Skip to Content

مانیفێستی عەشق… بەشی حەڤدە… تێکست: ستیڤان شەمزینی

مانیفێستی عەشق… بەشی حەڤدە… تێکست: ستیڤان شەمزینی

Closed
by October 4, 2020 General, Poems

من پیاوێکم وەک باران ئەبارێمە سەر رۆحت

تۆش لەناو دڵتا ئەشقێکی شێت ئەدوریتەوە



ئەو رۆژەی من ئەمرم و بۆ ئەبەد ئاوا ئەبم

ئیتر چیدی لە ئاسۆوە خۆری ئەشق هەڵنایە




هەر کات ویستت لە خۆتم دوورخەیتەوە

نیشانە لە جەرگ و دڵی خۆت بگرەوە




چارەیەکم نییە هەر ئەبێ دوای ئەشقت بکەوم

چوون هەموو پردەکانی گەڕانەوەم خاپوور کردووە




وەک پرۆمیسیۆس ئاگرم لە ماڵی ئەشق دزی

تا ئاوڕم دایەوە تەنێ کۆیزوخاڵەکەم مایەوە



بیر و هۆش بەکارمەهێنە چوونکە ئاشقین

ماتماتیکی ئەشق دڵ تێی ئەگات نەک مێشک


وەرە ئەم تەنهاییە سامناکەم پڕبکە لە ئەوینت
وەرە ئەم کابووسەم پڕ بکە لە تریفەی خۆت


وەرە ئەم دەریا مردووەی دڵم پڕبکە لە شەپۆل
وەرە ئەم خەیاڵەم تەژی بکە لە ئەفسوونی خۆت


گەر هاتم لە شیعرێکی نوێدا پیت بە پیت ئەتنووسمەوە
تەنها لە خەڵوەتی ئەشقماندا، بۆ تۆی ئەخوێنمەوە


گەر تۆ بێی، بێڕەنگی ئێستام ئەبێتە زەخرەفەی رەنگ
گەر من بێم دەست ئەگرم بۆ سەر تاڤگەی روونی ئەشق


گەر هاتی پەنجەکانت ئامادەکە بۆ ژەنینی تەمبوری دڵم
گەر هاتم بزانە هەنگاوەکانم لەگەڵم نایەنەوە بۆ رۆشتن


من بۆ تۆم، دنیاش بۆ هەموو خەڵک
تۆش بۆ من بە، با دنیا ببێتە موڵکی خۆم


وەرە تاسەی ئەشقت لە دڵی منا بشکێنە
بەڵێن بێ، دێم خەمی دووریت ئەکەم بە هۆنراوە


وەک تابلۆیەک ئەتگرمە چوارچێوەی شیعرم
مینا کارمامزێکی بریندار توند بمگرە باوەشت


لێوت بە شەرابی لێوم، سوور سوور بکە
تا دڵم پڕ پڕ بێ، لە بۆنی خۆشی هەناسەت


وەک دەریاوانێک راوی توڕەترین شەپۆلم ئەکرد
کەچی ئەشقت ئەمجارە سەرکەشیی راو کردم


بە ماچێک منت خستە ناو بەهەشتی خۆت
منیش بە شیعرێک تۆم بردە ماڵی ئیرۆس


ستوكهولم – سولنا

Previous
Next