرا. واته‌ مه‌نسوور له‌ بێنازییدا بوو، به‌ ڕێگه‌یه‌كه‌وه‌ بوو كه‌سی به‌سه‌ره‌وه‌ نه‌بوو، ڕێگه‌یه‌ك، كه‌ سه‌ره‌تا و كۆتایییه‌كه‌ی تێكشكاندنی به‌ها و ڕه‌خنه‌گرتنبووه‌. تۆ چۆن مه‌نسوورت ناسیی، چۆن له‌ مه‌نسوورت ڕوانیووه‌ و چ نهێنییه‌كت له‌لایه‌ بیڵێیت؟

كێشە وململانێی نێوان نووسین و زمان، وه‌ك كەرەستەیەكی سەرزارەكیی بۆ تەعبیركردن لە شتەكان، گێڕانەوە و بەرگرییكردن لە تاك و كۆمەڵگە، كێشەیەكی ئەزەلیی بووە و لەگەڵ سەیروورەی مێژوودا لایەنێك بووە لە ژیان، بەڵام ڕه‌خنه‌ و ناڕەزایەتیش لەو ژیانە سەپێنراوە، بەشێكی دیكە بووە لە سەلماندنی خود، بەتایبەتی ئەو خودانەی، كە پێش ڕووداو كەوتوون، یان ئەو كاره‌كتەرانەی لە خەڵكی عەوام زیاتر ده‌ركیان بە پێشهاتەكان كردووە، ئەوەی، مێژووی نوێ‌ بۆمان دەگێڕێتەوە، ئەو ئەدەبە نییە، كە لە ڕێگەی خەیاڵ و فەنتازیاوە گریمانەی پێشهاتەكانی ژیان دەكات، بە پێچەوانەوە ئەدەبی مۆدێرن وێنە، چیرۆك و پاڵەوانەكانی نەناسراون، ئەحلام، وه‌ك كاره‌كتەرێك، چونكە خۆی شەفاف و ناسراو بوو، هەروەها نەترسانە كۆمەڵگەی بەجێهێشتبوو، ئاوهاش پاڵەوانی چیرۆكەكانی ناسراو بوون، زۆر فشاری بۆ نەبردوون و زیندانیی نەكردوون، بەپێچەوانەوە دەستواڵای كردوون، ئاخر هەندێك ڕۆماننووس هەن بە ئەنقەست گوایە گرێی دەروونیی لەلای خوێنەر درووست دەكەن، پاڵەوانەكانیان لەنێو ڕۆمانه‌كانیاندا زیندان و كۆیلە دەكەن، كە ئەمە لایەنێكی نێگەتیڤی هەیە بۆ خوێنەرێك، كە لەسەر ڕۆمان، یان دەق بنووسێ، بۆیە ئەو گەرەكی بوو، كە نووسینەوەی مێژوو بە چیرۆكی واقیعیی و پاڵەوانی واقیعیی بسەلمێنێت. ئەو، ژنێك نەبوو لەو ڕیزبەندییەی ژنان وەستابێت، تاكو زمان پاوان بكرێت، بەپێچەوانەی هەموو ئەو كەسانەی تێیگەیشتووبوون گوایە فكری فێمێنیستیی لە مێشكدا بووە، بڕواناكەم ژنانی ناسراو و ناوداری ڕۆژاواییش لەنێو ئەدەبدا بەو فكرە كاریان كردبێت، لە نێو فارسدا فەروخی فروخزاد و لەنێو عەربیشدا نەوال سەعداوی و فاتیمە مەرنیسی ... خاوەنی ئەو گوتارە نەبوون، كەوابوو ئەوان لەگەڵ تێكشكاندنی بەهای شتەكان نەبوون، بەڵكو لەگەڵ دەق شكاندنی كولتووریی و نەریتخوازیی بوون، ناسینی من بۆ ئەحلام، دنیایەكی زۆر تایبەت بوو، لەوێوە، كە ئاشنایەتیم بە نووسینەكانی كرد، كە ئەوكات هەرزەكار بووم، تاگەیشتە ئەوەی من پێگەیشتم و ئەو پیر بوو، بەڵام هەمان ڕیتم و ستایلی ئەدەبیی هەبوو، بەڵام خەسڵەتی هەمان خەسڵەتی جارانی یاخیبوون بوو، بۆیە من نەمتوانی دوور بكەومەوە لێی، وه‌ك هاوڕێ‌ و كەسێكی نزیكی و كوڕی، كەوابوو ناسینی من تا ئەو جێگەیەی، كە نهێنی ژیانی بەشێكی لەلای من دەدركاند، وه‌ك خۆبەتاڵكردنەوە لەو شتانەی بە نووسین ناگوترێ‌، بەڵام لێرەدا بەكەڵكی خوێنەر نایات تاكو لەو پنتەوە ئاشنایی هەبێت ئەوانە بگێڕمەوە، ئەمە بۆ زەمەن و نووسینەوەی یادەوەریی خۆم بەكار دەهێنم، چونكە ناكرێ‌ ئەحلام، وه‌ك كارتێك بۆ خۆدەرخستن و بازرگانیی لە ئەدەبدا بەكاربهێنین، ئەو چ لە ڕێگەی نووسین و چ لە ڕێگەی یادەوەرییەكانی خۆیەوە شوێنێك هەیە، وه‌ك محەتە بۆ ناسین و ئاشنایەتیی بە خوێنەر.

• ئه‌حلام مه‌نسوور له‌نێو ئه‌ده‌بیاتێكی نێرینه‌دا ده‌رده‌كه‌وێت، به‌ زمانێكی ژنانه‌ ده‌نووسێت، خۆی ده‌نووسێته‌وه‌ و ڕه‌خنه‌ ده‌گرێت. له‌م ڕووانگه‌یه‌وه‌ ده‌كرێت باس له‌ سه‌ره‌تاكانی ده‌ستبردن بۆ نووسین له‌لای ئه‌حلام مه‌نسوور بكه‌یت؟

