Skip to Content

ئەدەبی مناڵان/ دوو کەوی ژیر.. نووسینی: رەزا شـوان

ئەدەبی مناڵان/ دوو کەوی ژیر.. نووسینی: رەزا شـوان

Closed
by تشرینی دووه‌م 24, 2020 General, Kids Literature

دوو کەوبـاز، دوو کـەوی نـێرەی ئـازایان هـەبـوون. لەنـاو قەفـەزدا بەنـدیان کردبوون. رۆژێک هەردوو کەوبازەکە، گرەویان لەسەر ئەوە کرد، کە کەوەکەی کێیان لەوی تریان ئازاتـرە. رێکـکەوتن کـە کەوەکـانیان بەشـەڕبـدەن. بە هـەردووکیـان کـاسێکی گـەورەی زیـوینیان کڕی. کەوەکـەی کێیان شەڕەکـە بباتـەوە، کـاسە زیوینیـیەکە بـۆ خـاوەنی ئـەو کەوەیـان دەبێـت.
هـەردوو کەوبـازەکە کاتی بەشەڕدانی کەوەکانیان دیاریکـرد، شوێنیش باخچـەیەک بـوو. کـۆمەڵـێک کەسیشیان بـۆ بینـینی ئەم شـەڕە بانگکـردبـوون. هەمـوویان لـەو کاتـەدا لە باخچـەکەدا ئامـادەبـوون. کەوەکانیان لە قەفـەزەکانیان دەرهـێنان. شەڕەکە دەستیـپێکرد. کەوەکان بە دەنـووک و بە نینۆکەکانیان، پەڕێکی زۆریـان لە یەکـتری هەڵکێشا، سەر و دەموچاوی یەکتریان بریندار کرد. هەردووکیان تەواو ماندوو بوون، هـێزی شەڕکردنیان نەما. ئینجا وازیـان لە یەکتری هێنا. لەم شەڕەدا نە سەرکەوتوو و نە بەزیو، نە براوە و نە دۆڕاو هـەبـوون. بـەڵام هـەردوو کـەوەکە ئـازارێکی زۆریـان بـە یەکـتری گەیـانـد.
ئەم کۆتـاییە نە بە دڵی دوو کەوبـازەکە و نە بە دڵی بینەران بـوو. هـەردوو کەوەبـازەکە بـڕیـاریـان دا، کـە لـە هـەمـان کـاتـدا لـە یەکـەمین رۆژی مـانـگی داهـاتـوودا، هـەر لـەو باخچـەیـەدا، دووبـارە کەوەکـانیـان بەشـەڕبـدەن.
هەردوو کەوەکە، بێ ئەوەی بە یەکتری بزانـن، بیریان کردەوە، زۆر پەشیمان بوونەوە.

کەوی یەکـەم:”ئێمە لە پێناوی چیدا، بە هاندانی ئەم دوو کەوبازە، ئەم شەڕەمـان لەگەڵ یەکتریدا کرد و وامـان بەسەر یەکتریدا هـێناوە؟ گەوجـییەکی گەورەمـان کرد. گـریـم مـن بەسـەر کەوەکـەی بەرانبەرمـدا سەرکـەوتـم. ئایـە خاوەنـەکەم ئـازادم دەکـات؟ بێگـومان نەخـێر. چەندین شەڕی ترم پێـدەکات.. تیاش بچـم ئەو چی باکـێتی! بەڵـێنبـێت ئیتر شـەڕ لەگـەڵ هـیچ کـەوێـکـدا نـاکـەم”.

کەوی دووەم:” زۆر پەشیمانـم، لەو شەڕەی کە لەگەڵ ئـەو کەوە هـاوڕەگەزەمـدا کـردم. ئـەو یا مـن سەربکـەوتـمایە. لە زیـان زیـاتـر، چی سـوودێـکی بـۆ ئێـمە هـەیـە؟ ئـازادی و ژیانیان لێـداگـیرکردوویـن.. لە قەفـەزدا بەنـدیان کـردووین.. ئەمە کـەی ژیـانە؟! ئـەم هەڵـەیە دووبـارە نـاکەمەوە.. بیـرم لەوە کـردۆتەوە کە لەو کاتەدا پێکـەوە هەڵـفـڕیـن”
برینەکانی کەوەکان ساڕێـژبـوون، پەڕەکـانی باڵەکـانیشیان دڕێـژتـر بـوون. یـەکی مانگی تـازەیە. هـەردوو کەوبـازەکە و بیـنەرانـێکی زیـاتر لـە هەمـان کـات و لـەو باخچـەیـەدا، ئـامـادەبـوون. کەوەکـانیان بـەرەڵـڵاکـردن. بـە ئـارامییەوە چـوون بـە لای یەکـترییـەوە.
کـەوی دووەم بـە گـۆێی کـەوی یەکـەمـدا چـرپـانـدی و وتی:”براکـەم، دڵـنـیابـە کـە مـن شەڕت لەگەڵدا ناکەم.. بڕیارم داوە کە هەڵـفـڕم.. ئایە تۆش ئامادەی کە پێکەوە یەکسەر هـەڵـفـڕیـن؟”
کـەوی یەکـەم:” منیـش ئـەو بەڵـێـنەم داوە، کـە شـەڕت لەگـەڵـدا نەکـەم. بـەڵی ئامـادەی هـەڵـفـڕیـنم.. بـا رزگـارمـان بێـت”
هـەردوو کەوەکە، دەرفـەتیان لەدەست نـەدا و لەوە زیاتر درێـژەیـان بە قسەکـردن نـەدا. پێکەوە یەکسەر دایـان لە شەقـەی بـاڵ و هەڵـفـڕین.. تـا لەچاو ونبوون.. خۆیان گەیاندە سەر لووتـکەی چـیایەکی بەرزی کوردستان. لە قەفـەز و لە بەنـدی و لە شەڕ ڕزگاریان بـوو. هـەوای ئـازادییـان هـەڵـمـژی.. فـیری پـەنـد و وانـەیـەکی بـاشیش بـوون.


رەزا شـوان
نەرویـج :٢٠٢٠

Previous
Next
Kurdish