Skip to Content

مانیفێستی عەشق/ بەشی سیانزە… تێکست: ستیڤان شەمزینی

مانیفێستی عەشق/ بەشی سیانزە… تێکست: ستیڤان شەمزینی

Closed
by September 9, 2020 General, Poems

نیازم هەیە کودەتایەک بکەم بەسەر ئەم بێدەنگییەدا
چیرۆکی ئەوینمان بۆ رەشەبای دەم شڕ بگێڕمەوە


لەوەتی ئەم دنیا هەیە خەونێک هەر بەڕێوەیە بۆ لات
خەونی ئاوێتەبوونى ئامێزی ساردم لەگەڵ جەستەی گەرمت


پێشتر گەڵایەکی زەردی ناو وەرزی چرۆکردن بووم
ئێستا چرۆیەکی سەوزی مەوسوومی گەڵاڕێزانم


قەسیدەیەکم لە قوڵپی گریانەکانت بۆ چنیویت
تا بزانی فرمێسکەکانیشت تاڤگەی شیعری منن


لە تفت و تاڵترین رۆژانی هەمیشە تەنهاییمدا
وەک کانییەکی شیرین لە ژیانما هەڵقووڵایت!!


هەزاران ساڵ بە دوای عەشقی تۆدا وێڵ بووم
جگە لە دووریت هیچی ترم نەدوورییەوە!!


ئەوینت لە هەر چوار لاوە ئابڵووقەی داوم
بۆ هەر کوێ بڕۆم سەرەنجام ئەگەمەوە بە تۆ!!


تەنها یەک پێک لە ئەشقی جادوویم بنۆشە
تا قیامەت بە ئەوینمەوە سەرخۆش ئەبیت!!


بە خوێندنەوەکانی شیعرەکانم ئەبڵەق ئەبیت
کەچی هەموویان بە ژانی ئەوینتەوە لە دایک بوون!


خەنجەری تیژی عەشقت لەسەر سینگم چەقاند
لە بری خوێن، شیعر وەک فوارە فیچقە ئەکات!!


جادووگەر، بەیەک بزەت وەک ژیلەمۆ دائەگیرسێم
بە یەک فرمێسکیشت دەبم بە سووتوو و خۆڵەمێش


یەکەمجار تۆ تیشکی جوانیت خستە پێڵووەکانمەوە
دواتر من لەسەر کەلاوەی دڵم تەلاری ئەوینم چێ کرد


هەر ساتێ جوانی تۆ و دڵناسکی من یەکدەگرن
دڵۆپ دڵۆپ بارانی شیعر و ئەوین ئەبارێ


تۆ لە قەبیلەی گووڵاڵە سوورە و من لە تیرەی نێرگز
هەردووکمان لە باوانەوە ئەچینەوە سەر رەگەزی باخ


ئایا بیرت ماوە لە ئاسمان دراوسێی یەکتر بوون؟
لە کۆڵانی شەبەنگ لە گەڕەکی ئەستێرە ئاڵتوونییەکان!


بیرتە پێم وتی دڵم ئاوی ئاموون و توونی بابایە
هەر هاتیتە ناوی ئیدی گەڕانەوەی تێدا نییە؟!!


Previous
Next