کزەبایەک لە تۆوە … شیعر/ کاوە عوسمان عومەر

لە نەهاتنی کزەبای تۆ،،
لە بوونی خۆم بە گومانم،
لە سەپۆلی خەیاڵاوی فەلەک،،
بێبەروام، لە گیانەڵەی …
پایزێکی هەناسە سارد ،
وەک بەرد ، ڕەنگ مەرگم
هەست بەتاڵم ،
وەک،،
مەلێکی تەرە،،
بێ کەنارو بێ دەوارم
…………..
لە نەگەیشتنی کزەبایەکی..
سازگارت، گۆمێک لە تەنیایی،،
ئارامی لێ بڕا،،
ڕێچکەی شەپۆلی سڕبووی،،،
بەرەو زەردەی لێوی مەرگ برد،،
خونچەخەوتوەکانی..
قەراغ گۆمی سەرابیشی…
لە فیردەوسی گیاکان،،
سەرگەردان کرد
………………..
کە کزەبات نەهات،،
ڕۆح پەروانەیەکی ..
وێڵی سەرگەردانە،،
لە شەوێکا جێی نەبوەوە،،
سەری خۆی هەڵگرت،
لە هەردەی غوربەتی کەنارێکا،،
گیانی سپارد ،،
……….
کە کزەبات نەگەیشت،،
ئینجانەکانیش بێ گوڵن،،
خۆڵی وونبوون زۆر دەمێکە…
پەرژینی بێستانی چوون و هاتنی..
تۆی تەنیوە ،،
ڕۆژەکانیش وێڵن، بە دوای…
گەڵا جەستە پەرتبوەکان،،،
درەختەکان ڕەنگی بەهاریان فڕیدا،،
زەردی مەرگیان پۆشی،،
لەچۆڵی دەروازەی هاتنێکتا،،،
هەناسە بڕکێی شەقامەکانە،،،
بە دوای هەنگاوی..
ڕێبوارە خەمگینەکان،،
گڕی زەریایە،،
بۆ گەیشتنی هەورە سەرابیەکان،
…………………..
لە نەگەیشتنی کزەبایەکتا،،
باخچەیەک ماتەمپۆشە،،،
تەنها گمەئەوینی کوکوختیەک دێ،،
بۆ سنەوبەرێکی دڵ ڕەق،،
تنۆکە بارانەکانیش…
ئەمڕۆ تینوون، گوڵەبەڕۆژەی..
چرپەکان،،
چیتر ئاڵتوونی و گەشاوە نین،
کانیەکی وشکە،،
کەژی عیشقت ئەمشەو،
چاوانت بیابانێکە…
دارێکی تەنیام تیایدا ،،،
وشک و زڕ بە شکۆفە وەریوەکان،،
پڕ لەئەشکەنجەشە ،،
خوڕەی فرمێسکی پێڵوی ئاسمان،،
لە سەر لەپی قڵیشاوی هەورێک،،..
تریشقەی دوێشەو،،
جەستەی قەترانی..
هەنجر هەنجرکرد،،
………..
لە حەسرەتی نەهاتنی گزەبایەکتا،،
سەرچڵی قژی چاوەڕوانیش ، ،
لە ژوورەکەدا،،
سپی ئەکاتەوە،،،
بەسەر خۆهەڵواسینی…
ساتە باڵکراوەکان..
بە ملوانکەی بێدەنگیەوە،،
…………..
لە نەهاتنی کزەبایەکت،،
چی پروشە بێ دەنگیەکی ترسناک،،
وەریوەتە ڕوخساری شەختەبووی من ،،
لە وونبوونی بوونتا،،
لە نەبوونی بوونتا،،
گزنگی چاوی گڕینی خۆر..
چی سودێکی ماوە،
پریشکەی جوانی بێ یان نا،،
چی مانایەکی ماوە،،
ژیان ڕاست بێ یان خەو؟
ڕۆژبێ یان شەو؟
………………
لە دۆزەخی نەبوونتا،
تنۆکە لمی یادەکانت،،
بە سمکۆڵانی،،
ئەسپە سپیەکانی…
مەرگەوە ئەبریسکێنەوە،،
هێشوەو ترێی داری شەو تاڵن،،
ژەهرن،،
کە کزەبایەکی تۆ،،
بە دارستانی ئەمڕۆو.. سبەینێشا..
تێناپەڕێ

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.