Skip to Content

مژده‌ … ستار ئه‌حمه‌د

مژده‌ … ستار ئه‌حمه‌د

Closed
by October 9, 2020 General, Poems

شه‌كره‌ ژنێك

چێژه‌ عه‌شق و

نوقڵه‌ هیواو

به‌فره‌ سۆزم پێده‌به‌خشێت

ژنێك چوون شیعرو

له‌ئه‌وینا سه‌رمه‌ست و شێت

ئێواران گه‌رمه‌سۆز

شه‌وان شه‌رمه‌ خه‌وو

رووناكی دڵ

له‌ئاسۆی ده‌روونی هه‌ڵدێت

زه‌رده‌ ی به‌یان هه‌ڵده‌سێنێ و

شاباڵی ئه‌مه‌ك توند ده‌گرێت

هه‌تا ده‌گاته‌ ترۆپكی

گه‌رمه‌ هه‌ناوی نیوه‌ڕۆ

وێڵه‌ ژنه‌و

به‌دوای خۆی و رۆحی من و

دوندی ده‌روونا ده‌گه‌ڕێت

پیتێك له‌ئاونگی لێوی

چرپه‌یه‌ك له‌ترپه‌ی دڵی

هه‌ناسه‌یه‌ك له‌ماچێكی

سفرێك له‌گۆی مه‌مكه‌كانی

له‌بریسكه‌ی نیگایه‌كا

به‌گلێنه‌م ده‌شۆمه‌وه‌

چاوانم ده‌كه‌مه‌ ریچكه‌ی

خه‌ونی ئاڵ و

ته‌مه‌نی شه‌نگی ئاواتی

له‌كۆشما هه‌نسك ده‌دات و

عومرێكی نوێم پێده‌نووسێ

یه‌رگی لاویم ده‌كاته‌ یه‌ر

ده‌مبا به‌ره‌و

شه‌و چرای ژوان

گوڵه‌ خۆزگه‌و

لاسكه‌ تاسه‌و

ره‌گی مژده‌م پێ ده‌ڕوێتێ

ژنێك له‌یۆسه‌ی ژیانا

چه‌شنی چیا

بۆ مانه‌وه‌م

بووه‌ته‌ چاكترین سه‌نگه‌ر

ستار ئه‌حمه‌د

Previous
Next