Skip to Content

مانیفێستی عەشق … بەشی نۆزدە…تێکست: ستیڤان شەمزینی

مانیفێستی عەشق … بەشی نۆزدە…تێکست: ستیڤان شەمزینی

Closed
by October 12, 2020 General, Poems

عەشق بە نیگایەک دەستپێدەکا، بە دێوانەبوون کۆتایی دێ
عەشق شیرینترین تاڵییە، عەشق تاڵترین شیرینییە


کاتێک تۆم ناسی، لەسەر مێزی قوماری ئەشقت
هەموو خەندەکانم دۆڕان و گشت فرمێسکەکانیشم بردەوە


گلگامێش، بە دوای میوەی نەمریدا گەڕا
منیش، وەدووی عەشقی تۆ کەوتم
ئەزانی هەردووکمان شەڕمان لەگەڵ مەحاڵ کرد؟


هێندە ئاڵۆز لێم مەڕوانە، لە ئاو روونترم
شیکردنەوەی من کارێکی ئاسانە،
تەنیا یەک دڵۆپ فرمێسکم


کاتێک عاشقت بووم
خۆم لە دۆزەخ بە تامی بەهەشت بینییەوە
ساتێک لێت دابڕام
کەوتمە ناو بەهەشتێک بە تامی دۆزەخ


تۆ گەورەترین جادووگەریت
بە چرای عەشقت ئاسمانی تاریکی دڵی منت رووناک کردەوە
تۆ گەورەترین جادووگەریت
بە فتیلەی ئەشقت سەهۆڵبەندانی رۆحی منت تواندەوە


من زیندانم لە ناو دڵ و خەونەکانی تۆدا
من زیندانم لە قەفەزی ئەشقی تۆدا
کەچی هەست بە سەربەستییەکی سەیر دەکەم!


ئەی یار وەک مەسیح،
بە بزماری ئەشقی تۆ لە خاچدراوم
ئەی یار وەک مەسیح،
تەنیا بۆ تۆیە نرکە و خوێنی رژاوم


کاتێک ئاشقی تۆ بووم
زمانم لە گۆ کەوت و کانی شیعرم تەقی
بەستەڵەکی دڵم توایەوە و بەهارێکی سەوزی هێنا


هەمیشە دەرگاکە بە کراوەیی جێدەهێڵم
چوونکە چاوەڕوانی گەڕانەوەی تۆم
بەڵام تۆ ناگەڕێیتەوە و منیش هەرگیز دەرگاکە داناخەم


لە دووریی هەزاران کیلۆمەترەوە
هەست بە گەرمی هەناسەت دەکەم
لە دووریی هەزارەها میلەوە
بۆنی گوڵاوی رۆحت دەکەم
ئیدی دووریی چ واتایەکی هەیە؟


تۆ ئەشق بە لانەی پێکەنین دەزانی
منیش بە سەرچاوەی گریان
ئەدی گریان و پێکەنین لە کوێدا بە یەک ئەگەن؟


کاتێک لە ئامێزت ئەگرم
دەمم لە شەکرە سێوی دەمتدا دەتوێتەوە
چۆلەکە پاسارییەکان دەفڕن و
هەواڵی ئەم ئەشقە بە شاردا بڵاوئەبێتەوە


Previous
Next