Skip to Content

گەڕانەوەی ڕەنگ … هۆنراوە/ جەلال عەبدوڵا ساڵح

گەڕانەوەی ڕەنگ … هۆنراوە/ جەلال عەبدوڵا ساڵح

Closed
by October 9, 2020 General, Poems



١
دەنگی سەربازی پایز لەدوور دێ

باخ ئابڵووقەیە، دێبەر دەترسێ

گەڵا باڵدەگرێ. لق قۆڵی دەشکێ

باخچه‌ سه‌رپۆشی سه‌وزی ده‌ژاکێ

کیسه‌ڵی پیری ژێر کۆتەرەی تەڕ

نازانێ په‌نا بۆ کام شوێن به‌رێ؟

ڕێوی سڵدەکات، چەقەڵ دەترسێ

گورگ ده‌لوورێنێ، گا ده‌بۆڕینێ

بۆق به‌ چه‌ند بازێ به‌ره‌و گۆم ده‌چێ

واز لە کوشتنی مێشوولە دێنێ

ماری کەنار گۆم،چاوی ده‌خورێنێ

بۆ ژێر گابەردی قەدپاڵ ‌ڕێ دەبڕێ

ده‌نگی بروسکه و‌ ناڵه‌ی هەور دێ

چه‌خماخه‌ ده‌ستی گڕی هەڵده‌بڕێ

کۆتر هێلانەی جوانی ده‌ڕووخێ

لە کۆشی حەوزا بێچووی دەخنکێ

کوونەبەبووی پیر باڵی لێکدەنێ

خۆشی نازانێ بۆ کوێ باڵدەگرێ

لای لووتکەی چیا، لە پاڵ قەدپاڵێ

هەڵۆ بۆ ڕاوی ئاسک دەگەڕێ
٢
لەدووای چەند ڕۆژێ خۆره‌تاو هەڵدێ

تارای بووکێنی سرووشت لادەبرێ

ماسی بۆ گۆمی قوڵ پێده‌که‌نێ

لووتی لە کەفی بەفرائاو دەخشێنێ

لە ژوور سەری باخ، باڵندە دەفڕێ

بۆ نیشتمانی دارستان ده‌چێ

لەبەردەم دەرگای کلۆره‌دارێ

له ته‌نیشت سنگی گابه‌ردی شاخێ

سمۆرە پشتی بۆری دەخورێنێ

بە شانی سەوزی لق پێدەکەنێ


ڕەش و سپی و بۆر کەروێشی لاڕێ

قونە قونە دەڕۆن کلکیان دەلەقێ

تا دەریا و باران، دارستان هەبێ

ژیان ناوەسێ و گۆرانی دەڵێ

پایز نا توانێ چیا ڕووخێنێ

هەموو دارستان لەڕەگ دەربێنێ

هۆنراوە/ جەلال عەبدوڵا ساڵح/ تۆرۆنتۆ

Previous
Next