Skip to Content

521 Views

لە یاریی ژیاندا بەردەوام داشی مەرگی نابەوەخت بەسەر لاوازەکاندا سوارە! … سەعید ئەمانی

لە یاریی ژیاندا بەردەوام داشی مەرگی نابەوەخت بەسەر لاوازەکاندا سوارە! … سەعید ئەمانی

Be First!
by February 3, 2017 General, Poems
image_print

مەرگی بێوەخت و لەناکاو
هەر بە منی لاواز دەوێرێ

لەبوسەمدا لەگشت شوێنێ
لە بولەرزە و لافاو و توشی و تۆفانا
وەک حەزیایەک
هێرش و هاشاوڵم بۆ دێنێ

لە بۆمبی بیر و ئەفکاری داعشانە و
سوتانی ” پلاسکۆ” کاندا
بڵێسەکانی ئاگرە و دەمبرژێنێ

بە بنار و بە بەرزایی شاخانەوە
لەسەر ڕێگای کۆڵبەریمدا
ڕنوی بەفرە و دێ بەرومدا

لەسەر سنور گوللەی پاسدار و مەئمورە
جەستەی کردومە نیشانە

لەشوێنی کار و کارخانە
گەردیلەی گاز و دوکەڵە
ئاوێتەی هەناسەدانمە

دێوەزمەی بێکاریە و
بەردەوام لەسەر شانمە

پەتی سێدارەی دوژمنە
گەروم دەگوشێ

زەخت و گوشاری زۆردارە
دەمتارێنێ

سەرمای وەرزی نەهامەتیە
دەمتەزێنێ
لە ڕێگای کۆچ کردنمدا بۆ هەندەران
شەپۆلەکانی دەریایە دەمخنکێنێ
سوکایەتی تاراوگەیە دەمتاوێنێ

دەبێتە شەڕ و ئاژاوە
پێم دەفرۆشرێ
دەکرێتە بومب و گوللە
تێمی دەگرن

ئاوێتەی پیلان و خورافەیە
بە لامەوە پیرۆز دەکرێ

دەبێتە تیری بێ هیوایی و
بەدەستی خۆم دامدەبێژێ

دەستی بە هێزی زۆردارە و
هەر رۆژەو بە چەشنێ منی بێ هێز
دەسڕێتەوە
داری هیوام بەرناهێنی
لەڕەگەوە دەیبڕێتەوە
***
ئەو دوژمنانەی تا ئێستا
منیان کوشتوە
ئەو دەستانەی لە بێ هێزی من بەهێز بوون
هیواکانمیان ناشتوە
ئەو دەنگانەی بەسەر دەنگمادا دلێر بوون

هەر خۆم بە توانام کردون و
لە بێدەنگی من بوێر بوون
***
من بە ئەژمار
مەزنترین هێزی دنیام
ژیان بەخش و خوڵقێنەری
ئاسودەیی و هەرچی ئەشیام

گەر بمەوێ لەو بەهەشتەی
لەم جیهانە خوڵقاندومە
بەشم هەبێ
ئازار و مەرگ بتارێن و
وەکو مرۆڤ لە خۆشیدا
کەشم هەبێ

دەبێ هێزم کۆبکەمەوە
داسی خەبات و تێکۆشان
بۆ دروێنەی
ئازار و ژان
هەڵبڕینی لاسکی زوڵمی زۆرداران
تیژ و دەمەزەرد کەمەوە

دەبێ بەخۆمدا بێمەوە!
ئەو نەزمە پێچەوانەیە
بۆباری خۆی هەڵگێڕمەوە.

Previous
Next

Leave a Reply