مانیفێستی عەشق …16- تێکست: ستیڤان شەمزینی
بەشی شانزە..
لە دووریتا گلێنەکانم دڵۆپە بارانی رەنگ سوور
بەسەر پێدەشتەکانی دڵما ئەبارێنێ
لە ئاسمانی مندا تەنیا تروسکاییەک هەیە
ئەوەندە رەونەقدارە سەرزەمینی کردووە بە چراخان
ئایا ئەزانی باسی تۆ دەکەم؟
بۆ ژیاندنەوەی کانیاوی وشکبووی رۆحت
تەنیا بۆ چەند چرکەیەکیش بێ ئاشق بە
خۆر لە دەستەکانی تۆوە هەڵدێ
مانگ لە چاوەکانی تۆدا ئەبریسکێتەوە
بارانی ئەوینت ببارێنە بەسەر دڵمدا
چوونکە خەریکە دەبێتە بێروون
کلوە بەفری ئەشقت بەسەر رۆحما ببارێنە
ئاخر زۆر دەمێکە بووە بە بیابان
دەتوانم بەرانبەر بە یەک لەشکر سەرباز بوەستم
کەچی توانای بەرەنگاریی یەک نیگای تۆم نییە
لە دەستنووسێکی دێرینی دێوانەیەکدا نووسراوە
دەستنوێژی ئەشق بە فرمێسک نەبێت هەڵناگیرێت
ساتێ تەرمی من بە بەردەمتدا رەتبوو
لە هیچ بکوژێک مەپرسە سزای دڵڕەقی خۆت بدە
ئەوەی دوێنێ و ئەمڕۆ و سبەینێم پێکەوە ئەبەستێتەوە
تەنها و تەنها هێزی ئەشقی نەبڕاوەی تۆیە
لە بارەی دێوانەکانەوە ئەفسانە و کتێبە کۆنەکان دەخوێنیتەوە
لە بری سەیرکردنی رابردوو بڕوانە چۆن ئێستا منت کردۆتە دێوانە؟
ئەگەر چاخی کۆیلایەتی بگەڕێتەوە هەرگیز نابم بە سپارتاکۆس
نا.. نا.. زۆر ئارەزوومەندانە دەبمە کۆیلەی لار و لەنجەی تۆ
جۆگەلە بەستنی فرمێسکەکانم بوو بە ئۆقیانووس
پێم بڵێ چۆن بەرگەی شەپۆلەکانی دەگریت؟
کە رۆیشتیت تەنیا یەک شتت بەجێهێشت
ئەویش تەرمی هەلا هەلابووی من بوو
تۆ لە شەپۆلێکی تووڕە دەچی، منیش لە کەشتییەکی وێڵ
تۆ لە زریانێکی بەهێز دەچی، منیش لە کوخێکی وێران
ئێوارەیەک بۆ ئەبەد ون ئەبم لە ئێستاوە تەنیا وشەیەکم هەیە
ئەوی لە سەرابەوە هاتبێت بێگوومان دەبێت بە غوبار
ئازیزم هەموو رۆژێک لەگەڵ هەڵاتنی خۆردا دێم
ئەگەر رۆژێک نەهاتم، بزانە کە مەرگ هاتووە
بڕیارم دا سەفەر بکەم، سەفەرێکی بێ کۆتایی
بەرەو مەملەکەتی ئەوین و دڵی پڕ جۆشی تۆ