• ئه‌حلام مه‌نسوور، ڕه‌خنه‌ی خۆی ئاڕاسته‌ی ئه‌و كه‌سانه‌ ده‌كات، كه‌ “مێ”ن و ده‌ڵێت: “ده‌یانه‌وێ به‌ پیاوان یه‌كسان بن، نازانن كه‌ پیاوانیش سه‌رشۆڕن” (گره‌وی چاوه‌كانی ئه‌م، 2008، ل 71)‌. تۆ ئه‌مه‌ ده‌به‌ستیته‌وه‌ به‌ ناپێوه‌ستیی ژن به‌ پیاوه‌وه‌ له‌لای ئه‌حلام مه‌نسوور، یان مه‌نسوور باوه‌ڕی به‌ یه‌كسانیی ژن و پاو نه‌بوو، كه‌ به‌شێوه‌یه‌كی زه‌ق ڕه‌خنه‌ی له‌ جیاكاریی و پێگه‌ی پیاو گرتووه‌، یانیش له‌ ئاقاریی مرۆڤدۆستیی خولاوه‌ته‌وه‌، یانیش هه‌میشه‌ به‌وهیم و خه‌یاڵی كه‌سایه‌تییه‌كی داهێنه‌ریی لووتبه‌رزی ئاڤانگاردیست، مه‌نسووری ئاڕاسته ‌كردووه‌‌؟
هه‌ر له‌م سۆنگه‌یه‌وه‌، تۆ وه‌ك پیاوێك، (كه‌ نێزیكیش بوویت له‌ ئه‌حلام مه‌نسوور) ده‌رباره‌ی ئه‌م قسه‌یه‌ی، چیت هه‌یه‌ بۆ گوتن؟

سەبارەت بە پرسیاری ئەوەی، كە ئەحلام لەنێو خوێنەرانی نێرینەدا زیاتر دەردەكەوێ‌، بە پێچەوانەوە دەیبینم، چونكە ئەوە نووسەری مێیینە نییە، كە لەنێو ئەدەبی نێرینەدا دەردەكەوێ‌ و بە پێچەوانەوە لەنێو مێیینە دەرناكەوێ‌، چونكە ئەدەب و كایەكانی دیكە، كە سەرجەمیان چالاكیی دەرەوەی چالاكییە ئاسایییەكانی ڕۆژانەی ژیانی ئینسانن، گوتارەكەی بەدەست نێرینەوە بووە و هەر ئەوان ئاڕاستەیان كردووە، لەحاڵێكدا ئەم تێگەیشتنەش، كە ناوی نراوە خودنووسینەوە، لە زۆربەی تێكستەكاندا دیار نییە و ئیددیعای ئەوەی  بۆكراوە، ئەمە بەنیسبەت ئەدەبێك، كە ناوی ژنانی لێنراوە وێرانترە، چونكە خودنووسینەوە ئەو تێگەیشتنەی لەلای ژنان دروستكردووە، كە لەجیاتی خودیه‌تی خۆی، جەستەی خۆی نووسیوەتەوە، وه‌ك كاڵایەك و ڕیسككردن لەو سانسۆرەی، كە ڕێگە لە بەكاڵابوونی دەگرێت لە ئاستی فەرهەنگیی و كۆمەڵایەتیی، چونكە پیاو بەو شێوەیە تەماشای ئەو جۆرە خود نووسینەوەیە دەكات، بەوپێیەی، كە كۆدی ئەو نووسینانە لەوێوە ئاشكرا دەبێت، كاتێك واتای ئەو نووسینەوانە دەبێتە مایەی ڕاكێشانی خوێنەر لە ڕێگەی جەستەوە.

“مارەیی و زێڕ قبوڵكردن، وه‌ك پاداشتی سێكسیی لەلای ژنان و بە ئیفتیخارەوە، یەكێك لە ماناكانی بە كاڵاكردنی ژنە”

