Skip to Content

ڕێ پێگرتن … نەوزاد بەندی

ڕێ پێگرتن … نەوزاد بەندی

Closed
by September 24, 2020 General

ناشیرینترین و دڕندەنترین و ساویلکەترین دیاردە ،دیاردەی ڕێ پێگرتنە .. مێروولەیەک حەقی بە تۆوە نیە وبە ڕێی خۆیدا ئەڕوا ، بۆچی ڕێی پێئەگریت و ئەیکوژیت یان برینداری ئەکەیت وپێی ڕائەوێریت ؟ ..هەنگێک بە هێمنی ئەفڕێت و بە دوای شیلەی گوڵدا ئەگەڕێ ، بۆچی چەپۆکێکی پیا ئەکێشیت و ..لە زەویدا ئەیگەوزێنی و ئەیتلێنیتەوە ؟ ..گوێدرێژێک ..سەگێک ..پشیلەیەک ..بەزاقە ڕووتەیەک ..چۆلەکەیەک ، لە خەیاڵ و لە ژیانی خۆیدا ئەژی و بە تەنیشتتا تێدەپەڕێت ، بۆچی ئازاری ئەدەیت ؟ بۆچی ئەیکوژیت یان کەمئەندامی ئەکەیت ؟ بۆچی ڕاوی ئەنێیت و ..چوار چاوی ئەکەیت و ئەیتۆقێنیت ؟..
بۆچی ڕێ بە ژیانی مرۆڤەکانی ووڵاتەکەت ئەگریت ؟ جارێ ڕێ بە سووتەمەنیەکەیان ئەگریت و ..وا دەکەیت هاووڵاتیان ٢٤ سەعات چاوەڕێی پڕکردنی تانکی ئوتومبیلەکانیان بکەن ..وا دەکەیت زستانەکانیان لە سەرماندا هەڵلەرزن و ئاگردانیان سارد و سڕ بێ ..وا دەکەیت دامەزراندن ببێ بە مافی خواپێداو و دەستڕۆیشتوان و سەدان هەزار لاو لە ماڵەوە بە دڵشکاویی دانیشن ..وا دەکەیت هەزاران لاو سەری خۆیان هەڵگرن و لە دەریاکاندا بخنکێن ..وا دەکەیت لاوانی نیشتمانەکەت لە دژی یەکتریی چەک بکەنە شانیان و یەکتر قەتڵ و عام بکەن ..وا دەکەیت خەڵک لە تاریکی و بێ ئاویو بێ ئومێدیدا ، تووشی هەزارو یەک دەردی دەروونی و جەستەیی بن ..وا دەکەیت مناڵان نەتوانن جلی جەژن بکڕن ..
بۆچی ڕێ لە موچە و قوتی هاووڵاتیان ئەگریت ؟ جارێ لە قۆڵی موچەوە و ..جارێ لە قۆڵی گەنم و دانەوێڵەوە و ..جارێ لە قۆڵی تەنگژەی سیاسی و هەرێمیەوە ..ئاخر لە هەموو سەردەمەکاندا کە سەگ و گورگ فەرمانڕەوایی ئەم خەڵکەیان کردووە ، کەسیان ڕوویان نەهاتووە و شەرمیان کردووە لەوەی ڕێ بە موچەی مامۆستا و فەرمانبەران بگرن ..خراپترین فەرمانڕەوا لە مێژووی مرۆڤایەتیدا پێی نەنگیی بووە ڕێ بە کاروانی موچەی فەرمانبەرەکانی بگرێت و بیبا بۆخۆی و ..مانگیان لێ بکا بە شەست و حەفتا ڕۆژ ..
عەیبە ..عەیب ..فەرمانبەران و کاسبکارانت لە ڕاسته شەقامی ژیاندا ڕاگرتووە و ..بە چاوی لە مۆلەق ڕاوەستاوەوە تەماشای قوتی ڕێپێگیراویان ئەکەن ..نازانن بە چ هاوارێ داوای مافی دزراویان بکەن ..نازانن بە چ قیژەیەک بچن بە گژتاندا ..نازانن چ جۆرە تفێک هەڵبدەن ..نازانن ئەمە ڕاستیە یان خەون ..نازانن چۆن بە گژ ئەم ڕێگرانەدا بچنەوە چونکە لە مێژوودا ڕێگریی لەو جۆرە ڕووی نەداوە هەتا پەند و بەرنامەی لێ وەربگرن ..
هەر بۆیە ئەم ڕێلێگرتنانە ئەیسەلمێنن، ئێوە نەک هەرکورد نین ، بگرە سەربە تیرەی مرۆڤ نین و ..دڕندەیەکی دروستکراوی وەک ڤایرۆسی کۆرۆنان ..ئێوە دروستکراون ، فوو دراون ..میوتەیشن و لێکدراوی کڕۆمۆسۆمەکانی کەمتیار و شەیتانن ..ئێوە مێژووی مرۆڤایەتیتان توشی شۆک کردووە و نازانێ بەچ زاراوەیەک ڕیکۆردتان بکا ..ئێوە ڕووی دڕندە و دژە مرۆڤ و دژە ژیانەکانی مێژووی مرۆڤایەتیتان سپی کرد ..
ئێوە ڕێگرن ..ڕێگر ..

Previous
Next