Skip to Content

شاری شین و دوو شیعری تر… ژیار ئەسوەد

شاری شین و دوو شیعری تر… ژیار ئەسوەد

Closed
by September 20, 2020 General, Poems

شاری شین

بەفری شینی ڕۆژ، شەوی ماتەمی دەهێنێتە ئافراندن.
ئەمێستا تەنیایەک لەسەر ڕۆخی ڕووباری سێن ڕاوەستاوە و بوتڵێکی بەتاڵی بەدەستەوەیە.
لە شەوێکی ئاوها نووتەک، گڵۆپی دوو چاوی مەست هەر بەشی ئەوەندە دەکا کۆمەڵێ سیمای سپیهەڵگەڕاو و مەنگ ببینێ.
جلوبەرگی تەڕیش بەسەر ڕووی ڕووبارەوە مەلە دەکەن.
دەڕوانێ: تابووتێ، بزەیەکی مێیینەی فریودەری لەسەر لێوە.
دەبیستێ: لەگەڵ کرانەوە زریکەی لێوە دەردەپەڕێ.
شەو بە پێخاوسی ڕادەکا؛ سپێدەیە و شوێنەواری تابووت بووە بە مێژوو.
ئاوکوژێنەرەوەکان ئاگر بە شەختەبەنددا دەکەن؛ ئامبۆڵانسیش خەریکە تەرمێک و بوتڵێکی بەتاڵ هەڵدەگرێتەوە.

ئۆپەراسیۆن

لە شاری دروستکراو لە تەپوتۆز، ناوەکەی داتاشراو لە خۆڵ: ئارابخا، لە بازاڕەوە بە کیسەیەکی پڕ شیعرەوە دەگەڕامەوە ماڵ؛ ھەندێ کەرەستەی ئەوتۆم پێ بوو بۆ ئەم شیعرە نوێیەم. ناکاو پاسەکەمان وەستا و سەربازێکی دەموچاو پێچراو چەشنی تێرۆریست ھات و دەتگوت بەدوای تێرۆریستی ھاوچەشنیدا دەگەڕێ. ھەر بە بینینی چەکە درێژەکەی ناو دەستە ڕۆبۆت ئاساکانی، بیرۆکە ھەڵفڕی و بووە ھەڵم بە بنمیچەکەوە. نەموێرا ھەستمە سەر پێ بیگرمەوە، نەکا بە فیشەکێک خوێنم کانیلەی سەر خاشاک بێ. ناسنامەکەی پشکنیم و پێی دامەوە. ئۆپەراسیۆنەکە ئاسان تێپەڕی، بێ پرسیار لە بنەچەم کە دەگەڕێتەوە بۆ وشە و بێ پرسیار لە شوناسم کە نیمە. دواجار کاسەی سەرم ھەڵدایەوە کەرەستە نەمابوو، تەنھا: سەربازی ڕۆبۆت، چەک، ناسنامە و شیعرێکی ھەناو بەتاڵ.

ڕووخان
(یان شیعرێک بۆ دایک و باوکان)

ھەموو
سەرەتایەک
لە
قابیلەوە
دەستی
پێ
کرد.

ھەموو
ئێمە
لە
خوێنی
ڕژاوی
ھابیلەوە
ئافراین.

Previous
Next