ڕوونتر بڵێم ئەو نووسینانەی، كە بەزمانێك ئاڕاستەی پیاوكراوە و لە وێنەی سێكسیی بەولاوە هیچی تر نیین، بۆیەش جگە لەپیاوان لە دنیای ئەدەبدا، ژن نییە بەدەقی ژنێكی دیكە سەرسام بێت و خوێندنەوە بۆ دەقەكە بكات، ئەمە جگە لەوەی، كە تەنیا پیاو لە ئەدەبی كوردییدا خوێنەری دەقە بەمانا تیۆرییەكەی، ئەم فەزایەش كارێكی وەهای كردووە، كە دەقی كوردیی چ شیعر، چ ڕۆمان، چ چیرۆك و … مانایەكی نوێمان پێنەبەخشێ‌، یان لانیكەم نەتوانێ‌ ڕیسك بكات و دوور بكەوێتەوە لەدەقی بیانی، ئێمە سەروكارمان لێرەدا لەگەڵ ئاڕاستەی دووهەمی ژنیه‌تیی هەیە و بۆ دەستبەسەرداگرتنی ناسینی هۆیەكانی هەقیقەت، پیاو دەبێ‌ ژن بێت‌، دیۆنیزمی نیتشە هەم ژنە و هەم پیاوە، بوونەوەرێكی دووڕەگەزیییە، كە بەر لە پەیدابوونی بەرانبەریه‌تیی، دووانیی ژن و پیاو هەبووە، هەموو ئەو ئەدەبەی، كە كورد، فارس، عەرەب و پێشتریش ڕۆژاوایییەكان هەیان بووە، كارەكتەرە سەرەكییەكەی مێیینە بووە، چونكە گوتاری تەواوی كایەكانی ژیان بەتایبەتی ئەدەب، بەدەست پیاوانەوە بووە، بۆیە پێداهەڵدان و كاره‌كتەری سەرەكیی ژن بووە، ئەوەتا شكسپیر لە ڕۆمیۆ و جۆلێت، عشتار لە هەزار و یەك شەوە، كورد و فارس لە خورشید و خاوەر، شیرین و فەرهاد و … ئەحلام بە پێچەوانەی هەموو ئەو ژنانەی، كە گوایە ژنانە دەڕواننە كێشەی ژن و یەكسانیی، بڕوای وابوو یەكسانیی ژن و پیاو بریتییە لەوەی، كە ژنان ئاگاداری دۆخی دەروونیی پیاوانەی خۆیان بن، كە بەشێكە لە جەوهەری دیوی ناوەوەی ژن، هەروەها پیاوانیش بەو شێوەیە ئاگاداری دۆخی ژنانەی ناوەوەی خۆیان بن، كە لایەنێكی دەروونییە، ئەمە لە ڤێرجینیا وۆڵف فێربوو بوو، ژنان بەو پێیەی، كە جێگەی سەرنجی پیاوانن، هەمیشە ئەدەبەكەشیان ڕۆڵی نووسەرێكی پیاوانەی پێدراوە و ئەو مەرجانەشی بەسەردا فەڕزكراوە، لەكاتێكدا، ئەگەر ژنان وه‌ك پیاوان بییان نووسیبایە و خەسڵەتییان وه‌ك پیاوان بوایە، مەزنیه‌تیی ژن و جیاوازییەكانیان لەكوێدا دەردەكەوت لەگەڵ پیاودا، بۆیە ئەو هەڵاتن لە شوناسی ژنیه‌تیی لەلای، وه‌ك هەڵاتن لە ئینسانییەت وابوو.
بۆیە ئەم تێڕوانینە جیاوازیی هەبوو، چونكە ئەو زووتر گەیشتبوو بەو پێشكەوتنەی ڕۆژاوا. ئەگەرچی بزووتنەوەی فێمێنیستیی بەقینێكی زۆرەوە سەرهەڵدەدات، تاكو مەسەلەی یەكسانیخوازییی پیاو و ژن لەدوای سەتەی 20 دەبێ‌ بە ستایلی ژیان، لەنێو ئەدەبی ڕۆژهەڵاتیی، عەرەبی و فارسیش بەو شێوەیە بووە، ئەحلامیش، كە سەرەتا چیرۆكی “پرد”ی نووسی و دەنگیدایەوە و گرێیەكی دەروونیی بۆ خوێنەر لەنێو نێرینە و مێیینەشدا درووست كرد، چونكە كاره‌كتەری پاڵەوانەكەی ژنێكی یاخی بوو لە ئەخلاقی سەپێنراوی كۆمەڵگە، پاڵەوانێكی یاخی بوو بارگاویی بە سێكس، حەبكەی چیرۆكەكەش بابەتێكی سێكسیییە، بۆیە پیاو دەیخوێننەوە و سەرسام دەبن پێی، بەو پێیەی، كە كێشەی ژن، كێشەی كۆمەڵگەیە. بابەتێكی هەمیشە زیندوو بووە و تائێستاش زیندووە، نووسینەوەی چەپاندنی سێكسیی لە گوتاری پیاوانەدا جێگەی كراوەتەوە، بەڵام ئەحلام ئەمەی نەكردووە بۆ ئەوەی بناسرێت، یان لە ڕێگەی ئەم جۆرە بابەتەوە ببێتە كاره‌كتەرێكی چالاك، بەڵكو زیاتر لەوانی دیكەی مێیینە ڕیسكی كردووە، بۆیە بەمشێوەیە دەستی بۆ ئەدەب بردووە، تاكو گوتاری پیاوانە هەڵبسەنگێنێ‌ و دواتر لە ڕێگەی سێكسەوە دەق بشكێنێ، كە یەكێكە لە پیرۆزییەكانی كۆمەڵگە. تا ئەوكات ژنێكی وەها دەرنەكەوتبوو بەو ستایلە كار بكات، ڕه‌خنه‌گرتنەكەشی هەر لە گوتاری پیاوانەیە، كە مامەڵەی خراپ، ناشایستە و نامەدەنیانە لەگەڵ ژن دەكەن، كە ئەمە بەرهەمی گوتاری ئایینیی و كولتووری داخراوی كۆمەڵگەی عەرەبیی بوو بۆ كورد مابووەوە.
مەسەلەی سەرشۆڕیی پیاوان، كە دوو مانا و دوو ڕەهەندی هەیە، یەكێكیان ئەوەیە؛ كە پیاو بەو مێژووە ستاندالەی ڕابردوو ژیانی هێناوە و یەك ستایلی دەقگرتووی ژیانی بینیووە، بۆیە سەرشۆڕیی بۆ پیاوە باڵاكان، ئاغا، سەرۆك و پیاوی ئایینیی وه‌ك شێخ و مەلا و… بۆ ماوەیەكی كۆنی كولتووری عەرەبییە، ئەمە پلەبەندیی ژیان بووە، كە شتێك نەبووە بە ناوی یەكسانیی.
ڕەهەندەكەی دیكە مەسەلەی چەپاندنی سێكسیی بووە، كە پیاو هەمیشە وه‌ك ئەحلام دەڵێ:‌ سەرشۆڕی ویستێكی غەریزیی بووە، كە ژن تاكە هۆكاری دامركاندنەوەی ئەو غەریزەیە بووە و لەهەمانكاتیشدا مەترسیی و قەدەغە ئەخلاقییەكە بووە، جیاكاریی نێر و مێ‌ تا ئێستاش بەو فەزا بەناو كراوەیەی هەیە و بەو هەموو یاسایەوە، كە لەخزمەت ژنانە، بەو هەموو خۆ بچووككردنەوەیەی پیاو لەبەرانبەر سێكس و دواتر كردنی ژن و سێكس بە پێویستیی بازاڕیی، هەروەك لەلای چاوبرسیی و مێبازەكان هەستی پێدەكرێت، تەنانەت لە بەیەكگەیشتنی كوڕ و كچیش بەحەڵاڵیی هەمان مانای وەرگرتووە، مارەیی و زێڕ قبوڵكردن، وه‌ك پاداشتی سێكسیی لەلای ژنان و بە ئیفتیخارەوە، یەكێك لە ماناكانی بە كاڵاكردنی ژنە، كەوابوو چارەسەری ئەو جیاكاریییە بۆ منیش هیچ یەكسانیخوازیی چارەسەری ئیشكالیاتی باری كۆمەڵایەتیی و فەرهەنگیی كۆمەڵگەی دواكەوتوو ناكات. ئەحلامیش خاوەنی هەمان تێڕوانین بوو بۆ ژیان و سێكس، كە خەڵك بەو چاوە تەماشای دەكرد، ئەگەر مافی هاوڵاتیی بەبێ‌ لەبەرچاوگرتنی ڕەگەز نەبێتە ستایلی ژیان، ئەم تێڕوانینە تا ئەبەد بەردەوام دەبێت و گرێی دەروونییەكەش ناكرێتەوە، بەڵام ئەگەر وای دابنێین. كە ئەحلام بۆهیمیی و خەیاڵیی بووە، نەخێر كەسێكی زۆر واقیعیی بوو. تا ڕادەی بڕوابوون بە نووسینەوەی چیرۆكی ژیان. وه‌ك خۆی و هەندێكجاریش نائاگایییانە دەبوو بە كەسێكی ئیدیالیستیی، تەنانەت لەگەڵ عەتا محەمەدی چیرۆكنووس هەمیشە ئەو كێشەیەیان هەبوو، كە ئەحلام بە ستایلی كلاسیكیی دەینووسی و بڕوای بە واقیعیبوون هەبوو، نەك دروستكردنی خەیاڵ، پاڵەوانی وەهمی و پشتبەستن بە نەریتی نوێخوازیی.

