پرووشەکانی ئەوین -1- پۆستەرە شیعری: ستیڤان شەمزینی
بەشی یەکەم…
جگە لە خۆشویستنی تۆ
کارێکی ترم نییە
جگە لە ئامێزی میهرەبانی تۆ
هیچ پەناگەیەکی ترم نییە
جگە لە قووڵایی دڵی تۆ
هیچ نیشتمانێکی ترم نییە
ئەگەر مردم
لە پەڕەی گوڵاڵە سوورەی بەهاردا بۆنم بکە
لە پێکێک شەرابی زۆر کۆندا تامم بکە
لە ژوانگەی دڵداراندا یادم بکەرەوە
لە بەهەشتی ئاشقان،
کۆڵانی دێوانەکان چاوەڕێم بکە
ئازیزم.. کۆترە دوورە دەستەکەم
هەرکات بیرت کردم
لە قووڵایی شیعرەکانمدا یادم بکەرەوە
منیش هەر کات بیرم کردیت
لە وێنەکانتا قەسیدەیەکی تر ئەنووسمەوە
هەندێک هەست هەیە ناوترێ
هەندێک نیگا ناتوانی بیبینی
بەڵام هەندێک بێدەنگی هەیە
دەتوانیت لێی تێ بگەیت!!
ئەوەی ناتوانم بە زمان بیڵێم
بە نیگا پێت دەڵێم
ئەوەی ناتوانم بینووسم
بە فرمێسک دەیدرکێنم
لە قاوەی بەختما، تۆ دەرکەوتیت
هەموو تاریکییەکانت برد و
لە پرشنگی دڵی خۆت هەڵکێشام
لە قاوەی بەختما، تۆ دەرکەوتیت
گشت تاڵییەکانت لێ سەندم و
شەکراوی رۆحی خۆت پێ بەخشیم
ئەوینەکەم ئێستا تۆ دەرکەوتوویت
منیش بەم چارەنووسەم زۆر مەستم
زۆر مەست
تۆ جوانترین شیعری منی
تۆ قەسیدەیەکی هەموو رۆژێ ئەتنووسمەوە
تۆ خەونێکی هەموو شەوێک دەتبینم
تۆ کەنارێکی هەمیشە ئەمەوێ پێت بگەم
تۆ جادوویەکی نامەوێ هەرگیز بەتاڵ بیتەوە
تۆ نێرگزێکی مەست ئەبم بە بۆنت
تۆ خەیاڵێکمی هیچکات دووبارە نابیتەوە
تۆ شەونمێکی لە جەستەی شەکەتم نابیتەوە
تۆ هەر خودی خۆمی و لەدڵمدا دەتوێنمەوە
وتم هەرگیز لە تۆ دوور ناکەومەوە
ئەی نابینیت لە دڵتا هەناسەی ژیانم دەدەم؟
ئەی نابینیت هەموو رۆژێک لە خەونەکانتام؟
ئەی نابینی وەک پەروانە بەدەوری شەمعی باڵاتەوەم؟
ئەی نابینی لە هەنگاوەکانتا هێزم
لە باخچەکەتدا رەونەقدارترین گووڵم
لە خەیاڵەکانتا ئاسۆیەکی روون روونم
لە خەمەکانتا دڵۆپێک فرمێسک و
لە شادییەکانتا رەنگینترین خەندەم؟
ئەگەر هاتیت بە دڵۆپە شەونمەکانی سەر دڵتا دەتناسمەوە
ئەگەر هاتیت بە بۆنی نێرگزی رۆحتا دەتناسمەوە
ئەگەر هاتم بە خەونە رەنگاڵییەکانما بمناسەوە
ئەگەر هاتم بە ئامێزی گەرمما بمناسەوە
لە ئێستاوە تا ژوانێکی کەناری دەریا
لە بیرت بێت لە دڵی هەموو شەپۆلەکاندام
لە هەنووکەوە تا پیاسەیەکی رۆخی رووبار
لە بیرمە لە باوەشی گزنگی بەیاندایت
پۆستەرە شیعری: ستیڤان شەمزینی
