مانیفێستی عەشق- بەشی پانزە- تێکست: ستیڤان شەمزینی
نیگام بکە لە رۆحی ئەفسانەکانەوە هاتووم
ئەمەوێ بتخەمە ناو حکایەتەکانی ئەشقەوە
بڕیارمدا زۆر دوور بڕۆم، زۆر دوور دوور رۆیشتم
کەچی هێشتا لە سنووری دڵی تۆ دەرنەچووم
تۆ چ موعجیزەیەکت؟ ساتێک لێوت خستە سەر لێوم
دەمم پڕبوو لە شیلەی ئەشق و
رۆحیشم تەژى بوو لە هەنگوینی شیعر
یادکردنەوەی ئامێزی گەرمت، تەنیا فرمێسک دەخوازێ
هەروەک چۆن زەوی بێروون شەستە بارانی پێویستە
بزانە من چۆنم؟
هەر کاتێک دەرگای خەونەکانم لێ دائەخەیت
لە پەنجەرەی خەیاڵەکانەوە دێمە ژوورەوە
بیرت ئەکەم
چیترم لە دەست نایەت جگە لەوەی لە شیعرێکدا بتنووسمەوە
چیترم لە دەست نایەت جگە لەوەی لە خەونێکدا بتبینمەوە
تووڕە مەبە لە سەرشێتییەکانم
ئاخر ئەوینت ئاگرێکی لە ناخمدا کردۆتەوە ئەبەد ناکوژێتەوە
کە تۆم ون کرد لە هیچ شوێنێک بۆت ناگەڕێم
چوونکە لەناو دڵی خۆمدا ئەتدۆزمەوە
تۆ ئاسمانێکی ئەوەندە فراوان و بەرینی
هەرچەند دوور بفڕم هێشتا لە تۆ نزیکتر ئەبمەوە
بڕیارێکی گرنگم بەدەستەوەیە
بڕیاری ماڵئاوایی لەهەموو شتێک، تەنیا ئەوینی تۆ نەبێت
مەرگ هیچ کات دەرەقەتم نایەت
چوونکە شەرابی نەمریی ئەوینی تۆم نۆشیوە
مردن لەبەر من هەڵدێ
چوون پەیمانی ژوانێکم لەگەڵ تۆ بەستووە
دووری تۆ، گوزارشتێکی جوگرافی نییە
دووری تۆ، گوزارشتێکی رۆحییە
زۆر سەیرە کە نابینیت
لە دڵی تۆدا وەک مەسیح لە خاچ دراوم!!
ئەی “شەم”ی من
تۆ دۆزەخی هەزاران “وەلی” وەک منیت
ئەی “جولێت”ی من
تۆ ئاسمانی هەزاران “رۆمیۆ”ی برینداری وەک منیت
لە کۆتاییدا هەموو شتێک لەناو دەچێت
تەنیا ئەشق دەمێنێتەوە، ئەشق!!!