• ئایه‌ دووانه‌ی داهێنه‌ر له‌ نووسین و كه‌سیه‌تیی دایه‌؟ مه‌به‌ستمان: نووسین و كه‌سایه‌تیی ده‌بێ له‌گه‌ڵ یه‌ك سه‌ودایی بكه‌ن؟ ئایه‌ بۆ نووسه‌ری داهێنه‌ر، یان نووسه‌رێك گه‌ره‌كی بێت داهێنان پێشكه‌ش بكات، كه‌سایه‌تیی بۆی گرینگه‌؟

• نووسینی ڕۆمان و دواجار ئه‌زموون به‌تایبه‌تیی، ئه‌وه‌ ده‌گه‌یه‌نێت، كه‌ ئه‌حلام، به‌په‌رۆشه‌وه سه‌یری ئاینده‌ی كوردستانی ده‌كرد، چونكه‌ به‌بێ ڕۆمان هاتنه‌كایه‌ی ئازادیی و خه‌ونی تاك، ئه‌سته‌مه‌. هه‌ڵبه‌ته‌ قسه‌ی ژنایه‌تیی (فێمێنیزم) و ژنیه‌تیی ئه‌حلام، له‌ ئه‌زموونه‌كانیدا ته‌نێ له‌سه‌ر ئه‌و‌ خاڵانه‌ ده‌ورناكه‌نه‌وه‌ وه‌ك ماف، خوێندن، زمانی ژنانه‌ و ئازادیی ژنی كورد، به‌ڵكو خواستێكی گه‌وره‌تر له نووسینه‌وه‌ی ئه‌زموون به‌تایبه‌ت له‌ “گره‌وی چاوه‌كانی ئه‌م” په‌نهانه‌، كه‌ زۆربه‌ی جار سنووری ده‌كه‌وێته‌ ئه‌ودیوی ژنایه‌تییه‌وه، ئه‌مه‌ش به‌ پێچه‌وانه‌ له‌گه‌ڵ نووسینی چیرۆك و ڕۆمانه‌كانیه‌تی‌‌. ده‌كرێت به‌ كورتی باس له‌م خواسته‌ی ئه‌حلام مه‌نسوور بكه‌یت؟

سەبارەت بە تێگه‌ی داهێنان و خودی نوسەری داهێنەر، ئەگەرچی من بۆچوونی تایبەتی خۆم هەیە و لەشوێنی تر قسەی جددی و مێتۆدیم لەسەر كردووە و بڵاودەبێتەوە، بەڵام من نەمزانیوە، ئەحلام وه‌ك تەكنیكی كاری نووسین و ئەدەبی نوێ‌ داهێنەر بووبێت، چونكە زاراوەی داهێنەر قورسە و پره‌نسیپ و مەرجی خۆی هەیە.

داهێنان بەرهەمهێنانی تێگه‌یە و خوڵقاندنی شتی نەبووە لەتوانای كەسییدا، ئەمە دەڵێم پشت بەو تێكستانە دەبەستم كە خۆی نووسیویەتی، وه‌ك لەپێشتردا باسم كرد، ئەحلام كلاسیكیانە و سووننەتیانە دەینووسی، ته‌نیا ئەوە نەبێت، كە هەندێكجار موبالەغەی بە گێڕانەوەی قسەی پاڵەوانەكان و زەمەنی ڕووداوەكانەوە دەكرد، ئەگەر نا، ئەو، نەوه‌ك ژن و لەسەریدا بیرێك هەبوو بۆ ئازادیی تاكو بەگشتی هەوڵی بۆ بدرێت، چونكە بڕوای بە ئیرادەی تاك هەبوو خۆی ڕزگار بكات و ئازاد بێت، تا ئەو ڕادەیەی زۆر سەرسام بوو بەو شیعرەی نەزار قەبانی، كە بەژن دەڵێ‌ ئەمە وەرگێڕانە كوردییەكەیەتی و بەعەرەبییەكەی كێش و سەروای تێدایە و داڕشتنەكەی جیاوازە:
“مەوەستە وه‌ك بزمار، خۆشەویستیی یان ناخۆشەویستیی هەڵببژێرە، شوێنێك نییە لەنێوان بەهەشت و ئاگر”. تەنانەت ئەم شیعرەی بە زۆربەی خێزانی برادەرەكانی دەگوت، مەترسە به‌رانبه‌ر پیاوەكەت ڕابوەستە، كەوابوو ئەو بەدوای حەزی خۆیەوە نەبوو لەنێو ئەدەبدا، بگرە ئەوەندەی بڕوای بە شۆڕشی كۆمەڵایەتیی هەبوو، بۆیە بڕوای بە واقیعبینیی بوو و هیچی تر.

با لەوێوە دەستپێبكەم؛ هیلیس میلەر، نووسەرێكی بەناوبانگی فەره‌نسییە، كتێبێكی بەناونیشانی “اخلاقیات القرا‌وە” هەیە لەوێ‌ ئەو لەنێوان نووسین، وه‌ك دەق و كەسایەتیی نووسەر جوودا دەكاتەوە، ئەمە لەلای ڕۆلان پارتیش بەهەمان شێوە لەبەرچاو گیراوە، كە دەق هیچ پێوەندیی بە ئەخلاق و فەرهەنگی كەسیه‌تییەوە نییە. بەڵام خاڵە بزربووەكەی ئێرە چییە؟ ئەوەیە، كە ئەحلام هیچ خۆی لەپەنا دەقدا حەشار نەدەدا، ڕووداو و چیرۆكەكانی، كە لە خەیاڵدانیدا تۆماری كردبوون، چۆن بوو وای دەنووسی و لەژیانی ڕۆژانەشیدا بەهەمان شێوە ڕەفتاری دەكرد، بڕوای بە كولتوور، ئایین، كەسی پلەباڵا و نزم، ژن و پیاو نەبوو، ئەو هەر زوو، كە ماڵی باوكی جێدەهێڵێت و لەخانەقینەوە دەچێتە بەغدا بۆ خوێندن، بەته‌نیا دەژیێت و ناترسێ‌ لەو هێزە نەریتخوازە ئایینییەی كۆمەڵگە، دوای ئەوەش، كە دەچێتە فەره‌نسە بۆ خوێندن و سەفەر، كراوەتر دەگەڕێتەوە و درێژە بە ژیانی فەردیی، نووسین و باری كۆمەڵایەتیی خۆی دەدات، هەتا قەناعەت بەوە دێنێ‌ لەگەڵ (شەوقی كەریم) چیرۆكنووس و كەسیه‌تی ناسراوی عەرەب، كە لەبەغدا دەژیا، هاوسەرگریی بكات.

