یانزە گوڵ بۆ پرچی تۆ .. ستیڤان شەمزینی
1
گوڵدانێک لە کاسە سەرمدایە
گۆرانییەکیش لە قورگما
باخێک لە خەیاڵدامدایە
تۆش
لە دوێنی و ئەمڕۆ و سبەینێما
2
ژووەکەم سارد و سڕ نابێ
رۆحم هەست بە تەنهایی ناکا
خەونەکانیشم لێ نازڕێ
ئەو دەمەی بە چرپەوە
پێمدەڵێی خۆشم ئەوێی
3
سەیری کڵاورۆژنەی باڵام بکە
مۆمێک لە ژوورەکە داگیرسێنە
میلی کاتژمێرەکە رابگرە
ئەمەوێ لەگەڵ تۆ زەمەن بوەستێ
4
زنەی ئەشکی چەند ساڵەم وشک ئەبێ
زمانی شیعرم لە گۆ ئەکەوێ
دەستەکانم ئەکەونە لەرزین
ئەو ساتەی
دەمم پڕ شیلەی ماچت ئەبێ
5
زەنگی کەنیسەکە لە گوێما ئەزرنگێتەوە
کورسییە تەنهاکەشم هەر دەلەرێتەوە
دوو کووپ قاوەی گەرمم ئامادەیە
هەموویم خستۆتە چاوەڕوانی هاتنتەوە
6
لە ناو دڵی تاریکیدا دۆش داماوم
شەقامی رووناکی عەشقتم لێ دیارە
نازانم منم هەنگاو بەرەو ئەوێ ئەنێم
یان شەقامەکەیە بە راکردن بەرەو من دێ؟
7
لە سەهۆڵستانی رۆحما هەڵدەلەرزم
ئاگردانی دڵم لە دووریت کز و خامۆشە
هەستم نقوومی تەمتوومان بووە
چاوەڕێتم وەک چرایەک لە مندا داگیرسێی
8
زۆر جار تا سنووری شێتی بێزار دەبم
ختوورەی خۆکوشتن لە مێشکما گینگڵ دەخوا
بۆ چەند ساتێک بیر لە تۆ ئەکەمەوە
لە هەمووی پەشیمان ئەبمەوە
بە بزەوە ئەڵێم ئێستا ئەویش بیری من ئەکا
9
هەمیشە دەریام پێ جوانە
شەپۆلەکانیش خۆمم بیر دەخەنەوە
کە چۆن لە ئێوارەیەکی پڕ شەپۆلدا
وەک رەشەبایەک خۆم کرد بە ماڵی دڵتا
10
عەشقی من لە پایزدا چرۆی کرد
چەند جوانە ئەو گوڵەی لە پایزدا دەپشکوێ
تاقانەترین گووڵ و دیارترین گووڵە
چوونکە لە دڵی خەزاندا هاتۆتە دەرێ
11
یەکەمین لاپەڕەی دڵتم کردەوە
لەسەریم نووسی خۆشم ئەوێی
ئیتر لەو ساوە بووە بە پیشەم
هەموو رۆژێ لاپەڕەیەک هەڵدەدەمەوە
تەنیا ئەزانم تیا بنووسم خۆشم ئەوێی
