Skip to Content

لە تەما وەرە … شیعر/کاوە عوسمان عومەر

لە تەما وەرە … شیعر/کاوە عوسمان عومەر

Closed
by ئه‌یلول 7, 2020 General, Poems


جێهێشتنی تۆ
چاوەکان دوو برینن
پاش هەڵکشانی لافاو
کۆکردنەوەی
پارچە ئاوێنەکان
ئاسنی
ڕزیوی دڵەکان
چاوی کوێری باخەکان
دیوارەکانیان لە نێوان
ڕوباری حەزەکان
هەڵکێشا، شاعیرێک
تا ئێستا خۆری نەدۆزیوەتەوە
لقی داری شەوێک
بەسەر شەپۆلی ڕابردوو
هەمان شەونمی خۆکوژ
لەدەستی گوڵە هێرۆیەک
لە نەفرەت
ڕەنگاڵە لە چاو وون، هەمان
کۆستی لەدەستچوونی زەردەپەڕ
پاش
هاواری جێماوی منداڵێک
لە کۆڵانی نووری شارێک
تێکەڵ بە خەوو
ئەندێشەی خۆشبەختی لەدەستچوو

……………
هێشتا مرواری وونی
ناو چاوتم نەدۆزیوەتەوە
ئیبلیسی کۆچ
داویەتی بەسەرماو
سوار بەلەمی شینی سەفەری کردووم
خۆڵی بە جێماوی قسەکانی
پێش سەرماو سۆڵی
تەمەنێ، وەک سوتماکی جگەرە
کردمان بە بادا
ئێشکی کات
بۆ ئەو پیاوو ژنانەی
لەدەریاچەکان جەستەیان
لە گوڵ و گوڵزاری بەرائەت فڕیداو
ئێستا بوونەتە کۆیلەو ڕۆبۆتی ماشینە
دەمامک ڕەشەکانی
فیردەوسە شەختە بەستوەکان
زوو یان درەنگ
بیری قازە پەمەیە لەدەستچوەکانی زەردەپەڕی
شارێکی کوژراو، لە نیوە شەوێک
لە گریان و بەفرو گوڵ و حەزی وون
ماچی بەجێماوی
ئەو پەریانەش
باڵیان بە سیانید و خەردەل سووتا
خەمی بەردبووی
ژنە تەنیاکانی
دوای لافاوی مەزنی نوحێکی نادیاریش
بەزۆر
بەکەشتی تەنیایی
بارکرا
تا چاو بڕ کات
هەوری گڕینە، تا چاو بڕ کات
ترسی چیایە لە جێهێشتنی هەڵۆ
تا چاو بڕ کات
ئاسکە سرکەکانی
تاریکیە
خۆیان نادەن بەدەستەوە
بۆ نێوڕێژنە ئەستێرەیەک لە نوسین
بۆن خۆش
وەک یەکەمین ماڵی جێهێڵراو
بەڵام چاوەکان دوو برینن
ئەبریسکێنەوە
بەسەر
ووردوخاشبوونی
پەیکەری مرۆڤە سەرهەڵگرتوەکان
هەڵپشکوتنی گوڵە لەیلەکەکانی دڵ
پاش ئەوەندەی
چەند سەدە لە مەرگی ئەرخەوانی
بە تابلۆی عێشقی تۆ، چاوەڕێم کرد
هەڵبەت نێوان تێکشکان و
لێتێکنەگەیشتن، لەوەی
من هەم بەوەی هەم
وەک تەم، وەک
کوڕی کەنار، ناشتەوێ
زیاتر پەرت بم
ناشمبینی، ناشتبینم
ئەوکاتەی گەردوون
لە خەوی شەرابیی
ئەستێرەکانی خۆیا سەرخۆشە
نێوان
هاتنە
جیهان و چونە دەرەوە
پەرژینی وشە هەیە
زەنگی بەدبەختی و وەرین
بەسەر
ڕوخساری ڵێڵ و قڵیشبردووی
پەری
سەر فوارەکانی ئەوسای
ماڵەکانی ئاو،
شار گزنگی ئاڵتونی شیعر
بوو، ئاڵتوون…
پاشان ڕۆژانی ئەوسا..
بە
فڵچەی
سپێدە
پێکەنینی پەڕی خەونەکانمانی
پێکێشران
ئەم برینە تازەیە
برینی جێهێشتن
و دابڕان
یەکناگرێتەوە
قەلە ڕەشە چەتەکان، چەتە قەلە ڕەشەکان
لە هەموو شوێنێکن
دارستانەکان سوتماک
جەستەی ماڵی ئاو، ئێستا ووشک، و گریان
و بیابان
لە هەڵکشانی ڕۆحی
زەریای پەمەیی شەویش
چیرۆکی
وێڵەکانی گەردوون کۆتایی نایەت
و بەیانیەکی تازەش
سنەوبەرێک
سمۆرەیەک بانگ ئەکاتەوە
شەمەندەفەرێک
خەوتوەکان ئەباتەوە
تونێلێک لە خەم
چەمێک پڕ ئەبێتەوە لە خوڕەی ئاوی سروشت
جانتاکان پڕ ئەکرێنەوە لە فۆتۆ و
یادەوەری ڕۆشتنە بێهودەکان
دورینەوەی
برینی سەر دڵە ڕەشبوەکان چەند ساڵی
تر بخایەنێ؟
تەنافی ژوانیش
لە هەیوانەکە
چۆلەکەکەیەکی ماندوو
سەرگەردان وبرسی پێوەدیارە
هەریەکێک لە کۆچەرەکان
خێوێک لە ترسی جێهێشتن
دوای کەوتوە
ڕۆژمێری
وڵاتی فەنا
دەمێکە پەڕەکانی لێ نەکراوەتەوە
هەر لەسەر پەڕەی دوەمی
وەرزی هاوینی پارە
وەزی ناعیشق و بەڵا
خەو کەشتی سپیەو
ئافرەتە جەستە کراو بە ئاوێنە
شکاوەکان نابات
هیچ نەبێ
فەڕشی زەردی خۆر
جێێ هەموو ماڵە
فڕیوەکانی دەست
چەتەگەری
گورگەلە ڕەشپۆشەکەی شاری تیائەبێتەوە
بەس نیە خۆریش هەیە
پێڵوەکانمی شەو دائەخات
کاتێک فرمێسکی بارانی
ساڵە لەدەستچوەکان
بەسەر مۆمی کوژاوەی دڵی دایکە
شکاوەکان
لە باخچەی ئاسوودەیی
ئەبنەوە بە تنۆکە لم
ئەمشەو تۆش لەم زریانە ترسە
وەرە نێو تەمی دارستان
دڵنیابە لە تەما چاوەڕێتم
من کوڕی کەنار
تۆکچی تەم
هیچ نەبێ
ئەمشەو
لە م باخچە وێرانە
تۆ لە خەوما بە
من لە خەوتا ئەبم

وێنەکە کارێکی هونەری فۆتۆگرافەری بەریتانی
( Adrian Campfield)
بە سوپاسەوە لە پەیجی فەرمی خۆی وەرگیراوە.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish