Skip to Content

دوو شیعری نەوزاد بەندی

دوو شیعری نەوزاد بەندی

Closed
by October 4, 2020 General, Poems

ژیانێک لە مردن

نەمئەزانی
فێری فڕینم ئەکەیت و ،
لە نیوەی ڕێ ،
باڵم ئەنێری بۆ مقەست ..
فێری گەڕانم ئەکەیت و
لە پێچێکدا ،
ئەمخەیتە ناو هەڵدێرێک و
ناویشم لێ ئەنێی بنبەست ..

بیشمزانیایە ، هەر وا بوو ..
هەر قەزا و
قەدەری خوا بوو ..

لێرە کەس جوڵەی بۆ ناکا ،
هەرچی ڕووبا ، لە خواوەیە ..
چاوەڕوانن چاکی بکا ..
هەر خۆی گەورەی ئەو ناوەیە ..

—————————————————

جەنگی سارد

هەرشتێ
تۆم
بیرخاتەوە ،
گەرنووسراو بێ ، ئەیسڕمەوە
گەر چێنراو بێ ، ئەیبڕمەوە ..

گەر گوڵ بێ ، هەڵیئەوەرێنم
گەر دڵ بێ ، ڕایئەوەستێنم

باڵندە بێ ، هەردوو باڵ و
دەنووک و
نینۆکی ئەکەم
فەیس بوک بێ ، بلۆکی ئەکەم..

Previous
Next