Skip to Content

شیعر: ئاگاداری پەنجەرە بچوکەکان بن  … نەوزاد بەندی

شیعر: ئاگاداری پەنجەرە بچوکەکان بن … نەوزاد بەندی

Closed
by October 28, 2020 General, Poems

لە پەنجەرەیەکی بچوکەوە ،
دنیایەک تیشک و ڕوناکی دێتەژوورەوە ..
ئاسمانێک هەوا و شەماڵ دێن لەو دیو سنوورەوە ..
بۆنی گوڵ ..
بۆنی باران ..
دەنگی بانگ ..
شێوەی یار ..
خاڵخاڵۆکە ..
بەفر و باران..
بۆنی چێشتی دراوسێکان ..
تەپ و تۆز ..
کۆکتێل و خورما خۆرەی هەڵهاتوو ..
پەپولە ، دێن لە دوورەوە ..
پۆلێ مێشولە و ..مارمێلکە دزە ئەکەن ..
قالۆنچە ..
دوپشک ..
مار ، بەشداری ئەو حەزە ئەکەن ..
سواڵکەر ..
پشیلەیەک وپێنج بێچوو ..
کۆڤید نۆزدە ..
بۆنی زێراب ..
جاسوس ..
وڕەی ئوتومبیل
فیشەک ..
نارنجۆک ..
جنێو ..
پیاو کوژ ..
دز ..
شەڕواڵ پیس ..
سیاسی ..
لە پەنجەرە بچوکەکان ئەدەن …

ئاگادار بن ..
پەنجەرە بچوکەکان گەورە نەبن ..
چونکە توشی هەرچی زوڵم و جەورە ، ئەبن ..

پەنجەرە ڕێک وەکو سەرۆک ،
یان ئەبێتە دنیایەکی
پڕ لە داد و
زانست و
جوانی و
ڕازاوە ..
یان ئەبێتە زیندانێکی
پڕ نادادی و
برسێتی و
جەنگ و
نەزانی و
دواکەوتن ..لە هەر چوار لاوە ..
وڵات ئەکا بە کەلاوە ..

ئاگادار بن ، سەرۆکەکان گەورە نەبن ..
چونکە توشی هەرچی زوڵم و جەورە ئەبن ..

نەوزاد بەندی

Previous
Next