“ئەحلام كەسێك بوو كەمتر نەبوو لە نەوال سەعداوی، فاتیمە مەرنیسی، فەروخزاد و ئۆریانا ڤاڵاجی و دەیان ژنی ناسراوی دیكەی جیهان”

شەوقی كەریم، جگە لەوەی نووسەر بوو، ئۆپۆزسیۆنێكی عێراقیی بوو، ئەو لەو ڕوانگەیەوە شەوقی دەناسێت و لە هۆتێل شیراتۆن نزیك دەبنەوە و هەر لەوێ‌ هاوسەرگریی دەكەن، دوای ئەوەی ماوەیەكی باش بە هەموو جیاوازییەكانیانەوە پێكەوە دەژن، كە پڕبووە لەناكۆكیی و شەڕوشۆڕی كۆمەڵایەتیی، سەرەنجام، كە شەوقی لەلایەن بەعسەوە زیندانیی دەكرێت، ئەحلامیش دەچێت لە زیندان بەیاساییی جودا دەبێتەوە و داوای هیچ مافێكی لێناكات، پاشان بە هۆی خراپیی بارودۆخی زاتیی و بابەتیی لە عێراق، بەناچار هەڵدێت بۆ سلێمانیی و لەوێ‌ دەست بەژیانێكی نوێ‌ و نووسینی كاری ڕۆژنامەوانیی دەكات، سەرەتاش هات بۆ هەفتەنامەی هاوڵاتیی و لەوێ‌ بەكۆی دەنگ، وه‌ك ئەندامی دەستەی نووسەران هەڵبژێردرا و تا ماوەی نزیك بە 8 ساڵ مایەوە و دواتر دووركەوتەوە.

• تۆ له‌ نووسینه‌كانت، مه‌نسوور به‌ ژنێكی یاخی و بوێر ده‌بینی، ئه‌م یاخیبوونه‌ ده‌كرێت، وه‌ك ئاڤانگاردیستێك ببیندرێت؟ ئه‌گه‌ر به‌ڵێیه‌، ئه‌وه‌ له‌ كوێی ئاڤانگاردیزمه‌وه‌ ده‌توانین له‌ ئه‌حلام مه‌نسوور بڕوانین؟

ئەوە لە وڵامەكانی پێشووم ڕوون بووه‌تەوە.

• هه‌ر له‌و وتاره‌ی، كه‌ به‌م دوایییه‌، له‌ لاپه‌ڕه‌ی خۆت له‌ فێسبووك، له‌ باره‌ی ئه‌حلام مه‌نسووره‌وه‌ نووسیبووت، یاخود زۆر له‌ نووسه‌ره‌كانیش پێیانوایه‌، مه‌نسوور، ژنێكی نازهه‌ڵگر نه‌بوو، ئایا بۆچی فه‌رامۆش كرابوو، به‌تایبه‌تیش له‌ دوا ساڵه‌كانی ته‌مه‌نی، كه‌ له‌ سلێمانیی بوو، ده‌كرێت شوێنێك ناوی شاری ڕۆشنبیریی بێت و به‌لێشاو نووسه‌ری لێبژێت، كه‌چی نه‌تواندرێت بۆچوون و ده‌نگی ئازادیی وه‌ها ژنێكی له‌باو ناڕازیی له‌ مێشكدا هه‌رس بكرێت؟

شارێكی وه‌ك سلێمانیی بەرپرسیار نییە بەگشتیی به‌رانبه‌ر بە كەسایەتییەك. زۆر كەسی دیار لەدنیادا ئاوها بێناز مردن و كەس پرسیاریشی لێنەكردن، بۆ نموونە كەسێكی، وه‌ك نیكۆس كازانتزاكی، ئەسڵەن نەیانهێشت لە گۆڕستانی مەسیحییش لە ئەسینا-یۆنان بنێژرێت، بردیان بەدزییەوە لەسەر گردێك ناشتیان، كەسانی وا زۆرن لەنێو كورددا؛ بێكەس، قانع، مەلا جەمیلی ڕۆژبەیانی و زۆری تر، بەبێنازیی ڕۆیشتن و مردن، ئەمە پێوەندیی بە ئینتیمای شار و فكری شارەوە نییە، یان قسەكانی هەرس نەكرێت، بەڵام ئەحلام بەوپێیەی، كە پەرت بوو لە بۆچوونەكانی، بەتایبەتی بەم دوایییە نزیك كەوتبووه‌وە لە برادەرانی پەكەكە، به‌بێەوەی بەخۆی بزانێ‌، ئەسڵەن بڕوای بەپەكەكەش نەبوو، بەڵام ئیتر ئەو جۆرە مەشهەدانەی ژیانی وای كردبوو، خەڵك دووربكەوێتەوە لێی، ئەو جێگیر نەبوو. واتە مستقر نەبوو، خۆ ئەگەر خەڵكیش ئەویان پێهەرس نەكرێت بەهۆی بەرژەوەندیی خۆیان و هەندێ‌ ئیمتیازی تر، لەلایەن حزبەكانەوە، ئەوەیان ڕاستە، بەڵام خۆ لەولاشەوە زۆر بەیەكجاریی فەرامۆش نەكرابوو، ته‌نیا ئەوە نەبێ،‌ كە مرد، مەراسیمێكی فراوان و لەباریان بۆ نەكرد بۆ بەخاكسپاردن و ناردنی بۆ زێدی خۆی؛ خانەقین. ئەوە بۆ محەمەد موكری، حوسێن میسری، جیهاد دڵپاك و ئازاد سوبحییش وابوو، كە ئەوان گەرمیانیی و كەركوكیی بوون، خەڵكی سلێمانیی نەبوون.

