Skip to Content

ماڵی مێروولەکان…کورتە چیڕۆک– نووسینی/ئەحمەد کامەران

ماڵی مێروولەکان…کورتە چیڕۆک– نووسینی/ئەحمەد کامەران

Closed
by September 7, 2020 General, Literature

رۆژێکیان ،کۆمەڵێک مێروولە کۆدەبنەوە لەنێوان خۆیاندا،کۆبوونەوەی ئەو کۆمەڵە مێروولەیە،سەبارەت بەبوونیاتنانی ماڵێکی بچکۆلانە بوو بۆخۆیان،بۆ ئەوەی تێیدا بحەسێنەوەو ،چیتر دەربەدەری هیچ شوێنێک نەبنەوە.
٭٭٭
پاش تەواوبوونی کۆبوونەوەکەیان ،راستەوخۆ مێروولەکان دەست لەنێو دەستی یەکتردا دەنێن و ،بڕیاری درووسکردنی خانوەکەیان دەدەن،بەڵام لەناکاو ،یەکێک لە مێروولەکان ،بەرووخسارێکی غەمبارو کزەوە،دەڵێت:باشە ئێمە خۆ کۆمەڵە مێروولەیەکی لاوازین ،چۆن ئەتوانین ،ماڵێک بۆخۆمان درووست بکەین؟ مێروولەیەکی تر ،کە بە مێروولە گەورە ناسرابوو،وەڵامی مێروولەی هاوڕێی دایەوەو وتی: ئێمە ئەگەر لەپشتی یەکتر بین و باوەڕمان بەخۆمان هەبێت،ئەوە هیچ کاتێک لاواز نابین،ئەی مێروولەی هاوڕێم،هیوادارم هیچ کاتێک خۆت بەلاواز نیشان نەدەیت،چوونکە هەرکاتێک خۆت بەلاوازی بینیەوە لەبەرامبەر ئەم ژیانەدا،ئەوە تۆ سەرەنجام ئەبیتە کەسێکی دۆڕاو،بۆیە داوات لێ دەکەم ئەی مێروولەی بچکۆلە هەمیشە باوەڕت بەخۆت هەبێت و بتوانە زاڵبیت بەسەر هەموو بەربەستەکانی ژیان.

‌‌٭٭٭
مێروولەکان توانییان ،بەماوەیەکی کەمدا،ماڵە بچکۆلانەکەیان ،تەواو بکەن ،ئیتر لەپاشان بە ئازادانە لەنێوی دا حەسانەوە،هەروەهاچیتر ژیانیان وەکو پێشووتر نەدەما،کەهەر جارەو کۆچیان دەکرد بوشوێنێکی نادیار.

٭٭٭

ساڵان تێپەڕی بۆ ئەم کۆمەڵە مێروولە بەختەوەرە،کەتوانییان لەخانوە بچکۆلانەکەیان بۆخۆیان بەختەوەرو دڵخۆش بژین و ژیانی رۆژانەی خۆیان بە ئاسایی بەڕێ بکەن،بەڵام لەناکاو ،کارەساتێکی سرووشتی روودەکاتە ناوچەی ئەم کۆمەڵە مێروولە بەختەوەرانە،هەربۆیە سەرەنجام بەهۆی ئەو کارەساتە سرووشتیەوە،ماڵی مێروولەکان بەتەواوەتی دەرووخێنرێت،ئەمەش وا لە مێروولەکان دەکات،کە ئیتر بێ هیوا بن لەوەی کە بتوانن جارێکی دیکە هەستنەوە سەرپێیەکانی خۆیان . بەڵام مێروولە گەورەکەی ناویان،راستەوخۆ ،فرمێسکەکەی نێوچاوی دەسڕێتەوەو ،لە پاشان هەموو مێروولەکان کۆدەکاتەوەو پێیان دەڵێت:ئێستا کاتی گریان نیە،ئێمە نابێت بێ هیوا بین،چوونکە بێ هیوایی چەکێکی زۆرمەترسیدارەبۆ ژیانمان ، بۆیە پێویست ناکات ئیتر ئێمە بێ هیوا بین ،لەکاتێکدا کە هەموومان پێکەوەین،بۆیە دووبارە بەیەکەوە ،هەوڵ و کۆششی خۆمان ئەدەینەوە بۆ درووسکردنی خانوویەکی دیکەو ژیانێکی نوێتر بۆخۆمان.
٭٭٭

-ئایا ئێوە لەگەڵم دەبن دووبارە هەڵستینەوە سەرپێیەکانی خۆمان و درێژە بەژیانمان بدەین،چوونکە ئەوە بەشێک بوو لەتاقیکردنەوەی ژیان کە رووبەرووی ئێمەی مێروولە کرایەوە،بەڵام ئێمە ئازاین و ئەتوانین لەسەرجەم تاقیکردنەوەکانی ژیان سەرکەوین…

-بەڵی ئێمە لەگەڵت دەبین ،مێروولە گەورەکە…

-زۆرچاکە،هەربژی،سەرکەوتن بۆخۆمان.

٭٭٭

مێروولەکان ،لەکۆتایی دا، گەیشتنە ئەو باوەڕەی ،کە دەبێت لە ژیان دا بەهیوایەکی زۆر قوڵەوە بژین،چوونکە ژیان هیچ کاتێک بەدڵی هیچ کەسێک نابێت کە ئارەزووی دەکات،بەڵام ئەوە هیواو ئومێدەکانن کە دەتوانن دەستمان بگرن بۆ رووبەروبوونەوە لەگەڵ سەختیەکانی ژیان…

کۆتایی…

Previous
Next