Skip to Content

بەندەرێکە چاوەکانت… شیعر / کاوە عوسمان عومەر

بەندەرێکە چاوەکانت… شیعر / کاوە عوسمان عومەر

Closed
by ئه‌یلول 28, 2020 General, Poems

تەنها یەک مەل بەسە بەیانی بێنێ،
کیشوەرێکە ڕۆژێکی تازە،،،
ئەمانبات و ئەمانهێنێ،
شاخێ خەمت هەڵچنی، بەڵام…
لە کوڵان و کوچەکانی عیشقما نەبووی،،،
تاڤگەی بوونتم بزرکرد،،،
نەمزانی بەندەرێکە چاوەکانت، ،
کەشتیە وێڵەکان ..
تا چەند سەدەی تر
بەدواتا بگەڕێن، تا لەنگەر گرن؟
………………

لەدوای خۆمان،،،
دەرگا دانەخراوەکانی ڕابردوو..
لە توڕەییا، ئەبنە پەرتووکی کراوە،،,
ئای چەند شیعری سەرگەردان..
لە ووڵاتی کۆچا،،
بای غەریبی ئەیبا،،،
هەموو شتێک بێدارە،،
گوڵە هەڵاڵەیەک ، بێدارە..
لە نەهاتنی هەنگێک،،،
سنەوبەرێک بێدارە..
لە دەرنەکەوتنی کوکوختیەک،،
شەوێک بەدیار هەورێکی..
چاو پڕ گریان، بێدار
زەریایەک بۆ کەشتیەکی وێڵ، بێدار
ئەستێرەیەک بۆ هاتنەوەی تۆ، بێدار،،
بێداریی من..
بۆ بینینی هەمویان
………………..

لە ناوشارام،،،
بەڵام شار وونە
لە کوچەکانم، بەڵام…
خەڵکەکەی خەونە،،،
لە کوێستانەکانیم، بەڵام..
شنەباکەی جەرگی کون کونە،،
لە بەردەم خۆرەکەیام..
بەڵام گوڵە بەڕۆژەی..
کێڵگەکانی منداڵی بزرە
………
گەر ڕوو بە ڕووش،،،
نەشتدۆزمەوە،،
پیاسەیەک بە قامیشەڵانی…
ووشەو ئەندێشەی گیا خەوتوەکانا ئەکەم،،
لە دەرگاوانی ڕازێ ،،،
داوای دەفرێک..
لە شەونمی تەنیایی و..
خاکە لێویش،،
چنگێ نێرگزی پەمەیی بێهودەیی بێ،،

……………………

ئەوەی لێرەیە بۆت ئەمێنێ،،
بەڵام زوو یان درەنگ…
فلوتی بای تەمەن،،
لێت ئەسەنێتەوە،،
خۆزگە ڕەها بوینایە،،
بۆیە باوەڕم نیە هیچ شوێنێک،،
لە دورخەکانی دڵا جێی بێتەوە،،
تەنها بەندەری چاوی تۆ نەبێ،،
……………………
لە حەسرەت خۆسوتانی دارستانی…
ئەسرینی عیشقێ،،
درەنگانێ چراکانی..
ئاورینگی شیعرم بۆت کوژاندەوە،،
ڕێگەم دا..
لەگەڵ پووش و پەڵاش و گەڵاکانا،،
پایز،،،،
بە ئاوی ڕۆحی لەدەستچووی…
گوڵی وەریو..و..
شەونمی فرمێسکی…
تکاوی جۆگەی چاوی تۆ
شەقامەکانی تەمەنم بشواتەوە
……………………
بەیانیان بێ تۆش
خۆرهەڵات هەر نایەت،،
ئاوێنەیەکی شکاوە ،،،
دەروازەی ڕۆژم
……………..

