په‌نایه‌ك بۆ ئۆپۆزۆسیۆن بوون … سه‌لام عومه‌ر
ئه‌وكاته‌ی ئوپۆزسیۆن سه‌رگه‌رمی جوڵاندنی شه‌قام بوو به‌ئاراسته‌ی گۆڕانكارییه‌كان‌و به‌تایبه‌تیش دوورخستنه‌وه‌ی ئایدۆلۆژیاو هه‌یمه‌نه‌ی حزبی له‌نێو كایه‌كانی ده‌سه‌ڵاتدا, هاوڵاتیان پێیان وابوو ئیدی سه‌رده‌مێكی نوێ له‌ده‌سه‌ڵاتی خه‌ڵك ده‌ست پێده‌كات‌و په‌نایه‌ك بۆ ئۆپۆزۆسیۆن بوون هه‌یه تا له‌وێوه مافی خه‌ڵك بگه‌ڕێنرێته‌وه بۆ خه‌ڵك، ده‌توانرێ بۆ ئاینده، خواسته‌كانی شه‌قام له‌نێو ده‌ستوورو بڕیاره سیاسییه‌كاندا ره‌نگدانه‌وه‌ی خۆی هه‌بێت, پێیان وابوو (به‌شه‌كه‌ی خۆم بۆ خۆم هی هاوڵاتیانیش خۆم ئه‌یخۆم) نامێنێ‌و داهات‌و بوودجه‌كان ئاشكراده‌بن‌و ده‌سه‌ڵات ده‌گوازرێته‌وه ئه‌و ده‌سته ئه‌مینانه‌ی ئوپۆزسیۆن بانگه‌شه‌ی بۆ ده‌كردن‌و ئه‌وانیدی پێ تاوانبار ده‌كردن, ده‌یانگوت شه‌راكه‌تی حزبی ده‌گوازینه‌وه سه‌ر خوانی هاوڵاتیان‌و به‌شێك له‌داهاتی نه‌وت بۆ خه‌ڵك‌و خانمی ماڵه‌وه‌‌و ناكرێ‌و نابێ له‌دابه‌شكردنی پۆسته‌كانیشدا ته‌نها چاومان له‌چالاكوانی حزبی‌و ئه‌وكه‌سانه بێت كه‌هه‌ڵسوڕاوی ئه‌و پارتانه‌ن كه كۆنن‌و به‌كۆنیش بیرده‌كه‌نه‌وه, ئه‌وانه‌و زۆری دیمان گوێ لێبوو, زۆری نه‌خایاند ته‌واوی به‌ڵێنه‌كان پێچه‌وانه ده‌رچوون‌و كێبركێی خۆ نزیك كردنه‌وه له‌ده‌سه‌ڵات‌و مامه حه‌مه بۆ یه‌كتری كردن‌و په‌راوێز خستنی خه‌ڵك‌و پارت‌و نه‌ته‌وه‌كانی دی له‌و شوێنه‌دا زۆر به‌زه‌قی ده‌ركه‌وتن، ئه‌وه‌نده‌نا هه‌ندێ له‌سیماكان كڕدران و چونه ناو ده‌سه‌ڵاته‌وه، موووچه‌ی زۆر ده‌مه درێژه‌كانی دووری و شه‌قامی خاڵیكرد له ناره‌زایی، ئێستا به‌پێی یاسا و به‌شداری كردن و نه‌كردن له حكومه‌ت ئۆپۆزۆسیۆن هه‌ن، هه‌ندێكیان سه‌رمایه‌دارن و وه‌پێش هه‌ژاران كه‌وتوون، هه‌شن ئۆپۆزۆسیۆن بوونیان فێره پارته‌كانی دی كرد كه‌چی له سووڕی متبووندان، هه‌شن ته‌نیا خه‌ریكی كردنه‌وه‌و نه‌كردنه‌وه‌ی مزگه‌وته‌كانن، كۆرۆنا له‌ماڵێی عاسێ كردوون و له‌سه‌ر به‌رماڵه‌كانیان نابزوون، ئالێره‌دا پانتاییه‌كی به‌رفراوان بۆ ده‌سه‌ڵات جێماوه‌و به‌كه‌یفی خۆی ته‌راتێنی تێدا ده‌كا ئه‌وانه‌ش كه‌دێنه سه‌ر شه‌قام متمانه‌یان نه‌ماوه‌و له سنوورێكی به‌رته‌سكدا خۆیان نمایش ده‌كه‌ن و ده‌خوازن پاروه چه‌وره‌كان بۆ خۆیان ببه‌ن و سۆزو ناره‌زایی خه‌ڵك جارێكیدیكه بفرۆشنه‌وه، له‌ولاشه‌وه له‌سه‌ر كه‌وڵی خه‌ڵكی نه‌دار خه‌ریكی فرۆشتن و هه‌رزان فرۆشكردنی داهاتی ئه‌م نیشتمانه‌ن و به ئاره‌زووی خۆیان رێكه‌وتن له‌گه‌ڵ به‌غداو كۆمپانیاو ئێره‌و ئه‌وێ واژوو ده‌كه‌ن، به‌ڵام هه‌موو پێشبینیه‌كان ئه‌وه‌مان پێده‌ڵێن كه ژیله‌یه‌ك كه‌وتۆته بن پوش و په‌ڵاشی نائومێدیه‌كان و شنه‌یه‌ك ده‌توانێ گه‌شی كاته‌وه‌و ئاگر له‌وانه به‌ردات كه مافی خه‌ڵكیان لایه ئه‌وكات ئۆپۆزۆسیۆنێكی نوێ به به‌رگێكی نوێ له‌نێو له‌شكرێك لاوی بێكاردا سه‌رهه‌ڵده‌داو ته‌واوی پارته كۆنه‌كان و ئۆپۆزۆسیۆنه كۆنه‌كان و عیلمانیه كۆن و كۆنه ئیسلامیه دین فرۆشه‌كان و حوكمه‌ت و دیواره كۆنكرێتیه‌كان، به‌سه‌ر یه‌كتریدا راده‌ماڵێ و ئه‌وسا په‌نایه‌ك نه بۆ ئۆپۆزۆسیۆن و نه‌حكومه‌ت و نه‌حزب ناهێڵێته‌وه.
