Skip to Content

ڕاگەیاندراوێک لە تۆڕی پاراستنی تەندروستی گشتیەوە لە بارەی ڤاکسینەی ڤایزەر/بایونتیک

ڕاگەیاندراوێک لە تۆڕی پاراستنی تەندروستی گشتیەوە لە بارەی ڤاکسینەی ڤایزەر/بایونتیک

Closed
by December 3, 2020 General

ڕاگەیاندراوێک لە تۆڕی پاراستنی تەندروستی گشتیەوە لە بارەی ڤاکسینەی ڤایزەر/بایونتیک:

پێویستە کوردستان بە زوترین کات بڕێک لە ڤاکسینەکە پەیدا بکا
تۆڕی پاراستنی تەندروستی گشتی بە خۆشحاڵیەکی زۆرەوە پێشەوازی لە هەواڵی ڕێگەدان بە ڤاکسینەکەی ڤایزەر/بایونتێک دژی کۆرۆنا دەکات لە لایەن دەزگای ڕێکخستنی دەرمان و کەرەستەی پزیشكی بریتانیا. بەم هەنگاوە، بریتانیا یەک وڵاتە لە جیهاندا کە بە فەرمی ڕێگە بە ڤاکسینێک بدا دژی نەخۆشی کۆڤید ١٩.
هەر بە گوێرەی هەواڵەکان، لە هەفتەی داهاتوەوە، وڵاتی بریتانیا دەستدەکات بە دابەشکردنی ڤاکسینەکە. وڵاتەکە تاوەکو ئێستا ٤٠ ملێۆن جۆرعەی لەو ڤاکسینە کڕیوە و هاوکات ئەمریکا ١٠٠ ملیۆن و ئەوروپاش ٢٠٠ ملیۆنی لە ڤاکسینەکە کڕیەوە.
ڤاکسینەکەی ڤایزەر/بایونتیک پێویستە لە پلەی ٧٠ ژێر سفرەوە بپارێزرێ بەڵام دەکرێ بۆ چەند رۆژێک لە پلەی گەرمی ساردکەرەوەی ئاساییش بپارێزرێ بۆ ئەوەی بگوازرێتەوە بۆ ئەو شوێنانەی پێویستە دابەشبکرێ. هاوکات ڤاکسینەکە پێویستە بە دوو جورعە بدرێتە ئەو کەسانەی وەریدەگرن.
بە گوێرەی لێکدانەوەکانی شارەزایانی سەر بە تۆڕەکەمان، وەکو لە پێشتریش بڵاومان کردەوە هەرێمی کوردستان پێویستی بە نزیکەی ١ ملیۆن ئەم ڤاکسینە هەیە بۆ قۆناغی یەکەم (کە لە دوو جورعە پێکهاتوە). بۆ پێدانی دوو جورعەکەش هەرێمی کوردستان پێویستی بە نزیکەی ٤٠ ملیۆن دۆلار هەیە.
ئێمە لە تۆڕی پاراستنی تەندروستی گشتی داوادەکەین کە حکومەتی هەرێمی کوردستان بەپەلە کار بۆ بەدەستهێنانی ئەم ڤاکسینە بکات. هاوکات داوا دەکەین کە پشت بە پلانەکەی تۆڕەکەمان ببەستن بۆ چۆنیەتی دابەشکردنی ڤاکسینەکە بەسەر ئەو قۆناغانەی کە لە ڕابوردودا خستمانە پێش چاو. دەکرێ ئەم ڤاکسینە گرانەی ڤایزەر/بایونتک تەنها بۆ قۆناغی یەکەم بەکاربێ و بۆ قۆنا‌غەکانی دیکە ڤاکسینە هەرزانەکەی ئۆکسفۆرد سودی لێوەربگیرێ.
ئێمە لە تۆڕی پاراستنی تەندروستی گشتی بڕوای تەواومان هەیە بەوەی کە حکومەتی هەرێمی کوردستان لە ڕوی یاسایی و داراییشەوە توانای ئەوەی هەیە کە ئەم ڤاکسینە فەراهەم بکات. دواجار ئەو ٤٠ ملیۆن دۆلارە، پارەیەکی کەمە بە بەراورد بەو بڕە پارەیەی لە قاچاخی نەوت و هێلکە و جگەرە و دەرمان کە بە نایاسایی لە خاڵە سنوریەکانەوە بەهەدەردەدرێ.
بۆیە لێرەوە بانگەوازی پزیشک و کارمەندانی ته ندروستی و خه لکی کوردستان بە گشتی دەکەین که فشار بخەنه سەر حکومەتی هەریم و وەزارەتی ته ندروستی تا ده ست به جی ده ست بکه ن به کرینی فاکسینه که ودابەشکردنی به خوڕایی.
تۆڕی پاراستنی تەندروستی گشتی
٢٠٢٠/١٢/٢

Previous
Next