Skip to Content

مێژوویەک لە شەڕەنگێزیی و چەواشەکاری،ڕوونکردنەوەیەک لە هاوڕێیان و کەسوکاری شەهیدانی “ئاڵای شۆڕش”ەوە

مێژوویەک لە شەڕەنگێزیی و چەواشەکاری،ڕوونکردنەوەیەک لە هاوڕێیان و کەسوکاری شەهیدانی “ئاڵای شۆڕش”ەوە

Closed
by October 28, 2020 General


مێژوویەک لە شەڕەنگێزیی و چەواشەکاری و ڕوونکردنەوەیەک لە هاوڕێیان و کەسوکاری شەهیدانی ئاڵای شۆڕش
لە میانەی کاردانەوەی بەرامبەر بڵاوبوونەوەی کتێبێکی مەلا بەختیار (لە بڕی بیرەوەری) لەسەر مێژووی کۆمەڵە و ئاڵای شۆڕش و ناکۆکیەکانی هەناوی ئەوسای و دەرئەنجامەکانی، بزووتنەوەی گۆڕان بەشیوەیەکی سیستماتیکی و هیستیری راست و چەپ کەوتە وێزەی لایەنێکی گەشی بزووتنەوەی چەپ لە کوردستان. بە هەمان نەفەس و عەقلیەتی ئەوسای باڵی ڕاستڕەو و زاڵی سەرکردایەتی کۆمەڵە، بێ رێزگرتن لە خوێنی ئەو هەموو شەهیدانەی ئالای شۆڕش و خەباتی هاوڕێیانی لە شاخ و لە شار و زیندانەکانی بەعس، هەمان تۆمەتی ناڕەوای ئەو کاتەی سەرکردەکانی کۆمەڵەیان خستە پاڵ ئەم ڕێکخراوە. ئەمەش هەمووی لە پای پاکانەکردن بۆ دامەزرێنەری بزوتنەوەکەیان، نەوشێروان مستەفا و پیرۆزکردنی. بۆ وەڵامدانەوەی ئەم چەواشەکاریانەی برادەرانی گۆڕان و دەرخستنی ڕاستییە مێژووییەکان و بەرگری کردن لە خەبات وخوێنی پێشمەرگە وشەهیدانی ئاڵای شۆڕش، ئێمە وەک ژمارەیەک لە ئەندامان و خانەوادەی شەهیدانی ئەم ڕێکخراوە، بە پێویستی دەزانین ڕوونکردنەوەی خۆمان لەم بارەوە لە چەند خاڵێک بخەینە ڕوو:

  1. بۆ برادەرانی گۆڕان: ئێوە لە چەندین بۆنە دووپاتتان کردۆتەوە و شانازیش بەوەوە دەکەن، گەر لەژێر زەبرو ئەشکەنجە وهەڕەشەش بێ، پاکانەتان بەسەرکردە زیندانی سیاسیەکانی ئاڵای شۆڕش ( مەلا بەختیارو مامۆستا پشکۆ و شێخ عەلی) واژۆکردووە، کە ئەوان بێبەرین لە ئاڵای شۆڕش. ئێستا لەپای چی ڕەش وسپی ودوێنێ وئەمڕۆ تێکەڵ بەیەک دەکەن و ناکۆکیتان لەگەڵ مەلا بەختیار ئاوا بەرچاوتانی تاریک کردوون. ئێمە، بەدەر لەو ناکۆکیانەی نێوانتان و لەدەرەوەی سەنگەری بەرگری لە مەلابەختیار یان دژایەتی بزوتنەوەکەتان ماف بە خۆمان دەدەین و بە ئەرکێکی ئەخلاقی خۆشمانی دەزانین، کە ئەو ڕاستیە مێژووییانەی ساڵانێکە لەلایەن دوژمنانی چەپی کوردستان چەواشەکراوە، بخەینە ڕوو و بەرگری لێبکەین.
  2. کاتێ ئێوە، وەک ئەوسای سەرکردایەتی کۆمەڵە، تۆمەتی خیانەت دەدەنە پاڵ هاوڕێیانی ئەوکاتەی ئاڵآی شۆڕش، لەبیرتان چوو، ئەوە سەرکردایەتی کۆمەڵە و یەکێتی بوون. (بەتایبەتیش تالەبانی و نەوشیروان) تەڕاتێنیان بوو لە نێوان کوردستان و بەغدا و لەسەر مێزی مفاوەزات مامەڵەی بە خوێنی شەهیدان دەکرد و ئەندامانی بەپەرۆشەوە وێنەیان لەگەڵ سەدام و سەرکردەکانی بەعس دەگرت، نەک هاوڕێیانی ئاڵای شۆڕش. ئەوە هاوڕێیانی ئاڵای شۆڕش بوون دژی گەندەڵی لەناو سەرکردایەتی و شەڕی ناوخۆ و سازش کردن بوون لەگەڵ ڕژێم و لەسەر ئەم هەڵوێستەیان بە چەنین شێواز سزا دەدران، سەیرە لای ئێوە هەڵوێستەکە پێچەوانە بۆتەوە.
  3. ئەو کاتەی ئاڵای شۆڕش باوەڕی وا بوو، کە بێ ڕووخانی ڕژێمی فاشی بەعس و بێ هاتنە کایەی دەسەڵاتێکی دیموکراسی لە عێراق ئەستەمە کورد لەسەر مێزی مفاوەزات مافی نەتەویی خۆی بەدەست بێنێ، هەرواش دەرچوو، لەپای داننان بە هەڵەکان، کەچی سەرکردایەتی کۆمەڵە تۆمەتی عێراقچێتییان دەخستنە پاڵ. ئێستاش سەیرە ئێوە ئەم قەوانە سواسە دووبارە لێدەدەنەوە.
  4. تۆمەتی وابەستەیی ئاڵای شۆڕش بە پارتی و چوونە (بەرەی جود) ەوە، دەرکەوت کە مایەپووچ دەرچوون. ئەوەی جێی گاڵتەجاڕیە ئێوە لەو پێگە سیاسیە شەرمئامێزەی ئێستاتان و لە باوەشی پارتی ئێستاش ئەو تۆمەتە دەبەخشنەوە. مەگەر بە پێودانگی ئێوە پارتی دیموکراتی کوردستان ئێستا لەوسا شۆڕشگێڕتر بووبێ!
  5. ئەوەی زیاتر لەو هەڵمەتەتان قێزەونە شانازیکردنتانە بە جەلادیی، چێژ وەرگرتنتانە لە ئەشکەنجەدان، هەڕەشەلێکردن و پاکانەپێکردن بە کەسانی تر. بۆ ئەوسەردەمەی هەشتاکان ڕەنگە ئێمە لە عەقلیەتی ئەوسای سەرکردایەتی کۆمەڵە تێگەیشتبین. بیرکردنەوەی ئێوە بەهەمان عەقلیەت وهەڵسوکەوتتان بەهەمان نەفەس جێی سەرسوڕمانە. جێی شەرمەزاریە ئێوە چەند جەلادێ دێننە سەر شاشەی تەلەفزیۆنەکەتان و باسی پاڵەوانیتی خۆیان لە ئەشکەنجەدان و بێڕێزی و پاکانەکردن بە زیندانیان بکەن. جەلاد لە هیچ کات و سەردەمێ و لەسایەی داپلۆسێنەرترین رژێمەکانیش شانازی بەکارەکەی خۆی نەکردووە، تەنها لای ئێوە نەبێ.
  6. تۆمەتی پاڵپشتیکردنی بێگانە بۆ ئاڵای شۆڕش جێی پێکەنینە، کاتێ ڕووداوەکان هەر زوو ئەمەیان پوچەڵ کردەوە و دەرکەوت ئاڵای شۆڕش هەڵقوڵاو و پێویستیی قۆناغێکی مێژوویی دیاریکراو بوو، بە پێچەوانەوە زۆربەی حیزبە باڵادەستەکانی ئەوسا و ئێستاش قاچێکیان لە کوردستان و ئەویتریان لەوبەری سنووربووە، بە ئیستاشەوە.
