Skip to Content

دانپیانانەکانی مەلا بختیارو هەڵوێستی گۆڕانخوازان! … مستەفا باهر

دانپیانانەکانی مەلا بختیارو هەڵوێستی گۆڕانخوازان! … مستەفا باهر

Closed
by September 30, 2020 General

مەلا بەختیار، ئەندامی پێشووی مەکتەبی سیاسی یەکێتی نیشتمانی، لە لێدوانێکدا کە بەبۆنەی بڵاوکردنەوەی کتێبەکەیەوە ئەنجامی دا، چەندین ڕوداوی کوشتن و تیرۆری ئاشکرا کردکە لەلایەن یەکێتی نیشتمانی کوردستانەوە دژی نەیارانی سیاسیی ئەنجام دراوە. مەلا بەختیار زۆربەی ئەو تاوان و تیرۆرو کوشتنانەی خستە ئەستۆی نەوشیروان مستەفا .
هەرچەندە نەک مەلابەختیار بەڵکو کەسانێکی تریش باسی ئەو تاوانانە دەکەنو بە هەمان شێوە پەنجەی تاوان بۆ نەوشیران مستەفا ڕادەکێشن، بەڵام سەرانی ئەوکاتەی یەکێتی نیشتیمانی بیانەوێت یان نا، بەرپرسن بەرامبەر بەو هەمو تاوانەی کە نەوشیروان مستەفا ئەنجامی داوە،چونکە جیا لەوەی کە لە کۆبونەوەی خۆیان چی ڕوی داوە یاخود چی وتراوە بەجێی خۆی،بەڵام هیچ کام لە بەرپرسانی یەکێتی بەشێوەیەکی ئاشکرا ئەم تاوانانەیان ئیدانە نەکردوە بەخودی مەلابەختیاریەشەوە.
بەڵام لە ئیستادا کەمەلا بەختیار بەشێوەی ئاشکرا پەردە لەسەر ئەم تاوانانە هەڵدەماڵێت. لەبەرامبەردا گۆڕانخوازان بە تەواوی شپرزە بوون و بەشێوەیەکی زۆر فاشیستانە هێرشدەکەنە سەر مەلابەختیار،کار بەوە گەشتوەکە ژمارەی تەلەفونی خیزانی ئەو بڵاودەکەنەوە ،کە ئەمە یەکێکە لە قێزەوەنترین کارەکان کە دەستی بۆ دەبەن، ئەم کارە دواکەوتوە فەرهەنگی ئیخوانەکانی میسرە کە بەدیاری نێردراوە بۆ بەشێک لە گۆڕانخوازان لە گردەکە.
لە بری ئەوەی بە شێوەیەکی عەقڵانی و بە بەڵگە جوابی مەلابەختیار بدەنەوە،جگە لەوەی کۆمەڵێک جنێوی بازاڕی ڕیزدەکەن،دۆکیمێنتێکیان بڵاو کردوەتەوە کە باسی پەشیمان بوونەوەی مەلابەختیار دەکات کاتێک کە دیل بوە لای ئەوان. بەڵام لە راستیدا هیچ وتەیەکی زیندانی سیاسی لەژێر ئەشکەنجەدا بەهەند وەرناگیرێت،کەسانێک لەسەرهەربیرو باوەڕێک گیرابێتن ولە بەرامبەرمەرگدا ڕاگیرابێت کۆمەڵێک فاشیست لێکۆڵینەوەی لێ بکەن چۆن دەتوانێت بە ئازادانە قسەبکات، بۆیە ئەو بەڵگانە هیچ بەهەند وەرناگیرێت.
ئەوەی لەم ماوەیەدا بە تەواوی بۆ خەڵکی کوردستان ڕوون بوەوە لەزاری بەرپرسانی ئەو بزوتنەوەیەوە ، ئەوەیە کە بەرپرسانی بزوتنەوەی کوردایەتی بە هەمو حزب و باڵێکیانەوە ،دەریان خستوە نەک شۆرشگێڕ نەبوون، بەڵکو کۆمەڵێک چەتەو ڕێگربوون لەو شاخانە خەریکی کوشتنی خەڵکی هەژاری کوردستان بوون،کە دەسەڵاتیشیان کەوتە دەست بوون بە مافیاو جگە لەوەی کە سەروەت وسامانی سەرزەوی ژێڕ زەویان تاڵانکرد بۆ خۆیان ،ئێستاش کەوتونەتە دزینیی پاروی دەمی منداڵانی هەژاران.
بۆیە دەبێت خەڵکی کوردستان تا زوە خۆیان ڕزگارکەن لەم دەسەڵاتە کە لە شاخ و شار هەمیشە بون بە مایەی دەردیسەری بۆیان. چونکە تا ئەمانە دەسەڵاتداربن ژیان و گوزەرانی خەڵکی ساڵ بە ساڵ بەرەو خراپی دەڕوات . بۆیە تەنها ڕێگا لەبەردەم خەڵکی کوردستان یەکگرتنی کرێکاران و هەژارنی کوردستانە بۆ ڕاماڵینی ئەم دەسەڵاتە.

مستەفا باهر
٣٠/٩/٢٠٢٠

Previous
Next