Skip to Content

داری زڕی چاوەڕوانی … شیعر/ کاوە عوسمان عومەر

داری زڕی چاوەڕوانی … شیعر/ کاوە عوسمان عومەر

Closed
by October 4, 2020 General, Poems

چاوەڕوانی دارێکی ژەهرینە،،
زیندانی کردنێکی خۆبەخۆیە،،
دەستاڕێکی زەبەلاحە..
هەر چرکەیە و..
پەیکەری بەردینی بوون،،
ئەهاڕێ‌،،
چاوەڕوانی هەورێکی..
ئاوس بە پشکۆو پۆڵای تواویە،،
سۆمای کراوەی تەمەن ..
کون کون ئەکا،،
چاوەڕوانی…
ئاوی ڕەشی بێهودەییە،،
وێنەی سەرابی عیشقیک..
لەسەر پە نجەرەی بەرائەت،،
ئەشواتەوە،،
چاوەڕوانی…
جازێکی ناسازە،،
کۆترە سپیەکانی بیرەوەری،،
هەڵئەفڕێنێ،،
چاوەڕوانی ئافرەتێکی…
جادوگەری مەرگپۆشە..
تەور بەدەستە،،
دەسکە گوڵە ڕیحانەی …
ڕۆح هەڵئەپاچێ..
چاوەڕوانی،،
پیاوێکی ڕوخسار گورگە،،
بە چنگە ڕەشە خوێنلێتکاوەکانی..
ملی ئاسکە پەمەیەکانی..
ژوان ئەچڕێ،،
مارێکی سپی چاو سوورە، چاوەڕوانی،،
ناهێڵی پەنجەکانی ئەڤین بگەنە ..
سێوە پەمەیەکانی..
نێو سەبەتەی عیشق،،
چاوەڕوانی …
نەهەنگێکە نیوە مردوو،،
لەسەر قەراغی زەریای تەنیایی،،،
چاوەڕوانی..
نەگەیشتنە..
لەسەفەرێکا،،
بەرەو شاری کات،،
چاوەڕوانی گوریسێكی چڵکنە،،
بە قۆچی ئاژەڵی..
ترسناکی مەرگەوە بەستراوە،،،
لە ملا ئاڵاوە،
چاوەڕوانی کێکێکی ژەهراویە،،
لەسەر مێزی پلانی دوێنێ و..
ئەمڕۆو سبەینێکان دانراوە،
چاوەڕوانی..
سەربازێکە لە مۆڵگەیەکی دوور،،
نیشانە لە دڵ ئەگرێتەوە، چاوەڕوانی…
شەمەندەفەرێکە،،
لە ناو قوڕ چڵپاوو لیتەی ..
وەرزە تێپەڕیوە ووشک و..
بێ فڕەکانا چەقیوە،،
چاوەڕوانی…
هاوارێکی ترسناکە…
لە چۆڵەوانی گەردونێکی بێ سۆز..
و بێ ئاگاو داڕوخاوا،،
چاوەڕوانی بیرچونەوەیە،،
لەوەی
شنەبایەک هەیە،،،
زەردەپەڕێک لە باڵی…
پەپولەیەکا خۆی حەشارەداوە، ئەستێرەیەک…
نوقم لە گۆمێکی مەنگ لە مانگە،،،
چاوەڕوانی…
کەرەنتینی دڵە،
گەڕانەوەیە…
بۆ نێو ئەشکەوتە ڕەشە مەزنەکانی فەنا..
چاوەڕوانی…
خەوتنێکە…
لەسەر دەرزی و پشکۆ،،
سەمایەکە،،
لە سروتی یاری هییچا

———————————

وێنەکە کارێکی هونەری فۆتۆگرافەری ئەڵمانی
( S. Hermann. F. Richeter)
بە سوپاسەوە لە پەیجی فەرمی خۆی وەرگیراوە

Previous
Next