  7. تۆمەتی بوونی کەسانی سیخوڕ و سەر بە ڕژێم لە ڕیزەکانی ئاڵای شۆڕش نەک هەرشتێکی بێمانایە و تاکە بەڵگەیەکیش لەسەریان ساغ نەبۆوە، بەڵکو دەرکەوت کە تاکە ڕێکخراوێک بوو لە سەختترین ڕۆژانی دوای ئەنفال لە شارەکان درێژەی بە خەباتی نهێنی خۆی دا و چەندین تێکۆشەری لەم ڕێگایەدا بوونە قوربانی. ئەوە ئەو تۆمەتبەخشانەی ئەو سەردەمە بوون، کە چەندین فایلی زەبەلاحیان لەلایەن ڕژێم لە دوای ڕاپەڕین ئاشکرا بوو، نەک هاوڕێیانی ئاڵای شۆڕش.
  8. ئێمە بێگومانین، کە مێژوو ڕاستیەکان دەخاتە سەر ڕێچکەی خۆی و دەریدەخا، کە هاوڕێیانی ئاڵای شۆڕش وەک ڕێکخراوێکی چەپی کوردستانی دوای بەلاڕێدابردنی کۆمەڵە لە شاڕێبازی خۆی و بۆ ڕێگەگرتن لەو کارەسات و ماڵویرانیانەی لە سایەی هێزە باڵادەستەکانی ئەوسا و ئێستای کوردستان بەسەر گەلی کوردستاندا هاتن، هاتنە مەیدان. جێی داخە، کە پێشبینیەکانی و مەترسیەکانی ئەو ساتەیان و دواتر و ئیستاش هاتوونەتە دی. ئەوە ئاڵای شۆڕش نەبوو زەبری لە شۆڕش دا و پێشمەرگە و جەماوەری لە شۆڕش سارد کردەوە، بەڵکو سەرکردایەتی کۆمەڵە و یەکێتی، لە پێش هەموویانەوە نەوشێروان مستەفا و جەلال تاڵەبانی بوون، بە هەڵگیرساندنی شەڕی ناوخۆ و دەست تێکەڵکردن و تەسلیم بوون بە ڕژیم و تەسفیەکردنی نەیارانی گەندەڵی و مفاوەزات و لادنی سەرکردایەتی بوو ،کە پێگەی شۆڕشیان لەق کرد و ئەم هەموو کارەساتەیان بەسەر گەلی کوردستان بەدوای خۆی هێنا.
  9. ئەوەی جێی سەرنجە ڕێکخەری گشتیی بزووتنەوەکەتان نەوشێروان مستەفا خۆی لەچەندین بۆنە وبە نووسین و بە زارەکی، گەر لەڕووی مێژووییەوە درەنگ و لەڕووی سیاسیشەوە جێی متمانەش نەبێ، لێپرسراوێتی خۆی لە‌ شەرەنگێزیی و چەواشەکاریی یەکانی ڕابردوو و لەو مێژووەی پەیوەست بەوە دەربڕیووە، بێ ئەوەی بچێتە سەر ورەدەکاریەکان. کەچی ئێستا برادەرانی گۆڕان هەوڵدەدەین مێژوو بشێوێنن و هەموو ڕاستیەکان ئاوەژوو بکەنەوە. هەوڵدەدەن کەسایەتی نەوشیروان لە هەموو تاوانێک بێبەری بکەن و پیرۆز ڕایگرن، نازانن بەمانە ئەنجامەکەی پێچەوانە دەبێتەوە. ڕووداوەکان دەریانخست، کە سەرانی دەست ڕۆێشتووی کۆمەڵەی ڕەنجدەرانی کوردستان، لە سەرووی هەمووشیانەوە (نەوشیروان مستەفا) بە هەڵوەشاندنەوەی کۆمەلە، چ غەدرێکی مێژووییان لە خەبات و تێکۆشانی ئەندامان و شەهیدانی کرد. گەر ئۆباڵی مێژووی هەڵوەشاندنەوەی ئاڵای شۆڕشیش لە ئەستۆی سەرکردایەتیە بەرژەوەندخوازەکانی لەپێش هەموویانەوە (مەلا بەختیار) بێ، ئەوا سەرانی کۆمەڵەش جارێکی تر، بە دژایەتی کردنی ئەم ئەزموونە و لەناوبردنی، شەرمەزاری مێژوو بوونەوە. لەم ساتە ناهەموارەی گەلەکەمانی پێدا دەڕوا دەبوایە برادەرانی گۆڕان وەڵامێکی دروست بەو کارەساتەی بەسەر گەلەکماندا هێناویانە بدەنەوە، نەک هەوڵدان بۆ دووبارە چەواشەکردنی مێژوو.
  10. بۆ برادەرانی گۆڕان: لایەنی کەم شهامەتی سیاسی ئەوەتان هەبێ بە خۆتان دابچنەوە. ئێمە چاوەڕوانی زۆرتان لێناکەین، کەمترین شت کە بتوانن بیکەن داوای لێبووردنە لە ‌هاوڕێیان و کەسوکاری شەهیدانی ئاڵای شۆڕش بۆ ئەو سوکایەتی پێکردنەی ئەم دواییەتان.


    هاوڕێیان و کەسوکاری شەهیدانی ئاڵای شۆڕش
    25/10/2020
Previous
Next