سلێمانیی ئەوەشی تێدایە، كە هەندێك جار یاخیبوون لە شارەكەی قه‌بووڵ ناكات، ئەمە خەسڵەتی كۆمەڵایەتیی شارەكەیە و بەدەست خۆیان نییە، كوردستان هەر شارێكی خاوەن خەسڵەتی تایبەت به‌ خۆیەتی. ئەوەی تر دەگەڕێتەوە بۆ ئاستی توانای كەسەكان یان شێوەی مامەڵەی ڕۆشنبیریییان لەگەڵ ئەو كاره‌كتەرە.

• ئێستا زۆر ژن قسه‌ ڕه‌خنه‌یی و به‌رهه‌ڵستییه‌كانی مه‌نسوور ده‌ڵێنه‌وه‌ و ده‌كه‌ن، ته‌نانه‌ت هه‌ندێكیان خۆیان به‌ نێوه‌كه‌یه‌وه‌ هه‌ڵواسیووه‌: داخۆ له‌ ڕوانینی تۆدا، ئه‌مانه‌ توانیویانه‌ ئه‌حلام تێبپه‌ڕێنن و پێیان بگوترێت نه‌وه‌ی پاشه‌حلام مه‌نسوور؟

سەبارەت بەو پرسیارەش، كە نەوەی پاش ئەحلام چۆن دەتوانن شوێن پێی ئەحلام هەڵبگرن، لە ڕاستییدا؛ هیچ ژنێكی یاخی وه‌ك ئەحلام لەنێو كورددا دووباره‌ نابێتەوە، چونكە تەمسیل و واقیع دوو شتی جیاوازن، من نەوەیەك نابینم بەناوی نەوەی پاشەحلام، نە لەنێو واقیعگەرایی و نە لەنێو خەیاڵ، چونكە ژیانی ئێستا زیاتر بارگاوییكراوە بە گوتاری ئایینیی و بەرژەوەندییە كۆمەڵایەتییەكان، خوێندكارێكی كچ ئەگەر بیهەوێ‌ یاخی بێت، ناتوانێ‌ سەرەتا لەنێو كۆمەڵگە تەریك بێت و خۆی ڕزگار بكات لە سانسۆرەكان، ناتوانێ‌ خۆی لە بەرژەوەندخوازیی خوێندن، پلەوپایەی سیاسیی، ڕاگەیاندن، خۆنواندن و پاراستنی جوانییەكانی خۆی وه‌ك كاڵایەك، ناتوانێ‌ خۆی بپارێزێ‌ لە سیاسەت و بەرژەوەندیی حیزبگەرایی، كە نە حزبییان هەیە و نە دەزانن حزب چییە، ناتوانن ببن بە خۆیان.

ئەحلام ئەو سنوورانەی بڕی بوو، ئەوە باجی قورسی دەوێ‌ و كەسی هاروهاجی گەرەكە، ئەمە جگە لەوەی، كە نەوەی ئێستا نەوەی ئایفۆن، كەوانتەر، ماڵ و ماشێنی بەرز و زێڕن، نەك نەوەی دەقێكی باڵا و خاوەن كەسایەتیی، ئەوان ناتوانن بەته‌نیا سەر بكەون بۆ شوێنی بەرز، مەگەر بە هێزێكی كۆمەڵایەتیی یان ئابووریی و پشتێك سەربكەون، جیاوازیی نێوان نەوەی كۆن و ئێستا ئەوەیە؛ كە پێوەندیی بە لەبەرچاوگرتنی بەرژەوەندییەكانە، بۆیە هیچ ململانێیەك لەنێوان ئەو دوو نەوەیە نابینم، جا چ جای كەسیه‌تییەكی وه‌ك ئەحلام، كە لەنەوەی خۆیشی كەس نەیدەتوانی پێشبڕكێی بكات، ڕاستە كەسانی وەك: بەدیعە دارتاش، گەزیزە عومەر، كوردستان موكریانی و شوكریە ڕەسوڵ و خەڵكی تر هەبوون، بەڵام ترس لە داهاتوو، قورستر بوو، كە ئێساش قورسە بەقەد ئەو پێوەرە ئایینیی، كولتووریییه‌…
نەخێر تائێستا ئەو ستایلەی ئەحلام دووبارە نەكراوەتەوە و تێنەپەڕیوە، ئەو، فەلتەیەك بوو لەنێو ئەدەبیاتی مێ‌ لە كوردستان، هەروەك چۆن یەك فه‌رووغی فرووغزاد دەركەوت لە ئێران و كەسی تر جێگەی نەگرتەوە، ئەسڵەن تا ئێستا نەوەیەك نەهاتووە نزیك بێت لەو ستایلە، تاكو بڵێین؛ كەسێك هەیە خەریكە ئەو تێدەپەڕێنێ‌، بۆیە هەستم بەو حاڵەتە نەكردووە.

• شه‌ڕی مه‌نسوور له‌ به‌رانبه‌ر ئه‌ده‌بیاتێكی هه‌زار ساڵه‌، ئه‌ده‌بیاتێك ده‌نگی نێر، تا ئێره‌ی هێنابوو، گوایه‌ كه‌لێنێكی گه‌وره‌ی تێدا بوو، به‌ڵام داخۆ ڕه‌خنه‌ی مه‌نسوور له‌ زمان و ئه‌م نه‌ریته‌ باوه‌، ئاڕاسته‌یه‌كی له‌ ئه‌ده‌بیی ژنانه‌ له‌ ڕۆشنبیریی كوردییدا له‌خۆ گرتووه‌؟ ئه‌گه‌ر له‌خۆی گرتووه‌، ئه‌ی ئه‌م ئه‌ده‌بیاته‌ پێویستی به‌ داهێنه‌ری تری وه‌ك ئه‌حلام مه‌نسوور نه‌ماوه‌، كه‌ ئێستا نابیندرێت؟