وەرزی هەتا هەتای جەنگ،
هەڵدێری ڕۆحپژانی هاوڕێکان بوو،،
تاسەی لەدەستدانی باڵەکان،،،
قرتانی ڕەگی شەوە شینەکانی ژوان، ،
تۆ ووتت، با کۆچ خۆی،،
نیشتمانی ترت بێ،،
خەمت نەبێ،،
تۆپی ڕەشی ئاسنی چارەنوس،،
هەمیشە وەک بەندۆلی کاتژمێرێکی مەزنە،،،
بەسەرمانەوە،،
بەڵام ئەوسا سرک ترو..
بوهەیمی تر بوین،،
ئەو گۆزانەش ڕۆژانێ…
بە خەندەوە پڕمانئەکردن لە هەنگوینی..
شیعر و شەرابی گیای بەرائەت،،
بە کێوی نسرمی گوڵا هەڵئەگەڕاین،،
تا ترۆپکی کازیوەیەک لە ئەفسوون..
بەڵام تەمەن وەک فڕەی..
نەورەسێکی سەرکەنار تێپەڕی،،
بۆیە وازوو لە بیابانەوە گەڕاینەوە،،
درەنگ زانیمان، ،،
گوندە سپیەکانی بەهەشت
لە ئاوازی ڕابردوو بوون،،،
درەنگ بە ئاگاش هاتین..
کە کانیە ئەرخەوانیەکەی..
زمانی ڕۆح ووشکی کرد،،
،، گەڕاین ، زۆر گەڕاین،
تا ئەو شوێنەی..
نە بەهەشت بوو، نە دۆزەخ،،
پێڵاوەکانی من هەم لە گیاو ،
هەم لە هەور بوو،،،
تا سپێدە،،،
دەستەکانم کڵپەی شیعر بوو بۆت،،
ئێستاش..
کانی ڕژاوی مانگێکی ئەرخەوانیە،،
ناخی منی کردوەتە..
یاقیق ڕژان و مرواری پرژان،،
بۆیە تا ئێستاش بە ئاو
قسە ئەکەم،،
ئەی بەهاری مەست،،
بە گەڕیدەیی ناکۆتای من،،
خۆشبەختم لە ناو گەلەری..
هەموو پەیکەرە مرۆڤەکان،،،
ڕۆحی عاشقی نەورەسێکم..
خستە ناو دەسڕی ئاوریشمی شیعر،،
سنگم گیاو هەور و شەپۆلە،،
چاوم بە کۆچی..
نێو گزنگی قازە پەمەیەکانی…
نێو دارستانی سپی پاکێتی تەنیایی…
ئەدرەوشێتەوە،،
ماڵئاوا،،
ئەی زەمەنی ڕۆبۆت و ماشینە..
نەفرەتیەکان،،،
چیای یاخی ڕەشی شیعرم،،
باڵاترە ..
لە بەهای ژەهرینی ماتریاڵی..
جیهانێک ئافات بردوو،،
خۆریش کۆنبوو،،،
چونکە ئەو خەڵکانەی..
لە ژێر ئاگردانی ڕۆژەکانا،،
جەستەی تەزیوو..
ڕوتیان گەرم ئەکەنەوە،،
سوپاس گوزار نین،
لە خۆسوتانی چاوی گەردوون،،
گەر خۆر نەبێ..
ئەم هەموو گوڵە بەڕۆژانەی کێڵگەی،،،
جوانی سروشت،،
چۆن لە هەناوی فوارە مۆرەکانی..
خەونەکانا باڵا ئاکا؟؟
ئەوەتا پایز،،
بە چاکەتی پرتەقاڵی گەڵاو
و کڵاوە هەورێ لە فرمێسک…
لەبەردەرگا..
چاەوەڕێیە،،
پێکەوە پیاسەیەکی..
سەر کەنار کەین،،
سەیرە، لەم شارە وێرانە، لەم،
وێرانە شارە، پایز،
جگە لە من،،
کەسی تری نەدۆزیوەتەوە
پیاسەی کەناری لەگەڵ بکا؟
سەیرە لەم وێرانە شارە،
ئاشووب زاڵە،
چەتە حوکمدارە،
نە ماسی ما، نە دارستان، نە مەل، نە دەریا
……………….

با پەنجە پیانۆی ئاو،
نامەی شەوم بۆت بنوسێ،،
ئەزانم کەس چیتر..
نامە بە پەنجەی شیعر نانوسێ،،
ڵام دێڕێک بۆنی..
قەوزەو گیای پەنجەی..
تۆی لێ نەیەت،،
با هەر نەمگاتێ

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish