ساتەوەختێکی لەدەستچوو … شیعر/ کاوە عوسمان عومەر

بەلەمێک لە حەسرەت ،،،
لەسەر پشتی نەهەنگی خەو،،
هێدی هێدی..
رێی گرتوەتە فیردەوسی نیگایەک،،
ماسی گرێک ،،
ویستی بە قولابی خۆشەویستی،،
پرچە زیوینیەکەی مانگێکی مەست..
لە نووری ئەبەدیەت ڕاوکا..
شاعیرێک…
ئێوارەیەکی ساردو تەزیوی..
کردە جامی گڵینی خۆشبەختی وەریو،،
بێدەنگی گیتاری چراوی شار بوو،،
تۆی بە من ناسی..
نیگایەکت کۆترێکی..
لە کەژی خەوتووی دڵا فڕان،،
زەنگی ڕۆح تاسا،،
چرپەیەک تا ئەو شوێنەی..
ئۆقیانووسی فرمێسکەکانی..
بیرەوەری ئەدرەوشێنێتەوە،،
جێت هێشت
………………..
گەر دوو هەسارە ،،
لە ساتە خەوێکی سەفەرا،،
بکەوێتەوە نێوانمان،،
من ئەبمەوە گەڕیدە وێڵ و سەرگەردانەکەی،،
مەدارە شێواوەکانی ئاسمان،
دوودڵ ئەبمەوە لە نیگارکێشە مەستەکە،،
بە جوانیەکی تێپەڕیوی سروشت،،
بروسکەیەک ، لە تیغی خەنجەر تیژتر،،
پەڕی گوڵی هەور، ئەوەرێنێ،
چیا بە دوای ئەسپی بارانەوە وێڵ، چرۆی..
چاوی، چەند ژەهراویە،
کە ئەکرێتەوە،،
شەو دائەکا،،
کە پێڵوەکانی دا ئەخا، لێوت چی..
بەهارێکی بێ زەمەنە، بێ بلێزمە،،
بێستان و مێرگ سەوز و تەڕن،
……………
لە تیشکەکانەوە…
چۆلەکەکان ، تۆڕی خەونی منداڵە..
نوستوەکانیان چنی، ژیانێک لە ..
کاسێکا، وەک شەربەتی پرتەقاڵ ، زوو بیخۆ،،
تا دوا تنۆکە، تا دوا هەناسە، ووتی…
عاشقتە، بەڵام تەنیابە، تا ئەتوانی،،،
وێڵ و سەرگەردان بە،،
ووتی عاشقتە، ىاوەڕمەکە،
لەسەر زەمین عیشق کوا؟ ،،،
ووتی بوونی یەک دیوی ئاوێنەیە،،
لە ئاوو شەونم و چرۆ دروستبوە،،
باوەرڕمەکە، چونکە هەموان..
لە لم دروست بووین،
کوا لم لەگەڵ لم..
عیشق ئەکا،،،
دڵی لمت بینیوە ببێ بە چرۆ؟
سیمرخی ڕۆحێک،
کوا تا ئەبەد…
لە ڕۆحی سیمرخی ترا دیل ئەبێ ؟
بینیوتە، ڕەشەبایەک،،
لە شوشەی کاتا قەتیس بێ؟،
بیستوتە مانگ،،
دەستبەرداری تەنیایی خۆی بێ؟..
خۆت بەسەر خەمی خۆتا بوەرە،،
ڕێگە بە ژیان تیاتا بڕژێ،
شەرابی جوانی بونێک ،،
لە ساتە وەختێکی لە دەستچوا،،
تۆ خەمت چیە، دوای هەمووشتەکان،،
خۆرێک بۆ تۆ ئەگەشێتەوە،
شیعرێک تۆ ئەنوسێ،،
یان ئەبیتە تراجیدیای شیعرێ،،
پاش هەموو شتێ،
کە پاپۆڕی سپی شەو تێپەڕ ئەبێ،،
سپێدەیەک ،،
ئەندێشەی بوونێکی تازە بۆ تۆ دێنێ،،
دارستانێک داگیرساو..
بە چاوی ئەستێرە عاشقەکان..
هەمیشە چاەوەڕێی پیاسەیەکی تۆ یە،،،
گوڵ تا ئێستا ماوە!، گەر نازانی،،،
پاش هەر لافاوێ لە خەمی جوان،،
ئاسمانیش هەمان تابلۆ،،،
بە ڕەنگی شین و سپی ،،،
ڕوبارێکیش، گەر پێ نازانی ،
لە پیرۆزی دڵ خۆیایەتی،
دڵ خۆی نزرگەی ڕۆحە،،
دوور، گەر کەمێک دوورتر ،،
لە گیا خەوتوە تەڕەکانی ژێر کازیوە،
گەر پێ هەڵگری ،،،
هەور هەر ئەتگاتێ

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.