Skip to Content

نەسیمی عەشق .. شیعری: ستیڤان شەمزینی

نەسیمی عەشق .. شیعری: ستیڤان شەمزینی

Closed
by تشرینی دووه‌م 26, 2020 General, Poems

پێرێ بە چرپە و بەدەم خۆمەوە ئەمووت
لە هەموو ساتەکاندا هەر چاوەڕوانی تۆم
چاوەڕوانم وەک پەپوولە بفڕیت
دوور دوور بفڕیت
چوونکە من ئاسمانێکی قووڵی عەشقم
دەرگای دڵم بۆ پێشوازیی تۆ کردۆتەوە
بفڕە ئازیزم بفڕە
من زۆر لە مێژە چاوەڕێم
دوێنی تۆ هاتیت، من وتم
چیتر تەنیایی لە ئامێز ناگرم
مانگی چواردەی من هەڵهات
نەسیمی ئەشقم هەڵیکرد و
پریاسکەی خەمم پێچایەوە
بۆ هەمیشە، خۆم
لە دوورگەی دڵی پڕ ئەوینتا ون کرد
ئەمڕۆ هیچ هەواڵێکی تۆم نەزانی
دەرگای ئاسمانم راوەشاند و
جەرگی زەویم شەق کرد
وتم پەروانە تەنهاکەی خۆمم بدەنەوە
چوونکە فێری سووتانى
ئاگری عەشقی من بووە
سبەی کاتێک تۆ دەردەکەویت
گەردەلوولی ناو دڵم ئارام ئەبێتەوە
شەپۆلەکانی ئۆقیانووسی عەشقم رادەوەستن
گڕکانی تووڕەیی خەیاڵم دەنیشێتەوە
ئەگەر دوو سبەی بێی
ناهێڵم هەناسەت لە هەناسەم
دڵت لە دڵم، لێوت لە لێوم
جەستەت لە جەستەم
ئاگری گەرمی رۆحت
لە رۆحی سارد و سڕم بێتەوە
ئەگەر هەفتەیەکی تر بێی
ئەبینی وەک مناڵانی شار بزێو و دەست نەسرەوم
ئەوان بە خەیاڵ ئەستێرەکان بە چنگ ئەگرن
بەڵام من بە واقیع هەسارەی دڵت داگیر دەکەم
ئەوان بە خەیاڵ یاری فوتبۆڵ بە مانگ دەکەن
من بە واقیع دەمم لە شەکرە سێوی دەمتدا ئەتوێتەوە

Previous
Next
Kurdish