بۆ ئەحلام، نووسینی ڕۆمان ئەوە نەبوو ململانێی نوێخوازیی، پشتگیریی نەریتخوازیی و سووننەتیی بكات لەنێو ئەدەب و فكردا، چونكە ئەو بەواقیعی مۆدێرن بوو، نەدەترسا لەوەی گومان لە نوێخوازبوونی خۆی بكات و گوێی بە قسەی خەڵكیش نەدەدا، بەقەد ئەوەی، كە لەڕێگەی نووسینی ئەدەبییەوە یادەوەرییەكانی منداڵیی و هەرزەكاریی و تا دابڕانی خۆی لە كۆمەڵگە و خێزانی كوردەواریی دەنووسییەوە، بەڵێ‌ لە كتێبی (گرەوی چاوەكانی ئەم)دا كەسیه‌تیی (سافە) واتە سافی ناز، كە كەسیه‌تییەكی ژنی یاخی خانەقینیی بووە و لەگەڵ پیاودا هەڵسوكەوتی كردووە و قاچاخچییه‌تیی و ئەم دیو و ئەودیوی ئێرانی كردووە و بەته‌نیا ژیاوە؛ بەكاریهێناوە. كە خوێنەر نەتوانێ‌ سافە بدۆزێتەوە وه‌ك كاره‌كتەرێكی واقیعیی، تەنانەت بۆ خەڵكی خانەقینیش شاراوەیە، چونكە جوان تەوزیفی كردووە، بۆیە بووە بە پاڵەوانی هەرە دیاری نووسینەوەی ئەو یادەوەرییانەی، كە نەیدەتوانی بیانشارێتەوە لەدەرەوەی ئەدەب.

هەمیشە لە گێڕانەوەی چیرۆك و ئیدیۆمەكانی خانەقین، كەسیه‌تی سافە، كە ناوە ئەسڵییەكەی سافی ناز بووە، خۆدوورخستنەوەشی لە سنووری ژنیه‌تیی باو، كاریگەریه‌تیی ئەو ژنە یاخییانە بووە، كە لە خانەقین هەبوون و بۆ ئەحلام بەشێك بوون لە چێژبەخشین، كە چیرۆكەكانی دەگێڕایەوە، وه‌ك ئیدیۆمێكی ناسراو بە قاقاوە دەیگێڕایەوە، بۆیەش ئەو كاره‌كتەرانەی هەڵدەبژارد، چونكە ئەوان یاخی ببوون لە نەریت و ئایینی كۆمەڵگە، هەر ئەمەش بوو، كە لایەنگری ئەوانی دەكرد، ئەمە لایەنە واقیعبینییەكەی بوو.
پیاوێكی دیكەی هەلاج هەبوو، كە هەمیشە نوكتە و چیرۆكەكانی دەگێڕایەوە و تەوزیفیشی كردووە لە ئەدەبەكەیدا، ئەویدیكە كە ئەدەب، نووسین و هونەر بوو، مەسەلەی شێوازی گێڕانەوەی ئەحلام بوو لە كەسی یەكەمی تاكەوە بۆ كەسی دووەم و هەندێكجار كەسی سێهەمی تاك، هونەر لەلای ئەحلام بۆ نووسین دووهەمین بیركردنەوە بوو، چونكە ئەو خەمی دیكۆمێنتاركردنی واقیعەكان زیاتر لەوەی خەمی هونەری هەبێت، بەڕاستی ئەمە لایەنە نێگەتیڤەكەی نووسینی ئەحلام بوو لە ڕۆماندا.

• دوای ئه‌م هه‌موو ماندووبوون و هه‌وڵه‌ی مه‌نسوور، له‌ فه‌راهه‌مكردنی زمانی ژنانه‌، نووسینی ئه‌ده‌بیات و ئه‌زموون، نه‌ته‌وه‌خوازیی و ڕه‌خنه‌ له‌ سه‌رانی كورد، به‌ زمان و ده‌نگێكی له‌باو ناڕازیی، پێت وانییه‌ ئێستا ژنانی كورد به‌گشتیی و فێمێنیستناسه‌كانی كورد به‌تایبه‌تیی، تاهه‌نووكه‌ بێاگان له‌كایه‌ زمانیی و جوانناسییه‌كانی مه‌نسوور؟

سەبارەت بە پرسیاری سیانزەهەم و پرسیاری داهێنان*یش: بە بڕوای من شتێك نییە بەناوی ئەدەبیاتی ژنان، وه‌ك ئەوەی پێشتر چەپی كلاسیكیی و كۆمۆنیستە ئیدیالیستەكان، پێیان دەگوت ئەدەبیاتی كرێكاریی، مەسەلەی داهێنەریش باسێكی گرینگی نێو فكر و فەلسەفەیە، شتێك نەماوە لە دنیادا لە سەرجەم كایەكاندا بەناوی داهێنان، چونكە داهێنان بەواتای بەرهەمهێنانی چەمك، وه‌ك چەمكەكانی شیتەڵگەرایی یان ئەخلاقیات یان ئازادیی، مەبەست لەوەیە، كە چەمێكێك بێت فرە مانا بێت، بۆیە لە ئەدەبیاتیشدا ئەو كێشەیە هەر ماوە، چونكە بابەتەكە لەسەر ستایل و شێوازی نووسینە، هەموو ئه‌و نووسینانەی لە دنیادا بەهەموو زمان و كولتوورەكان دەنووسرێنەوە، یەك هەدەفی ئینسانیی و یەك كێشەیان هەیە، كە كێشەی كۆمەڵایەتیی و سیاسییە یەخەی ئینسانی گرتووە، بۆیە نە ئەحلام و نە كەسانی تریش داهێنەر نەبوون تاكو كەسی داهێنەری وه‌ك ئەلتەرناتیڤی ئەحلام بێتە كایەوە، دەكرێ‌ بڵێین: كۆمەڵگەی كوردستانیی پێویستی بە كەسانی بەجورەت و بە خاوەن كەسایەتی خۆیانە، تاكو لەنێو ئەدەبیاتدا بۆچوون و تێگەیشتنیان لەبارەی ژنەوە هەبێ‌، لەكاتێكدا ئەدەبیات بەبڕوای من ئەدەب كێشەی كۆمەڵایەتیی چارەسەر ناكات، ته‌نیا دەتوانێ‌ دیالۆگی تێدا بەرهەمبهێنێ‌ لەنێو زمان، كولتوور و خوێندەواردا و ئەمە دەبێ‌ لەئاستی كۆمەڵایەتیی ڕەنگبداتەوە و لەنەوەیەكەوە بۆ نەوەیەكی تر مانایەكی جیاواز وەربگرێت، هەروەك چۆن ئازادیی و ئازادییەكانی تاك لەنەوەی ڕابردوودا بریتی بوو لە سیاسەت، ڕزگاریی نیشتیمانیی و نەتەوەیی، ئێستا بریتیە لە ئازادیی تاك و خۆشگوزەرانیی.

