Skip to Content

نازانم! ئینجیل دۆستۆیڤسکی کرد بە نووسەر یان قومار … شیعر: جەلال عەبدوڵا ساڵح

نازانم! ئینجیل دۆستۆیڤسکی کرد بە نووسەر یان قومار … شیعر: جەلال عەبدوڵا ساڵح

Closed
by October 31, 2020 General, Poems



فووم کرد
لەتۆزی ڕووخساری
تاوان و سزا
مناڵی خۆم بیرکەوتەوە
پیاوێک بە شڵەژاوییەوە
بەناو کۆڵانی گوندەکەماندا ڕایدەکردو
هاواری دەکرد:
خەڵکینە فریاکەون
“نادر”ە سمێڵ
دوێشەو لەناو جێگا
“ئافتاوی مینای”
بە تەور کوشت
ترسام!
خۆم شاردەوە
لەژێر کەواکەی دایکمدا
ئەو ترسە فێری دابڕانی کردم
وەک پێست و پەراسووم
نووسان بە ژیانمەوە
نازانم!
ئەم هەموو
لێکترازانی تەمەنە
چۆن؟ کۆبکەمەوە

ئەمشەو
قاچم بۆ دابڕان لە خۆم
تاقی کردەوە
گەیاندمییە
شەقامی سیبریای ژیان
جگە لە سێبەرەکەی خۆم
نە دۆستۆیفسکیم بینی
نە ڕاسکۆلینکۆڤیشا
سەیری ڕووخساری
جەلادی تەور دەکەم
لە ڕەنگی خوێنی
پیرێژنێک دەچێت
لە ماڵی مێژووی
تاوان و سزا
٢
گەڕانەوە بۆ لای مناڵیم

بە “پیچک”م ووت:
ئەو ڕۆژەی
قەمسەڵەکەی تۆم داکەندو
چوین بۆ ماڵی “ڕێواس” پێکەوە
کۆڵنجی ژیانم گرت
ئێستا لە نەخۆشخانەی تەنیایدام
هیچ دەرمانێکی ئێرە
وەک پێکەنینی تۆ
چاکم ناکاتەوە
کەی؟سەردانم دەکەیت
ئەو دوو باڵندەیەی
تۆ بانگت دەکردن
“بێوەی” و “هۆگر”
لەو ڕۆژەوە تفەنگ
ڕاویناون
بۆ من و تۆ
دەگرین
مانیان گرتووە
لە خوێندن
٣
سەما بۆ گوڵ

گوێم لە دایکم بوو
نزای دەکرد:
هیچ نەوەی ئادەمێک
هیچ زیندەوەرێک
ئازاری پێنەگات
کەچی لەناو پیاڵە چاکەیدا
لەتەنیشت سەرپۆشی
خەیاڵییەوە
مێشێکی دووگیان
باڵی مەرگی ڕادەوەشاند
بە دایکم وت:
نزا کردنت
مێشی
ڕزگار نەکرد
لە مەرگ
وەرە لەگەڵما
بڕۆین بۆ کەنار دەریا
گوێ لە باران بگرین
گۆرانی دەڵێت بۆ ژیان
سەیری سەمای
ماسی بکەین
بۆ ڕەنگی
کراسی مانگ
وەرە لەگەڵما
لەسەر سنگی
ئەم فەرشی دایک و فرزەنە
بە تەنها من و تۆ
هەڵپەڕین لەگەڵ
ئەو گوڵە ڕەنگاوڕەنگانەی
ئەم ئێوارەیە
بوون بە میوانی
پەنجەرەی
ژوورەکەمان

Previous
Next