پرووشەکانی ئەوین…بەشی کۆتایی.. شیعری: ستیڤان شەمزینی
هیچ رەشەبایەک نەیتوانی
رۆحم بە ئاسماندا ببا و بهێنێ
هیچ زریانێک دەسەڵاتی
راماڵینی خەندەکانی منی نەبوو
هیچ شەپۆلێک نەیتوانی
ئاڕاستەی کەشتییە وێڵەکەم بگۆڕێ
کەچی تۆ توانیت، زۆر بەخێرایی
بۆ ماچێک بمچەمێنیتەوە
یەکەمجار مرۆڤ ماچی داهێنا
زەمەن هات و زەمەن رۆیشت
کەس نەیتوانی شوێنگرەوەیەک بۆ ماچ دابهێنێ
کەواتە ئازیزم ماچ جادووە و پێم خۆشە
رۆژی سەد جار ئەو جادووەم لێ بکەیت
دەبینم هەموو رۆژێک دێیتە ناو بەیانییەکانمەوە
دەبینم هەموو شەوێک دێیتە ناو ئازارەکانمەوە
دەبینم وەک کلوە بەفر دەبارێیتە خۆزگەکانمەوە
دەبینم وەک سەدەفێک دێیتە دەریای خەمەکانمەوە
ئیدی لەه ەموو شوێنێک تۆ دەبینم
لێمگەڕی دنیا بە رەنگ و لە چاوی تۆوە ببینم
هیچ پێناسەیەکم نییە، تۆ بوویت بە پێناسەی من
هیچ ئادرەسێکم نییە، تۆ بوویت بە ئادرەسی من
هیچ نیشتمانێکم نییە، تۆ بوویت بە وڵاتی من
هیچ ئومێدێکم نییە، تۆ بوویت بە چرای هیوای من
وەک چۆن لە یەکەم نامەدا بۆم نووسیت خۆشم ئەوێی
ئێستاش لە دوا نامەدا بۆت ئەنووسم خۆشم ئەوێی
هەڵاتن و ئاوابوونی تۆ، بۆ من
تەنیا حکایەتێکی ناکام و تراژیدیی ئەشقە
بەم هۆیەوە رێم بدە ئەمێستاش وەک سەرەتا
خۆشم بوێی
ئەگەر ئێوارەیەک لەگەڵ کزەی “با”دا دیار نەمام
هیچ شوێنێک بۆ من مەگەڕێ
تەنیا چاوەڕوان بە لەگەڵ گزنگی خۆردا هەڵبێم
ئەگەر بەیانییەک لەگەڵ سپێدە غەیب بووم
هیچ شوێنێک بۆ من مەگەڕێ
چاوەڕوان بە لەگەڵ تریفەی مانگدا بێمەوە
وەرە پێکێک لەم تەنهاییەی من بخۆرەوە
وەرە گوێ لە ئاوازی پڕ گریانی دڵم بگرە
وەرە بەدیار خۆکوشتنی رۆحمەوە ئێشک بگرە
ئەوسا دەزانیت
ئەشق و تەنهایی و گریان و خۆکوشتن
هەمیشە پێکەوە کۆ ئەبنەوە
لە کۆتاییدا
لە جەنگی عەشق هەڵاتم و
وەک سەربازێکی راکردوو
چەکەکەی دەستم فڕێدا و
خۆم رادەستی قەدەری نادیار کرد
لە کۆتاییدا
لە نەبەردی عەشق هەڵاتم و
سەرەتای بەختەوەریم دەستپێکرد
رۆژئاوای زەمین
ئەو ئێوارانەی تەنهایی رۆحم دەگوشێت
تێبینی: ئەم پۆستەرە شیعرانە، لە کۆمەڵە شیعری “بەتیشکی عیشقت ئەدرەوشێمەوە” لە لاپەڕە 90-102دا چاپ و بڵاوکراوەتەوە. ئەو کتێبەش بەشێوەی چاپی کاغەز لە سەرەتای ساڵی 2017 چاپکراوە.