ڕۆشنبیری كوردیی كێشەی زۆری سایكۆلۆژیی تێدایە پێویستی بە ئەدیب نییە بەقەد ئەوەی پێویستی بە زانای سایكۆلۆژیی هەیە، چونكە دەبێ‌ ئەو گرێ‌ دەروونییانە، خوێندنەوەیان بۆ بكرێت و دواجار بكرێت بە لێكۆڵینەوەی ئەكادێمیی و بخرێنە بەرباس، چونكە نووسین ته‌نیا هەدەفی ئەوە نییە باسی كێشە بكەیت، بەڵكو هەدەفەكەی دیكەی خوێندنەوەی سایكۆلۆژیی و سۆسیۆلۆژییە، هەروەك چۆن هۆمیرۆس و ئەدیبە كلاسیكیییەكانی یۆنان و شكسپیری ئینگلیز، هاملێت و گرێی ئۆدیب لە شانۆ و لە سیاسەتدا، كە فرۆید و ماركس هەریەك بەشێوەیەك موناقەشەیان كردووە و لەتێزەكانیاندا ڕەنگیداوەتەوە، دەبینین، لێرەدایە نووسین و داهێنان لە نووسیندا چ فەزایەكی لەدەرەوەی فەزای ئاساییی كۆمەڵگەدا خوڵقاندووە و لەكوێدا ڕەنگیداوەتەوە، بۆیە داهێنان وەختێك دەبێ‌، كە دەسەڵات و سیستێم بهەژێنێت‌، نەك ته‌نیا بۆ لێكۆڵینەوەی موجامەلاتیی، كە ته‌نیا بۆ زانستگه‌كان بەكەڵك دێت بۆ تەرقییە و بەرزكردنەوەی پلەی ئەكادێمە، من داهێنان لە ئاستی جهانییدا وادەبینم و لە ئاستی لۆكاڵی كوردستانییشدا بە گەورەتر لە خۆی، نەك لەنێو ژناندا، بەڵكو لەنێو پیاوانیشدا.
ڕۆژهەڵاتی ناوەڕاست كۆیلەی چەندین هێزی دیار و نادیاری كولتووریی، ئایینیی، سیاسیی و فەرهەنگیییه‌ … ئەوەندەی من بزانم ئەحلام ئەمانەی وه‌ك داتا دەزانی، بەڵام نەیدەتوانی وردی بكاتەوە و تەوزیفی بكات لەنێو نووسیندا ڕەنگبداتەوە، ئەمە غەدر نییە، بەڵكو هەقیقەتە، ئەم حاڵەتە بۆ تەواوی ژنەكانی دیكەی ئەدیبیش وایە، كە دەنووسن، چونكە ناتوانن قووڵتر ببنەوە لەوەی، كە سیاسەت و سیستێمی دەسەڵات و پیاو تەماشایان دەكەن، وه‌ك كاڵا، بەداخەوە ئەوان خۆشیان لەشوێنێكدا بەهۆی كۆیلەبوونیان بەدەستی غەریزەی چەپێنراوی ژنیه‌تییەوە، یان بەدەستی پلە دوویییانەوە، بوون بە كۆیلەی كەمالیات، پوول، ماڵ و موڵكییەتێك، كە لە كۆیلەبوونی پیاو، ماڵ، زێڕ و منداڵەوە كۆكراوەتەوە.
داهێنان، كێشەی هەرە گەورەی بەشەریەتە لەسەر گۆی زەوی، نەك ژنان و ڕۆشنبیری كوردیی، بەڵام ئەگەر بمانەوێ كەسێكی دیكەی وه‌ك ئەحلام بەرهەمبهێنینەوە، ئەوا پێویستمان بە شۆڕشی كۆمەڵایەتیییە، كە دەبێ‌ بگەڕێیینەوە سەتەی ڕابردوو، كە هەم ململانێی سیاسیی و ئابووریی لەو ئاستەی ئێستا نەبوو لەسەرتاسەری جیهان، هەم ئینسان بۆ خۆی نەبوو بە كۆیلە و ملی نەدابوو بە هەموو ویست و غەریزە بچووكەكانی خۆی، هەم ئیرادەی ئینسان لەشوێنێكدا قیمەتی مابوو. ئەحلام كەسێك بوو كەمتر نەبوو لە نەوال سەعداوی، فاتیمە مەرنیسی، فەروخزاد و ئۆریانا ڤاڵاجی و دەیان ژنی ناسراوی دیكەی جیهان، بەڵام ئەوان خاوەنی شوناسی نەتەوەیی و خاوەن كۆمەڵگەیەك بوون بەرگریی لە كەرامەت و بەهای كولتووریی خۆیان دەكەن و لەوێشەوە بەرگریی لە فەرهەنگ و ئەدەبیاتی خۆیان دەكەن و كەسایەتییەكانیان دەخەنە بەردەم گڵۆپی گەشی ڕاگەیاندنی ڕاستگۆ، نەك ڕێكلام.
ئەحلام بەهۆی ئەوەی بیركردنەوەی جیاواز بوو لە زۆربەی حزبە كوردیەكان، كە خاوەنی ڕاگەیاندن بوون، پشتگوێ‌ خرابوو، بەمەش هیچ هیوایەك نەماوە كەسێكی وه‌ك ئەحلام دروست ببێتەوە؛ لەنێو ڕۆشنبیری كوردییشدا بەتایبەتیی، كە گوتارەكەی بەدەست پیاوانەوەیە، ژن هەمیشە لەبەردەم تەشیر، قسەی ناشیرین و هێرشە بۆ نێوزڕاندنی، چونكە پیاوانی كورد بەتایبەتیی ئەوانەی لەنێو ڕاگەیاندنن، ته‌نیا لەنێو چوارچێوەی سێكس تەماشای ژنان دەكەن، بۆیە بوارەكە بۆ ئەوان بەرتەسكترە.

كۆتاییی

ئه‌م دیمانه‌یه‌ له‌ مه‌له‌فی ئه‌حلام مه‌نسوور، له‌ گۆڤاری “كه‌لێن” ژماره‌ چوار، زستانی 2018 بڵاوكراوه‌ته‌وه‌.

Previous
Next
Kurdish